Una piscina.... a Barcola!

[rofizal]

Questa xe una foto curiosa e interesante trata dal za citado libro "I 100 anni della S.G.T.".

Nela foto, del 1933, se vedi le nuotatrici Skerl, Ortolani, Toso e Sulligi, ma cosa le fa e dove le xe???

Ben, iera tempi pionieristici, e i alenamenti dela Società Ginnastica Triestina, per el nuoto, se svolgeva nel bagno alla Diga e poi, come se vedi in sta foto, in una piscina "artigianale" ricavada nel picolo porto de Barcola! Altro che ogi!

[Nona Picia]

Altri tempi!

[rofizal]

Ricostruendo i dati storici del nuoto triestino (vedi https://www.atrieste.eu/Forum3/viewtopic ... sc&start=0 ma no go ancora finido) se scopri che proprio da quei anni pionieristici xe vignuda fora la più grande squadra feminile de nuoto che Trieste gabi mai avudo!
(prima con la Ginastica e poi con la Triestina Nuoto)

Chisà se no ghe fosi stada poi la guera a interomper el periodo d'oro... Certo che ogi gavemo mega impianti ma... manca i atleti
MULI e MULE, DEVE DE FAR !! Fene ancora sognar...

[serenutis]

senza gnanche andar tropo indrio coi ani, cuando nudavo mi (parlo del 74-75 e dintorni) d'estate se alenavimo ala piscina de l'Ausonia, che za a l'epoca fazeva parecchio schifo...

[serenutis]

sempre parlando de campionesse de nuoto bisogna ricordar la Silvia Strukel (mia primissima insegnante de nuoto ala Bianchi), che dopo
esser stada primatista dei 100 e 200 rana (credo nel 35 o 36) xe diventada anche campionessa de scherma

[ffdt]

iera la mia maestra d'armi ... in te la sezion de scherma xe cualcosa su de ela anca con un link a 'l nuoto ... se te ga ricordi meti pur

[rofizal]

cuando nudavo mi (parlo del 74-75 e dintorni) d'estate se alenavimo ala piscina de l'Ausonia

Anche mi go fato, de muleto e diversi anni prima dei '70, una stagion a l'Ausonia con la Triestina Nuoto. Vasche su vasche (me par che iera circa un 50 al giorno, e de 50 metri l'una) e se trata de bei ricordi.
Doveva eser l'anno in cui iera purtropo morto quel mulo tufandose dal trampolin de cemento (5 o 10 metri, credo da quel de 10) e andando - soto acqua, sul fondo, in imersion - a sbater la testa contro un bidon rugine e roto, resto dei tempi dela guera.

Nostro gran divertimento, finidi i alenamenti, iera le zatere de legno, sule quali se divertiimo corendo da una parte a l'altra. Le zatere se inclinava e i meno bravi cascava in acqua (anni dopo i le ga tolte, forsi per paura che qualchedun se fazi mal). Altro divertimento el juke box del bareto che iera sula teraza, vizin ai anei (e ale funi o pertiche? no me ricordo), anche questi molto usadi. Dala stesa teraza anche se se tufava, visto che l'alteza iera diversa da quela dei trampolini.

I spogliatoi iera inveze pieni de buxi, dai quali se cercava de cucar le mule che se spoiava. Mule che in genere impicava i vestiti proprio davanti al buxo, per farne dispeto.

Sarà perché ierimo muli, ma l'Ausonia quela volta ne piaxeva sai. Poi de inverno se pasava ala piscina Bianchi. Ambiente più fredo, in tuti i sensi. Là go smeso per varie ragioni, una dele quali iera proprio che tremavo dal fredo.