Baba Triestina ga ragion co’ la disi che chi che manca tanto de Trieste e la vedi come che, almeno in parte, xe stada restaurada zitavecia, no la riconoseria. Specialmente par un come mi che pasava ogni giorno par de là, xe ‘sai caligo (difficile) imaginarse che quele case una volta iera tuguri, lupanari (parchè no poso scriver el vocabolo triestin original? che diferenza fa veder la parola par talian?) e adeso in quele strade (via dele Mura, in via Cavazeni) xe adiritura un albergo. Via Capiteli, via Fortino, via del Sale e teceta (et cetera) iera par mi putel strade proibide. I dicioto ani li go fati a guera finida, ma a guera finida iera anca grave moverse e cusì più de tanto no le conoso. De giorno lavoravo e de sera iera scuro. E po co’ se ‘ndava in quele strade, no se ‘ndava per amirar el stile dele case ma per altri motivi ‘sai più prosaici. Se 'ndava pa' le case. Adeso bisognaria veramente vignir par almeno una setimana e girar. Portà a spala o zucà in careto, parchè dopo un’ora che camino le gambe me fa iacomo (non mi tengono) e me toca clofarme (devo sedermi). Se penso a Sporcavila. Quela volta la iera veramente sporca. El gheto vizin la cesa del Rosario me lo ricordo par modo de dir, parchè gavevo sì e no sie (sei) ani. Più tardi andavo in quela libreria che vendeva anca libri de scola veci. Chi che pasava la clase, el coreva subito a vender i libri e a crompar quei novi, anca lori usai. Mi go ancora el Campanini-Carboni del 1942. Do pasi più avanti, dopo la cesa verso piaza Grande, iera sula sinistra un palazo de do piani, un porton de piera. El palazo esisti ancora, ma la gente che ghe stava sesanta ani fa no la sta più. Gnanca i eredi. El palazo xe piturà un poco, ma no go capì a cosa ch’el servi.
Baba Triestina ga scrito: Naturalmente, visto che i triestini rugna sempre, qua i ga avudo de ridir sula strica de piera bianca in mezo: No se ga mai fato cussì, una volta no iera ... cossa xe sta novità?
Par conto mio quele striche bianche in mezo xe de ‘iuto a chi che un poco s’cincà (brillo, ha bevuto un bicchiere di troppo) el devi ciapar la mira par caminar drito inveze de rondolarse pai muri. E po, caminando sule striche bianche, se finisi direttamente in Cavana o in bar o in spaceto (rivendita vini e liquori).
![cheezy_298 :cheezy_298:](./images/smilies/cheezy_298.gif)