Il Corsaro

[Capuzi garbi]

Chisa` se xe qualchidun su sto forum, amante del'opera, che ga visto una produzion de Il Corsaro de Verdi.

Sto lavor gaveva avudo la prima al nostro Verdi, alora Teatro Novo, nel 1858 (o jera el 48?) e prontamente dimentica.

Ultimamente, nei ultimi 40 ani, ghe xe stade diverse mese in scena. Me intereseria saver el nome dei artisti usai, cita` dove che se ga visto el spetacolo e el vostro pensier sul la musica.

Ciau.

[babatriestina]

Mi sì, mi sì !!!
e gavevo anche la registrazion, ma su bobina , un vecio registartor che pos e ga roto e no go mai fato riparar!
I lo ga dado verso el 1970, me par che gavevo scritto su triestemia parlando dela Ricciarelli:
Direttor de orchestra, Carlo Franci, soprani, due:
La Ricciarelli come Medora, parte che la saveva ben perchè propio con un'aria de Medora ( Non so le tetre immagini) la gaveva visto un concorso in Tv dedicado ale voci verdiane , e Pippo Baudo iera ancora lontan..., inveze Gulnara iera la Gulin, un voson fortissimo ( adesso me par che canti la fia). tenor, Casellato Lamberti, onesto, baritono Mario Sereni che me ga un poco deluso perchè la sua vose xe più bela in disco che dal vero, del vero la me pareva come dir opaca. messa in scena onesta, bei costumi ottocentesche che ve posso postar perchè i li gaveva riprodotti sul radiocorriere che gavevo salvado.

L'opera? per mi, Verdi xe tuto bel e mi el primo Verdi me piasi, se me domandè i punti salienti, xe bellissima l'aria de Medora del primo atto , el tenor ga un'aria inizial che no disi ssai, la cabaletta xe za un presagio de come che sarà la Pira, col Allarmi final, el baritono ga un'aria sui osmani , molto suggestivo xe el duetto del carcere, che però me ricordo che al verdi ga ciapado pochi applausi perchè i ga cambiado scena e la gente credeva che continuassi, un cocolo terzetto finale tipo barcarola.. te basta?

[Capuzi garbi]

Me basta?

Co se parla de Verdi no me basta mai!! Grazie per el contributo. Me imaginavo che se qualchidun gaveva visto sto lavor, quel qualchidun saria stada ti. A mi me piasi 'ssai el toco del tenor del primo atto, ma quel che me piasi piu` de tutto xe la scena del secondo quando che Corrado xe afto prigionier e le vosi de Gulnara, Corrado, Seid, Gianni e el coro se alza proprio come in un dei grandi asieme che troveremo dopo in lavori come l'Ernani e'l Don Carlos.

Scoltando atentamente la musica par de sentir sembianze del "maturo" Verdi con melodie che ga de Macbeth, Traviata, Rigoletto, Trovatore come che te ga dito.....Un lavor bellissimo che meriteria de sentirlo piu` spesso.

Interessante quel che te disi de Mario Sereni: Mi lo go (su disco) nela Chenier de Corelli e altri lavori, prevalentemente verdiani. Me piasi la sua vose ma la trovo poco voluminosa.

Un'ultima domanda: Come gaveva reagi`, generalmente, el publico co i gaveva anunzia` che i montava su sto Corsaro, che imagino no jera tanto ben conossuso?

Te ga forsi anche visto el Stiffelio?

[babatriestina]

