trieste dove?

[LupoDellaDolina]

dato che el mio precedente sondaggio xe sta tacà in un altra discussion colgo l'occasion per far un sondaggio de respiro un po piu ampio rifazendome a uno simile che go visto sul sito de sandro.
sotto chi ve piaseria che fossi trieste?
austria,italia,slovenia o territorio libero de trieste?

[babatriestina]

Za no me piasi esser "soto de" qualchedun... ma no me dispiasessi esser el solo porto.. dela Svizzera!
anche sede de qualche ufficio central europeo, tipo Strasburgo o Bruxelles me paressi bel...
Austria e Slovenia scarto perchè no so la lingua e perchè co le ghe xe stade qua ( una per tanto, una per poco..) iera troppi pupoli. Tlt ( inclusa la zona B, se intendi!) no me ga mai piasso che el prevedeva un governador nominado de fora e no votado de qua , no me pareva una costituzion assai democratica..
resta poca scelta...
nissun proponi la cinquantunesima stella? o venderse ai omini de affari cinesi per deventar ricchi tipo Hong Kong?
(Ciò cola Slovenia, i ne faria pagar la vignetta anche per becar la superstrada?)

[sono piccolo ma crescero]

la domanda no me piasi, perché nei due secoli pasai la xe stada ala base de guere, morti e soferenze per tuta l'Europa via. La trovo segno de una vision otocentesca che ga avù le conseguenze più tragiche nel secolo pasà.

Ieri son andà a san Servolo e son stà contento de ver pasà el confin quasi senza acorzerme, de ver podù pasegiar un poco in Slovenia e un poco in Italia senza che nesun me disi niente. Questo per mi xe importante. L'ultima volta che iero a san Servolo, 35 anni fa, co iero rivà al confin gavevo trovà la sbara sbasada e dopo un poco iera rivà un graniciaro (per i foresti se ciamava cusì le guardie de frontiera iugoslave) sburtando col s'ciopo un clandestin. El lo ga serà nela casermeta, el ga tirà su la sbara e el ne ga fato pasar controlandone i documenti co la facia incazada e col s'ciopo tra le gambe. Eco, questo no voleria che se ripeti più e go paura che se continuemo a giogarse con queste domande, invece, ghe torneremo de novo.

No pensar, te prego, che scrivo sta roba perché son de cultura italiana e quindi poderia eser clasificà come filoitalian. Come go scrito de altre parti, i mii iera profughi istriani, ma se te me domandi se voleria che l'Istria tornasi italiana, te risponderia nela stesa maniera.

[LupoDellaDolina]

Za no me piasi esser "soto de" qualchedun

si te ga razon go scrito mal! meo dir con chi ve piasesi star?

[LELA]

Mi sbaljerò, ma no' me dispiasi sto "sondagio" cusì come gnanca me dispiasi risponder che, se'l fusi 'ncora quel de 'na volta, me 'sai piaseria eser governada (visto che l'umanità - a mio aviso - no' la pol eser anarchica e gnanca la lo poderà mai eser, visto che "ogni mente è un piccolo mondo" e 'stà roba quà la farìa naser 'ncora più guere - che mi aboriso, come qualsiasi altra forma de violenza - e, visto anca che, purtropo, i confini esisti e, de conseguenza, ancha i vari Stati) dal'Impero Austrungarico! Ma indrìo no' se pol tornar e, alora, vardemo 'vanti sperando in mejo.

Ciau ciau, sempre con simpatia, Lela.

[Zigolo]

con chi ve piasesi star?

Me piasessi viver in una società dove tuti i suoi membri xe consci de viver in una società e che oltre ale propie esigenze ghe xe anche quele dei altri, e che chi che ga magiori responsabilità sia onesto e, apunto, responsabile.

In una società cussì ga importanza el color dela bandiera? O mejo: cossa servi la bandiera?