Shakespeare gavaria gavudo sai dificoltà de componer un’altra strofa per verzer simbolicamente el topico del dilema “Energia o Preservazion del’Ambiente,” che quela famosa del Amleto. La bati propio ben qua dentro.To be, or not to be: that is the question:
Whether 'tis nobler in the mind to suffer
The slings and arrows of outrageous fortune,
Or to take arms against a sea of troubles,
And by opposing end them?
Essere o non essere, questo è il problema:
se sia più nobile d'animo sopportare
gli oltraggi, i sassi e i dardi dell'iniqua fortuna,
o prender l'armi contro un mare di triboli
e combattendo disperderli.
“Energia e Preservazion del’Ambiente” xe infati un dilema piutosto spaventoso perchè, a prima vista, el ne poni la scelta de viver nela maniera che semo abituadi a viver opur tornar al mus e careto e i manzi per tirar l’aratro.
Go dito a prima vista, perchè no xe tuto oro quel che lucica propio come che no xe tuto regali de cani quel che se trova per i marciapie. Qualche volta podaria anche eser una vienese che che ghe xe sbrisada del panin de qualchedun, un Toscano mezo fumado .... o un rodolo de Euro che ignari de quel che el xe, piedoni lo ga calpestado ala morte. Per fortuna una volta scoperto la sua identità, pasterà darghe una spolverada e goderse i soldi cusì fortuitamente trovadi. Perchè quel problema che par irreparabilmente una dicotomia, se pol, difati, risolverlo, e con la soluzion armonizar l’un polo e l’altro e lasar che ‘l povero Shakespeare continui a dormir in pase.
La forza del sistema de vita dele società del’ovest xe la tecnologia che ne permeti de produr e consumar a volontà. Quel ato de consumerismo ne permeti el luso de asicurarne l’impiego, le redi sociali tali pensioni, asicuracioni malatie, scole e via parlando. Per via del fato che fin’ora iera tanto facile trovar energia eletrica, petrolio, energia de qua e de la, minerali, quel che gavemo dimenticado xe che per produr ghe xe un limite. Purtropo prima o dopo bisogna pagar el piferaio che sona per farne balar e quel piferaio ogigiorno xe el pianeta e la sua salute scadente. No basta dir “Adeso scalemo tuto indrio, ralentemo la corsa e tuto andarà ben!” perchè la conseguenza de un corso de azion simile saria ancora più grave de quela che el vecio seteto G7, Bush, Blair, Howard, Berlusconi, Harper, Chirac ga combinado con la loro idealogia del laissez faire in riguardo ale imprese multinazionali e varie banche. L’esere umano se abitua presto a amiliorar la vita e star meio, ma andar indrio xe una pirola che no ghe piasi tanto inghiotir.
Disromper la rede sociale con miliaia de persone disocupade, fondi de pension e asicurazion che trova le caseforti s’vode e niente novi bori che riva per impignirle a causa del ciclo dele industrie che sera, gente che no lavora, tase che no vien pagade e via disendo no xe facile, ne pratico. Un ciclo simile causa eventualmente mancanza de tuto, inclusa la produzion agricola. La fame e la povertà causa, guere, tumulti e discordia... insoma capì quel che voio dir.
E eco che i nemici dela preservazion del’ambiente ecologico i sbandiera e ziga vitoria.
Ripeto quel che go dito verzendo sto discorso, la scelta no xe essere o no essere, ma piutosto eser, e eser in armonia, sia dal’una che dal’altra parte. El spirito imprenditoriale che ga prodoto el mondo civile de ogi, quel che vedi la capabilittà de usufruir de qualsiasi oportunità, el sa anche trovar le oportunità in posti che par propio sconsoladi e senza speranza. L’industria ecologica xe el caso in discusion. La xe oramai scaturida e in piena rota. Se fa generatrici a vento, pani solari cristali e vetri ultra isolanti, tubatura che permeti de utilizar la temperatura ambiente dela tera a meno de cento metri de profondità per scaldar intieri vilagi, e miliaja de altri prodoti. Unnovo ciclo, auto-suficiente xe nato dela situazion nela quale se trovemo. El fututo, no solo per noi e i nostri nipoti ma per generazioni a seguirne xe ala portada de man. Basta ciaparlo e corer. Carpe diem, come che diseva mio nono Nane.
Domande, discusioni anche vivacisime su sto tema me intereseria sai, perchè el futuro del mondo xe el futuro dela mia familia, nazion e tera.
Arnie