Dopo che te gavevo risposto, efetivamente me son ricordada del bel concertato del secondo atto, col coro delle babe del harem ( salvade) che intercedi per el corsaro
Sereni mi lo gavevo sentido per la prima volta per radio in Ernani ( Carlo V) e el me gaveva piasso molto per la bella dizion, coma dir , la chiara accentuazion.. la sola volta in teatro lo go trovado un poco no esilin de vose, ma poco squillante.
El pubblico? difficile dir cossa che disi el pubblico... po almeno una volta el pubblico del Verdi cambiava a seconda del turno.. ale prime e spesso de sera i iera più freddini, po le diurne dela domenica se scaldava molto de più. Una volta in occasion de una Norma cola Deutekom i ga applaudido Casta Diva dopo la cabaletta ma no dopo l'aria, me par anca corretto, ma de Banfield che iera stado drio le quinte me diseva che soprano iera restada mal . A volte un applauso in principio de opera pol incoraggiar i cantanti a dar el meo.
Per el Stiffelio, sì, i lo ga dado un pochi de anni fa ( el Aroldo mai che mi sapio nel 900) e ghe iero, no me ricordo un spettacolo molto memorabile, ma forsi iero mi a no esser in forma, me ricordo una gran brava soprano , me sfuggi el nome, una grega che gaveva fatto un per de anni prima una bellissima Odabella in Attila, e che adesso va per la maggior, e dele scene moderne che se verzeva e serava, con una forma de crose .. un poco oppressive.
Come opera la me piasi meno del Corsaro, cocolo el preludio che par che sia stado scritto al Hotel de la Ville la notte prima o quasi, anche se con tutti quei ottoni, come che diseva un cattivo per la Giovanna d'Arco, par un poco scritto per la banda comunal de Busseto. Me lo poderia imaginar sonado dela banda dei Salesiani ala procession del Corpus Domini, quela de una volta . Anche quel lo gavevo imparado de un'edizion credo Rai registrada.

[Capuzi garbi]

De novo grazie per l'intervento. Al momento go de scampar via (devo andar a Melbourne, el terzo giorno in fila e no la xe finida ancora), ma me piaseria parlar qualcossa sul'Attila, un'altra opera che fin a bastanza recente no se sentiva mai. Grandissimo esempio del giovine Verdi.

Recentemente gavevo parla con un certo Stefano Fabris. Lui sona el corno nela orchestra dela Fenice a Venezia, e aparentemente la xe dada tanto de frequente in Italia ( co i riva a trovar un bon basso).

Se parlemo co rivo a casa sta sera.

L

[refolo]

Lucio...

Se te me permettera', scrivero' una critichetta, ma sempre dopo el 17 de
Novembre co te vedero', son curiosa de sentirte, l'ultima volta xe sta', solo co te fazevi le prove, ma anni fa'. Non gave' mai inciso? saria propensa de comprar, per un do' club Italo- Australiani, amanti del classico.

Maria aka refolo

[refolo]

scuse' !
El famoso Trio; per Soprano, Tenor ;Basso...
xe canta' in Ciesa de ferequente, ma adattado al Sacro Rito, cioe' con parole Sacre.
Xe cava' dal momento che Odabella vol copar Attila, suo futuro mari'.
Devo cercar el disco delle sacre arie, almeno quella version la xe in Latin
e non nella ingua Inglese.


Maria aka refolo

[babatriestina]

Attila una volta no se cantava quasi mai, ma efettivamente nei ultimi anni el xe un poco tornado de moda. Ma del tuto sparido nol iera, se mia nona, forsi perchè la gaveva un nipote che se ciamava Ezio, la se ricordava un Finchè d'Ezio -rimane la spada
Al Verdi lo go visto la prima volta nel 1966, inaugurazion dela stagion lirica, protagonista Boris Christoff. No una version molto filologica ( qualche parola iera stada adattada) me comunque bela. esisti un per de edizioni in disco no mal.
L'ultima volta iera una decina de anni fa, al Verdi, con sta soprano grega che no me viene el nome, ma molto brava, senza confronto con quela dela precedente edizion, la tecnica xe decisamente migliorada e la ciapava i acuti e le fiorettature dell'aria del primo atto come se gnente fussi ( esisti per mi insuperabile de quell'aria una vecia interpretazion dela Sutherland) e basso se no sbaglio iera Furlanetto, anche bravo. No me ricordo el tenor, se vedi che el iera meno memorabile.
Credo che una città che ghe piasi dar el Attila sia Venezia, che me par che sia stado dado là alla prima, anche perchè el secondo quadro del primo atto xe i profughi de Aquileia che se ritrova a fondar Venezia e la cabaletta del tenor xe un mix fra risorgimento e allusion alla fenice:

Cara Patria già madre e reina
.......
Ma dall'alghe di questi marosi
qual risorta fenice novella
rivivrai più superba più bella
della terra dell'onde stupor

( cito a memoria)
Per Maria: go presente el terzetto final che te disi, no savevo che i ga adattado per cesa, se te ga testo latin te me pol postar che forsi arivo a tradur

[refolo]

Posso assicurar quel che digo, xe anche scritto nel dizionario mio delle opere, ma pena trovo el disco te mando volentieri, anche perche' finalmente la Ciesa ga' deciso de riportar la lingua Latina per le messe, qua' te giuro che non rivo nianche a pregar el Padre Nostro, me sento a disagio, e vien fora come al tempo dell'Inquisizion....a tipo comando.

per la soprano Grega, per par che iera la Elena Sulliotis.

