Sergio Pirnetti

[babatriestina]

Xe morto oggi ( o almeno xe l'avviso oggi) Sergio Pirnetti, professor e poeta.
El iera professor de italian al Dante, e el ga scritto diversi libri, in prosa e poesia.
In prosa, La croda bianca, ripubblicado anche dela Vivalda nella collana de montagna, una storia dele ascensioni de una immaginaria montagna che xe un poco el simbolo dela storia del alpinismo ( Pirnetti xe stado alpinista in gioventù, me par) e po diversi libri de poesia dialettali, raccolte in un suo Canzoniere, divise in Nuvoli, Borin de marzo, Fiori nostri, La lampara, Lori e noi. Trieste e le sue stagioni, Cussì per strada, Tra ombra e sol.
Po ghe xe un Tassei de Carso che mi go leto e riletto, e un Brontolade de mi con mi. De sto ultimo ve riporto una breve poesia, sula sua età e me par bastanza atual ancora

SETANTACINQUESIMO

Za trequarti de secolo! go visto
tanti che pretendeva de cambiar
el mondo col "progresso";
e col "progresso" el mondo se cambiava,
ma restando listesso.

[AdlerTS]

Attuale, sì

[babatriestina]

Oggi sul Piccolo xe un articolo dedicado a Pirnetti, mi lo voio ricordar con un'altra poesia, la prima del raccolta nuvoli del 1968, che se no sbaglio xe la sua prima opera poetica ( in effetti, co andavo al Dante savevo che iera sto professor in sezion C ma nissun parlava de sue poesie). La go trovada de seconda man, cola firma del Autor.
Xe un che amava Trieste come noi e lo ga savudo esprimer col cuor

NUVOLI

Ogi mi volaria proprio sentarme
soto de Contovel su quel mureto;
là sento el Carso drio senza voltarme,
davanti go Trieste col suo mar.

Mar e monte: Trieste par un sogno;
e i mii ricordi come piturai
sul ciel i passa, nuvoli sfumai
che el vento po' finissi de disfar

[AdlerTS]

Non lo conossevo, ma capisso che jera una mancanza

[nanaia]

gnanche mi lo conossevo: no son una entusiasta de poesia, ma questa.....troppo troppo bela. Parole semplici ma che esprimi sentimenti veri:el xe quasi poeta e pittor tuto in un, no ve par?

[Nona Picia]

El ga descrito una bela sensazion che mi, senza saverla spiegar, go provà ani fa co iero a pranzo in un ristorante là soto.
Ciao ciao

[babatriestina]

A Draga S Elia, sula facciata dela locanda Mario ( ben nota ai gastronomi) xe murada questa placcheta de ceramica, za de anni

Xe una poesia che mi me ripeto spesso, co vado in giro per el Carso.