Mi go da tanti anni con Tin, che adeso xe diventada Telecom. Cusì i vol pasar tuti soto Alice (che detesto, ma... ga za dito Snif...)
I me ga proposto Fastweb... merita do parole.
L'altro anno Fastweb me fa una proposta telefonica. Me sembra interesante. Bon me vien el mato in casa, me spiega... ghe digo che cambio se xe la linea a 20 mega... sì, sì, la xe... scrito sul contrato, firmado, ma tuto se ativerà co l'arivo del tecnico. Do giorni dopo me riva un SMS de lori che dixi che la linea de 20 mega no la xe. Alora niente, grazie.
Sto anno gaverò ricevudo un 20 telefonade Fastweb, roba de diventar mati.
Prima me telefona una con un certo preventivo, do giorni dopo un altro con preventivo diverso, e cusì via... A un certo punto no capiso più niente (poi scoprirò che no xe Fastweb che ciama, ma negozi o ufici vari che ga la rapresentanaza). Un preventivo me par comunque valido e ghe digo de sì. Dopo un pochi de giorni (e altre numerose telefonade de lori), me riva le carte de firmar... con prezi e condizioni completamente diverse!
Go ciapado e butado via. Inoltre co te ghe domandi se xe la linea a 20 mega, qualchedun dixi de sì, altri de no, altri no so... Ghe telefono ala Telecom e i me conferma che per la mia zona no, no la esisti! Forsi in setembre, forsi.
Dito tra parentesi, me son studiado el sito de Fastweb. Dopo un pochi de sforzi, son rivado a capir le varie tabele e i sconti aplicadi in quel momento (i cambia in continuazion). Naturalmente le proposte che me vigniva fate telefonicamente iera speso tra le più asurde.
Intanto vardando la sistuazion bancaria me acorzo che Fastweb ga za fato verzer 2 RID (le rimese direte de pagamento) sul mio conto, mai utilizade per fortuna. La fazo cancelar subito, ma me domando come i ga fato e che serietà sia questa, sia da parte de Fastweb che da parte dela Banca. Se sti mati i me gavesi carigado abusivamente dei pagamenti mai autorizadi, la banca li gavesi pagadi a mie spese.
Ala fine me domando in che paese o società vivemo, una specie de jungla, dove tuti pol far tuto senza controli....