Oggi go fotografà un moscon. Son d'acordo, no i me piasi, ma i esisti anche lori e alora ghe go fato due foto, visto che el stava fermo, sul bordo de un scalin de scala Bonghi.
![Immagine](http://inlinethumb21.webshots.com/25108/2371822690102783520S600x600Q85.jpg)
Come che lo fotografavo, me son ricordà de un fato che me xe capità de mulo. Go serà tra due vetri (per i foresti a Trieste, per via dela bora e prima che vegnisi le finestre de aluminio o pvc, gavevimo dopie finestre, finestra e contrafinestra) go serà, disevo, un moscon tra le due finestre.Po' go ciolto el flit (insetticida), go verto in sfesa (ho socchiuso) la contrafinestra e go butà un poco de ddt dentro.Dopo un poco el moscon el xe cascà per tera e prima de morir el (anzi doveria dir la) ga comincià a partorir, ma no oveti, vermeti vivi che ga comincià a caminar da per tuto. Probabilmente iera una sarcophaga carnaria, che apunto xe ovovivipara.
Ve dirò che a mi le mosche me dà fastidio, come penso a tuti, e pur veder sto esere che, prima de morir, ga fato de tuto per meter al mondo i fioi, me ga quasi comoso, tanto xe vero che me ricordo ancora de sto episodio dopo più de quarant'anni.
E dopo, naturalmente, me ga tocà copar tuti i vermeti che caminava e se rampigava per i teleri. Ah sì, i vermeti se ciama bigattini i li dopra per pescar e anche nela medicina legale per saver de quanti giorni che xe un cadavere. Qualchedun li dopra anche per tegnir nete le ferite perché i magna solo la carne morta: come vedè tuto pol eser utile a sto mondo.