Co‘ vedo foto de Va‘ Rosandra divento de novo giovine. L’ultima volta devo eser sta in otobre 2012, ma forsi due o tre ani prima, anca in otobre. Ierimo a Trieste con fia (e familia) e semo ‘ndai a Piran. Tornando semo pasai par Štanjel (San Daniele del Carso) e po par Bolunz. Mia fia me portà al rifugio: un Merlot, una o do trapete, una de parsuto crudo. De putel, mulo e mulon iero diverse volte a l’ano là e del rifugio se partiva par ‘ndar a rampigar o anca solo a caminar, sul monte. Mio fradel (clase 1921) iera alievo de Comici e mi iero Ciancele picio. Go conosudo tuti i amici e compagni de mio fradel (Comici no), e tra de lori anca Berto Pacifico. Se daimo tuti del ti e el picio me xe restà anca dopo la guera, co’ iero più alto de tuti. Nel 1947/1948 me go trovà qualche volta a Va’ Rosandra con Berto e go rampigà con lu. Errare humanum est, ma credo de gaver fato qualche paretina de terzo grado anca in libera. De solito ligà come un salame. Ma rampigar iera par mi el quarto sport, dopo atletica legera, bicicleta, nudar. Una volta go incomincià una parete de quarto grado, ma solo incomincià. Nel ’48 mio fradel se ga sposà, mi go trovà lavor in uficio, con tante ore straordinarie, e a mi e a mio fradel ne ga mancà el tempo per le gite a pie. Nel 1953 son vignù in Germania, in pianura. Xe qualche montisel de 800 metri, ma senza scoi (rocce). A una 30 chilometri xe una parete, ma una sola, alta circa 20 metri e longa una trentina. Solo de note te pol rampigar, parchè de giorno xe batù (fila di gente per arrampicare).
Quando vignivo in ferie a trovar i mii, fin che mio papà iera vivo andaimo in barca. Dopo che go crompà la machina, son ‘ndà con mio papà (e naturalmente la putela) in auto a Bolunz, ma scarpe base, no clonzi. Insoma solo par l’otavo e un sanduic. El 1. magio del 1991 iero con mio cugin e cugina, anca a cior un giardineto. Ma la cugina coi tachi alti, a spilo. Con mia fia, la iera ancora puta (nubile), son ‘ndà a Botazo. E anca cola putela. Ma solo a magnar e bever. Al ritorno ala ceseta. Scusè se no parlo altro che de Bolunz, roce e rifugio. Ma savè indove che bati la lingua.
Sarò masochista, ma speto altre foto de Bolunz.
