Baba Triestina scrivi volutamente evitando termini che nisun dopra più e Giulia scorcolana no la parla el dialeto de su nono, parchè più de un no capiria. ‘lora mi son l’unico a parlar el dialeto del nono (ano 1859) e del papà (ano 1893) parchè go ‘vudo la fortuna (o la sfortuna?) de no viver a Trieste. Manco de l’agosto 1953. Saria un poco come in quel film indove che’l mato xe sta meso in frigorifero e tirà fora zento ani più tardi. De l’arco e frecia ala bomba atomica. Tra l’altro no savaria gnanca parlar intun dialeto diverso. No sarà de sicuro atrieste che podarà salvar el dialeto, ma almeno noi dovesimo sforzarse de tignir duro evitando parole no triestine. Nini Neridola ga za paura de ciapar clanfa de mi!
No se pol (os’cia, ma dove go za sentì sta parola?) parlar mal dela gente che storpia el dialeto cascando intel medesimo sbalio. Se qualchedun no capisi, che’l domandi. Domandare xe lecito e rispondere xe cortesia, se diseva ai mii tempi. No i vien fucilai e noi semo sempre pronti a spiegarghe tuto. Mi spando (esagero) e meto in zerti casi in parentesi la traduzion per i foresti. Fè anca voi compagno (la stessa cosa). Copiando i lanfur se dovaria far una specie de asociazion par la cura del dialeto. Forsi se trova qualchedun che non vol eser forumista, ma saria disposto de ‘iutar in questo senso. Se, come credi Giulia scorcolana, che el dialeto saria un poco volgare, mi no credo che la gente se scandalizaria. No bisognar spander cole parolaze, ma se ocori bisogna sacrificarse e dirle. Certe espresioni del dialeto le xe curte ma le disi tuto. Provè a tradur par talian do parole: Ciò, pompa! [Una proposta: Signore, sia così cortese e se ne vada.] Opur: Magnime! [Signore, la prego di lasciarmi in pace!] Ocoreria meza pagina. Ma, sbaliare xe lecito, me par che anca Dante scriveva in volgare e i ga publicà le sue robe. Mi dago el bon esempio. Come diseva una volta un? Se avanzo seguitemi!
... a proprio ris'cio e pericolo ;-D
