volè che ve digo una roba? quando iera cominciada la campagna mediatica su l'influenza suina, che sembrava che sarìa stada come la Spagnola, mi no ghe credevo.
Quando i me domandava: te se gà vaccinà? Mi ghe rispondevo de no, che se xe destìn xe destìn.
Adesso salta fora che iera un bluff, che no me ga sorpreso nianche un poco, perchè i ghe gaveva provà zà co' l'influenza dei polàstri.
Secondo mi i polàstri semo noi tutti, quando ghe andemo drio ai telegiornàli.
Gavè fatto caso come che funziona l'informaziòn dei telegiornali?
Xe un poche de agenzie stampa nel mondo (Reuter, ANSA, Kronos...), che manda ogni giorno un certo numero de notìzie, disemo ad esempio 50. Se fè caso, sopratutto i telegiornàli (la stampa un poco de meno), no i fa altro che selezionàr un poche de le notizie dele agenzie e con quèle i fà el telegiornale.
E dopo, xe tuto un copiarse l'un co' l'altro, con le televisioni via satellite tipo CNN, al jazera e quele poche altre; che praticamente chi trasmetti per primo per i fusi orari, el ghe fa i telegiornali a tutto el mondo.
I inviati che i va lòri in zerca dele notizie, praticamente no esisti più; i sta a disposiziòn eventualmente per comentàr le notizie dele agenzie. Probabile che no i gabbi tempo de fàr ricerche e de scriver.
In 'sto scenario, no me stupissi che l'ufficio stampa de qualche casa farmaceutica multinazionale, el rivi a mètter su una campagna publicitaria come quela dei vacini, e che i giornalisti de tuto el mondo i ghe vadi drìo senza forsi nianche renderse conto. Che po' se sa che a lori ghe interessa pubblicàr tutte le notizie catastrofiche perchè questa xe la "legge de l'audience".
Cussì finirà che se vegnerà una epidemia vera, nissùn ghe crederà più
![:-) :-)](./images/smilies/icon_smile.gif)