Parigi

[babatriestina]

ancora un do tocheti egiziani: un faraon de epoca tarda ( Taharqa?) che ghe fa oferte a un dio

e un trittico de oro anca de epoca tarda

Nela più parte dele sale ghe xe sedie o adirittura canapè e dei carteloni de plastica in diverse lingue che spiega cossa che xe là o la storia dela raccolta: po copie de sti fogli se le pol cior ala libreria del museo ( e mi li go ciolti tuti quei che iera disponibili) cussì co torno me e legio e me ricordo.
Andemo adesso ala sezion medioriental, che xe una dele mie preferite: sempre primo pian:
questo xe Gudea,


un re mesopotamico che se ga fato ritrar su tante statue nere, in quela zona ghe xe anche la stele col codice de Hammurabi, sigilli sumeri, rilievi de Khorsabad..

[babatriestina]

sempre in zona mesopotamica
un arcier a caval assiro

un vaso preistorico iranian

e due bassorilievi , el primo o babilonese o persian, el secondo xe el fregio dei arcieri del palazzo de re Dario

[babatriestina]

Sezion greco romana:
per mi resta sempre tanto suggestiva la Nike de Samotracia, in cima a un scalon, che ga a destra la porta verso la sezion pittura: una volta questo iera el vecio ingresso principal del museo del Louvre:

l'altro toco famoso xe sempre la Venere di Milo

ma la ga sempre meno amiratori dela Gioconda, ma anche sta testa de Venere per mi no xe de butar via

[babatriestina]

Statue e statuette grego romane no manca, se statue greghe le più antiche ( ma per mi istesso bele) i le ga relegade in scantinato, ma per mi la Hera de Samo xe bela istesso, anca senza testa

po xe un per de tochi ( poco) del fregio del Partenon: le Ergastine

una statuetta dele Tre Grazie, de notar anca la sala, xe la Sala dela cariatidi, una dele antiche sale dei tempi del Cinquecento

[babatriestina]

altre statue romane xe in apartamenti al primo pian che xe stai abitai dele regine de Francia prima che le se stabilissi a Versailles, nel seicento
ecco una testa de dama romana, podessi esser Messalina

e po Antinoo, el favorito de Adriano: che bel mulo!!

al secondo pian xe invece opere pice, un tesoro de oggetti de argento ( el tesoro de Boscoreale, statue e statuette de bronzo e la collezion de vasi greghi:
un vaso arcaico corinzio, la cosidetta Oinoche Lévy, piuttosto mossa come forma e come disegno

e una coppa attica con una coppia in fraia, scena de banchetto

[babatriestina]

Oggetti de arte: la sezion che più me ga colpido la prima volta che son stada al Louvre, perchè no me spettavo: ghe xe adirittura camere complete ricostruide, quela volta i gaveva ricostruido la camera de letto dei re al Louvre,a desso no la xe, mi quela volta me pareva come de entrar nela scena dei tre Moschettieri..

ma ecove una camera rinascimental

de l'altra parte, nei ultimi anni i ga restaurado i appartamenti del epoca Napoleone III

ghe xe anche tanti arazzi, un salon enorme con arazzi rinascimentali ( le cacce de Massimiliano) e po questo, che xe su carton de Raffaello: i arazzi completi e i cartoni-modello se trova, no mericordo ben dove un e l'altro, uno in Vatican e l'altro in Inghilterra, se no sbaglio al Victoria and Albert Museum de Londra

( spero de no noiarve e de no farla tropo longa, ma el Louvre xe enorme e volevo darve un'idea dela varietà de roba che ghe xe dentro!)

[babatriestina]

Oggettini de arte medieval: madonne de avorio, de argento, crocifissi de piere dure, avori bizantini....
ecove qua una cassettina-reliquiario de smalti de Limoges, cola imagine (sotto) del assassinio de Tommaso Becket ( quel del opera Assassinio nella cattefrale de Pizzetti e del film Becket e il suo re, ve ricordè? con Peter O'Toole e Richard Burton)

una corona con pietre preziose

una vetrata gotica

curiosamente, se leggi Blasius, san Biagio anche qua

[babatriestina]

adesso arivemo dove che sto anno i ga proibido de fotografar: la Galerie d'Apollon, riaverta l'anno scorso dopo anni e anni de restauri, coi tesori della corona:

molte corone xe stade rifatte o ga piere finte, ma altri gioielli xe veri: la corona davanti xe original de l'imperatice Eugenia

po xe i gioelli de l'ultima regina Amalia la moglie de Luigi Filppo, i xe arivai de recente, fin pochi anni fa li portva la Contessa de Parigi

[babatriestina]

xe arivada anche de recente la collana de smeraldi de Maria Luisa, la seconda moglie de Napoleon

ma anche sta picia aquila, in un a vetrinetta a parte, no xe de butar via..

questo invece xe fotografabile, e xe el collar del ordine de S Spirito , una version recente, però, dei ultimi cavalieri ottocenteschi

ancora diamanti reali:
una spilla con diamanti del sette-ottocento

e se la corona xe interessante, ma no se sa con quante pietre vere, el diamante sotto xe un famosissimo, el Sancy

