Un poco de storia:
I primi padri Mechitaristi Armeni (no ve fazo la storia del'origine de sto nome) i risulta presenti in cità zà nel 1756: presenza atestada da una lapide, che nela catedral de San Giusto, indica.
Nel 1773 alcuni confratelli se trasferisi a Trieste co' l'intenzion de verzer un convento. Nel 1775 l'imperatrice Maria Teresa ghe dà el 'diploma' de residenza e ghe consenti de verzer una scola publica, un colegio e una tipografia per stampar testi religiosi nele lingue orientali col scopo de divulgar in queste la religion catolica.
Nel 1777 i compra la casa del patrizio triestin Pasquale Ricci e i la adata ale proprie esigenze, ma gavendo fati tropi debiti i devi alienar i propri beni; semo nel 1810.
Nel 1817 i torna a Trieste e nel 1846 l'architeto Giovanni Battista de Puppi elabora un progeto per far un convento in un fondo che ghe xè stado vendudo da Giorgio Giustinelli. El convento xè stado realizado presto, inveze se ga dovudo spetar el 1858 perchè che al Magistrato Civico ghe vignissi inviado el progeto per la nova cesa.
El primo magio 1859 vien solenemente celebrada la consacrazion dela nova cesa dedicada a 'Santa Maria delle Grazie', realizada anche con un generoso finanziamenton de Giorgio Ananian.
La strutura presenta una faciata a capanna de gusto neo-romantico mentre dentro se svilupa un'aula a pianta quadrata.
Per un breve perido anche l'arciduca Massimiliano, che iera ospite lela vizina villa Lazarovich, ga frequentà la cesa prima de trasferirse a Miramar. Tanto xè vero che proprio l'arciduca ga comissionà la pala del altar magior che rafigura la Beata Vergine delle Grazie; mi però sta pala in cesa no la go trovada.
Dal 1939 la strutura xè utilizada dala comunità catolica de lingua tedesca.
Xè necessari però, per el fururo dela cesa, urgenti restauri, in quanto una torre campanaria e alcune parti dela faciata xè in condizioni precarie e diverse parti de intonaco xè pericolanti. Purtropo i proprietari, che xè i mechitaristi Armeni de Venezia, nonostante che la strutura sia un simbolo del'identità storica e culturale dela nostra cità no i sembra interessadi ai restauri.
El toco più importante dentro la cesa xè nela cantoria: xè l'organo de cui parleremo più avanti.
Comincemo a guardar l'esterno.
Questa xè una vecia stampa, che a suo tempo ADLER ga messo in forum e che mi go copià riproponendola qua.
Davanti ala cesa gavessi dovudo vignir costruida una grande scalinada, simile a quela de Santa maria Magior, ma per mancanza de fondi no la xè stada subito realizada e dopo i tereni su cui la doveva vignir costruida xè stai vendui e xè stade costruide case, sofigando cussì la visual dela faciata.
![Immagine](https://www.atrieste.eu/Foto/Z001/SumCulexArmeni/a01.jpg)
La faciata risulta piutosto sconta tra le case
![Immagine](https://www.atrieste.eu/Foto/Z001/SumCulexArmeni/a02.jpg)
Questo xè el massimo del insieme che se riva a veder dala strada (no go coragio de sonar campanele per andar un qualche apartamento nei piani alti de qualche casa)
![Immagine](https://www.atrieste.eu/Foto/Z001/SumCulexArmeni/a03.jpg)