Maria aka refolo

[refolo]

Un piccolo misspelling;

Elena Souliotis....a Trieste la ga' debuta' con la Luisa Miller, e dopo la Forza del Destino.
mi la go' nella Macbeth Con Pavarotti-Fischer Dieskau Nicolai Ghiaurov
CON LA LONDON PHILARM. ORCH. (Lamberto Gadelli)

per Attila, go' l'originale, cioe' prima vera edizione in Stereophonic and first completed:
Con la Cristina Deutekom-Ruggero Raimondi Sherril Milnes-Carlo Bergondi
stesso Lamberto Gardelli ma Royal Philarm.Orchestra.

La famosa version per la Ciesa, credo che la se ciama el Flagello di Dio.
Ma dame tempo che trovo sto disco.

La terza delle Opere (iera un anno de recording, per le opere poco conossude. Parlo per l'Australia.)

Berlioz; I Troiani- con Vickers and Josephine Veasay

Verdi; I Lombardi alla Prima Crociata Con Raimondi Placido Domingo e sta Cristina Deutekom, bravissima ma me da' de freddo come el suo cognome.

Maria aka refolo

[babatriestina]

te giuro che non rivo nianche a pregar el Padre Nostro, me sento a disagioper la soprano Grega, per par che iera la Elena Sulliotis.

mi el Paternoster lo prego ancora in latin, che tanto penso che Sioriddio el lain no se lo ga dimenticado!
per la soprano, no, no parlo dela Suliotis, questa che digo mi xe oltre una generazion più giovine, la Suliotis xe morta uno o od anni fa e questa xe in piena carriera..
La Suliotis mi iero al suo debutto in Luisa Miler, e gavevo anca la registrazion: grande aspettativa, e devo dir , bravetta. Po la ga dado forfait per una Norma, la ga stancado la vose e la xe finida in gnente, povera . Pecà. anche el ballo in Maschera la ga cantado al Verdi, con una scoladura Impero molto bella de veder.
Conosso quel Attila che te disi in disco, xe la prima edizion, quel che xe un poco loffia xe la direzion de Gardelli, fredda.. la Deutekom iera stupenda come Regina dela notte in Mozart, e Raimondi iera propio bravo come Attila. Il Flagello di Dio xe apunto el soranome da Attila.
Spetè che zerco, e ve dirò el nome dela cantante grega che tanto me ga piasso.
Go trovado, :Dimitra Theodossiou!
Ve riporto el comento che xe sul NG de musica classica, 2001 sula sua interpretazion de Odabella in una version dada a Firenze

La
vera sorpresa positiva è l' Odabella della Dimitra Theodossiu. Questa
giovane soprano che al sottoscritto ha suscitato non poche perplessità per i
troppi e troppo impegnativi ruoli, ha dato un'ottima prova. Anzituto perchè
affronta la parte con intelligenza, puntando più sul versante lirico che su
quello drammatico. Finalmente non la sento più spingere e cercare una
drammaticità vocale che non le appartiene (come fece nel Don Carlo e nel
Trovatore) . A dire il vero lo fa solo in pochi momenti , che sono appunto
i più discutibilii, come la fine del duetto col tenore dove mette una
puntatura di forza veramente brutta e che rovina la poesia di tutto il
duetto. Non ne capisco il perchè. La sua Odabella lirica, tecnicamente
mirabile, è bella e oggi forse la più bella disponibile sul triste panorama
di voci. Perchè allora infilarci citazioni drammatiche gratuite ? La
Theodossiu non è soprano drammatico di agilità. E' un lirico di agilità.
Finchè sta in questi parametri la sua Odabella è un lusso. Anche l'aria e
cabaletta iniziale viene risolta in modo ammirevole. Va anche bene quando
fraseggia ed accenta. Anzi, bravissima. Ma quando già si avvicina al lirico
spinto la costruzione fa qualche scricchiolio. Non a caso la Theodossiu
raggiunge a mio avviso la perfezione verdiana nei Masnadieri, opera scritta
per un soprano lirico di agilità, quasi di coloratura, che allora
furoreggiava a Londra: Jenny Linn. Insomma un' Odabella che mi ricorda più
la Giovanna d'Arco della Devia. Certo il ruolo richiederebbe altra pasta
vocale: Ma la Theodossiu comunque con tutte le riserve e le preoccupazioni
pe ril futuro passa a pieni voti anche in un confronto col passato