[babatriestina]

ancora un per de oggettini de arte: l'elmo de parata de re Carlo IX ( quel dela strage dei Ugonotti, fin del Cinquecento)

ghe xe anche una magnifica colezion de piatti e maioliche italiane, ma con luce bassa, difficili de fotografar.
Ve metto invece questo, che par un normal vasetto de ceramica bianco e blu, ma i ga un valor storici: le la cosiddetta porcellana dei Medici, nel Cinquecento a Firenze i ga cominciado a far le prime prove de crear porcellana come che alor fazeva solo i Cinesi, po in Italia i ga molado e i ga ricominciado nel settecento in germania e po in Francia: de questi xe pochissimi tochi restai e xe ancora una porcellana un poco strana


Ben, arivemo finalmente ala pittura!!
la volè la Gioconda? ben, no se la pol fotografar, gnanca co se podeva far foto dei quadri dela Grande Galerie, ma per darve un'idea de dove che la iera e dove che la xe, go un per de foto de lontan e dela massa de gente che fa la ressa davanti:
qua le xe come fin do anni fa

[babatriestina]

Adesso la Gioconda i la ga rimessa nella salle des états, come che la iera una volta, la genta fa la fila davanti e gnanca no ghe dà bado ai magnifici Tiziano e Veronese che ghe xe intorno

( la Gioconda xe in fondo dela sala)
Ghe xe anche el Concerto campestre de Giorgione, che una volta i diseva che iera de Tiziano, e nissun gnanche lo nota

e nela Grande Gallerie xe el mio quadro preferito del Louvre, el ritratto de Baldassar Castiglione de Raffaello ( ma sti giorni nol iera esposto, e no i ga savudo dirme perchè)

( go scoperto dopo che el iera in prestito a una mostra..)

[babatriestina]

La Grande Galerie xe piena de capolavori, e anche una saletta lateral piena de autori italiani:
ecove la porta de comunicazion fra le due: in alto xe una lunetta de Raffaello e drio se vedi una Madonna de Mantegna
(no so se se capissi, ma mi me piasi Raffaello più che Leonardo e Michelangelo)

ma nella galleria se trova de tutto, po verso la fin adirittura una saletta de icone bizantine e russe ( la go trovada per la prima volta sto anno,s conta fra pitture spagnole)
ecco un'annunciazion de scola italiana del tre quattrocento ( Bernardo Daddi?), una cosa rara con due angeli invece de un come al solito


inveze al secondo pian xe i quadri dei cosiddetti piccoli formati, xe molto meno gente e se pol fotografar come che se vol ( fin che la dura)
e no che manchi i capolavori: ecove una Betsabea de Rembrandt

( un poco cellulitica come i baboni nudi del Seicento..)

[babatriestina]

Semo verso la fin dele pitture:
una dama de Goya, con magnifiche sfumature de grigio

po una odalisca de Ingres ( e arivemo al ottocento)

questo qua inveze xe un particolar de un quadro de Claude Lorrain , pittor francese d el seicento che loro ghe tien tanto, come al loro Poussin, mi no trovo che sia po tanto speciale, ma el ga dei cocoli paesaggi e dele bele luci al tramonto,c ome questa. lori disi che questi, come i fiamminghi del 600, ga preparado la stada ai paesaggi dei impressionisti

i quadri del Louvre, salvo qualche donazion, no ariva ai impressionisti e post, che xe a Orsay, ma ghe xe qualche roba del Otocento interessante, ecove un romantico Delacroix con guerrieri
[

[babatriestina]

Ecove ancora due Corot, autor che al Louvre me se ga rivelado: dapprima un monaco, che gavevo visto un simile ancora più bel a Ferrara, ma iera de una collezion privata

e un particolar de un paesaggio roman, sempre de Corot ( prima metà del 800)


Lasso perder, anche se la xe molto ricca, ma per mi meno interessante, la sezion de scultura francese e anche per brevità quella non francese, anche se ghe xe due Prigioni de Michelangelo ( ma i xe più bei a Firenze) .

Concludo cola sezion sconta, fora de man, de opere non europee:
una bellissima testa de bronzo africana ( Benin?)

e una testa tipo quele del Isola de Pasqua

[Nona Picia]

Grazie Betta, veramente splendido, anche Stefi le ga guardade con mi e la ga aprezzà (sopretuto i gioielli delle regine).
Ciao ciao

[babatriestina]

Dopo che ZoomCulex ga postado i fanai triestini, girando per Parigi me go messo anche mi a vardar i fanai, e in fondo, zerti de più o meno de l'epoca dei nostri e li go fotografai, per far un confronto.
quindi a voi
i fanai parigini
Comincio coi classici, i più visti nele foto, in place de la Concorde


questi i li ga piturai e dorai nei ultimi anni, le prime volte no i gaveva tuti sti color. ecolo de notte

eco un altro, sempre nela stessa piazza

[

[babatriestina]

questi xe in zona fra la Gare S Lazare e Montmartre, xe una zona descritta spesso in alcuni romanzi de Simenon con Maigret
[

adesso arivemo a quei che xe i mii prediletti, i fanai del Pont Alexandre III, i xe liberty e i vetri ga la forma che una capa santa

[babatriestina]

ancora, del medesimo ponte

[babatriestina]

in zona Opéra ghe xe diversi fanai notevoli: un per xe sostegnui de babe nude de bronzo, un poco come che doveva esser Tinza e Marianza davanti al Municipio

e le lampade là davanti xe a forma de strumento musical

eco una impizzada dentro

[babatriestina]

altri fanai, un poco sparsi: ancora un in zona Opéra, a forma de silhouette de nave

ancora zona Opéra

uno più liberty, ai Champs Elysées