el link se volè tuta la discussion xe
http://groups.google.it/group/it.arti.m ... 056e8d6b1b
e el NG ve lo consiglio per la qualità dei partecipanti

[Capuzi garbi]

Attila una volta no se cantava quasi mai, ma efettivamente nei ultimi anni el xe un poco tornado de moda. ....Per Maria: go presente el terzetto final che te disi, no savevo che i ga adattado per cesa, se te ga testo latin te me pol postar che forsi arivo a tradur

Devi eser qualcossa che no capisso. Go 'pena fini` de scoltar l'Attila con, fra l'altro, el spartito ala man.

L' ultimo terzetto dell'opera xe canta` fra Ezio, Foresto e Odabella piu` el coro. No ghe xe la parte de basso, cioe` Attila.

Dopo de quel gavemo un quartetto fra i stessi tre personaggi piu` Attila e xe in sta sezion che Attila xe maza` (pura invenzion poetica). Questo xe segui` da un curtisimo coro de oto batude, dove che i romani riva finalmente a vinzer sui Unni i Ostrogoti e altri barbari.

Anche volendo, no capiria perche` e come che un volessi adattar questa musica per usi religiosi.

Mi piutosto dopreria, amesso che la Casa Ricordi me daria el permesso, el grande terzeto dei Lombardi, fra Oronte, Giselda e l'Eremita. Se trova ancora in giro una registrazion con Gigli, Rethberg e Pinza che xe una meraviglia, anche ciapando in considerazion i ani che sto toco jera stado registra`. In piu` el comincia una sezion de violin obligato che me porta in visibilio.

Ma per ultimo, go una meza idea che Verdi no daria mai el permesso che la cesa, indipendentemente dela denominazion, fazessi uso dela sua arte per ragioni religiose.

[babatriestina]

in efeti me vien in mente el quartetto final con Attila co i ghe disi de tutto, lui disi ma come,
Tu.. mia schiava, or mia sposa!
Tu fellon cui la vita ho donata
Tu Romano per Roma salvata
congiurate tuttor contro me?

e i mati ghe disi Sì, ma... e zo tuto quel che i la ga contro de lu
Se po i ga ciapado sta musica e i la ga fata per cesa mi no so, qua de noi no sicuro!
no credo comunque che gnente de Verdi dele nostre parti sia adattado a Cesa, oviamente salvo el Requiem o altri pezzi sacri.
E no dimentichemo che el meraviglioso va Pensiero xe ispirado de un altrettanto bel salmo Lungo i fiumi di Babilonia: Super flumina Babylonis

Per inciso, pura invenzion poetica, te disi?, ma no go a man la vita de Attila , me me par che po el xe stado copado, dopo che el xe andado via del Italia, par a tradimento de una baba... controllerò sta storia e po ve conto

[Capuzi garbi]

in efeti me vien in mente el quartetto final con Attila co i ghe disi de tutto, lui disi ma come,
Tu.. mia schiava, or mia sposa!
Tu fellon cui la vita ho donata
Tu Romano per Roma salvata
congiurate tuttor contro me?

e i mati ghe disi Sì, ma... e zo tuto quel che i la ga contro de lu.....
Per inciso, pura invenzion poetica, te disi?, ma no go a man la vita de Attila , me me par che po el xe stado copado, dopo che el xe andado via del Italia, par a tradimento de una baba... controllerò sta storia e po ve conto

Orpo, congratulazioni con la tua memoria. Me andaria 'ssai comodo ricordarme certe sezioni dela lirica come te fa ti!

Ghe go da una ociada atraverso Internet ala ragion dela morte de Attila: Invero, una legenda disi che el re unno xe sta maza`, pugnala` come nell'opera, de sua moglie. Altre ne conta fati diversi. Mah, mortus est....

El fato resta che la storia dell'opera, anche se basada su una persona real, xe sempre un lavor fitizio, adatado de Solera dala comedia de Werner.

Quel che me ga interesa` piu` che altro xe sta el leger che le suo corpo, el jera sta sepeli` nel leto de un fiume el cui traciato jera stado momentariamente cambia`. Me gaveva parso de rileger la poesia dela Tomba nel Busento, ....Ah, si presto, e dalla patria cosi` lungi avara riposo. Alarico i goti piangono, il gran morto di lor gente....

[refolo]

Se te gaveria l'opera ghe saria el libretto dentro, con tutte le parole,e personaggi.

Maria aka refolo

[Capuzi garbi]

Se te gaveria l'opera ghe saria el libretto dentro, con tutte le parole,e personaggi.

Maria aka refolo

L'opera la go, su disco (quel Philipis de circa 30 ani fa che menzione` un per de mesagi piu` sora), piu` la go su video con Samuel Ramey, Cheryl Studer e Giorgio Zancanaro e in'oltre go el spartito che stago imparando. Ma no posso ne scoltar, ne vardar quel che no esisti. Ghe xe diversi concertati dove che se trova Odabella, Attila e Foresto, ma mai solo lori tre. I xe sempre insieme a, o Ezio o Uldino o a Leone.

[refolo]

GOOD ON YOU!!!!!

uno che sa' tutto non domanda niente. Gavemo comincia' col Corsaro? son curiosa de sta' rappresentazion.

Maria aka refolo

[Capuzi garbi]

....uno che sa' tutto non domanda niente. Gavemo comincia' col Corsaro? son curiosa de sta' rappresentazion.

Maria aka refolo

Xe per questo che fazo domande e zerco de impapar quel che no so!

El Corsaro. in version de solo concerto. comincia sto altro venerdi` ala sala Melba, che fa parte dell'universita, de Melbourne. Solo tre rapresentazioni, e sara` interesante veder se un lavor che no xe mai stado fato prima in Australia, e raramente nel mondo (anzi, fin an nai 1960, nol jera stado fato per oltre 100ani), rivera` a ciamar un poco de publico.

I due soprani, Suzanne Donald e Suzanne Shakespeare xe magnifici, el baritono, Manfred Poulhenz, ecezional anche se un poco in
disciplina`, el tenor...uhm...vederemo come che'l se comporta. Xe ani che no'l canta in publico, e i gaveva tanta dificolta` a trovar un che sapi la parte o che la impari in tempo. La sala ga un'otima acustica. El direttor, Eric Fackert xe bravo e ben prepara`. L'orchestra composta prevalentemente de elementi giovini xe 'ssai afiatada.

[refolo]

Well.......

Se te rispondi cussi'? allora quando che nomino qualche altra opera perche' te dubiti?

go' i biglietti per el 17 del mese, solo quei de 34 dollari, el resto me pareva alquanto costoso.

Xe la mia serata de liberta' oltretutto al 18 xe el compleanno de mio nipote, e non ghe la fazo, go' gente a zena.

Maria aka refolo

[Capuzi garbi]

....go' i biglietti per el 17 del mese, solo quei de 34 dollari, el resto me pareva alquanto costoso....

Maria aka refolo

Xe tuto relativo a quel che costa per meter su una roba del genere. La sala ga de eser pagada. L'orchestra costa una fortuna, i cantanti no lo fa per niente e anche el coro ga dirito de almeno eser indeniza` dele spese...Certo che se un gavessi una bon aiuto finanziario del governo, tuto saria piu` facile.

Va ben che a mi personalmente no me costa niente. Vado, fazo quel che go de far ('ssai poco in sto caso), i me paga quel che i ga promesso e viva la e po bon, ma i diretori dela compagnia xe responsabili per pagar tuto quel che la roba costa: So che lori no ciapa nianche meza flica, anzi i riscia de eser fora de scarsela.

Vederemo come che la va.