Probabilmente ghe ne gaveimo parlado sul vecio sito - no ricordo e dovesi andar a veder su l'altro PC - ma me par che su questo nisun ga più ricordado che Paul Henreid, che nel film interpreta el famoso Victor Laszlo (nela foto xe el primo a sinistra), iera nato a Trieste.
Henreid, el cui nome completo iera Paul Georg Julius Hernreid Ritter von Wasse, nato el 10 gennaio 1908 (1905 secondo alcune fonti, saria de controlar) iera fio de un banchiere viennese. Atore e regista, se volè conoser la sua cariera ve consiglio Wikipedia (version inglese, su quela italiana ghe xe sai poco) : http://en.wikipedia.org/wiki/Paul_Henreid. Gaveva studiado comunque teatro a Vienna per poi trasferirse, nel 1935, in Gran Bretagna. Sucesivamente el va nei USA, otenindo la citadinanza americana nel 1946. El 29 marzo del 1992 el moriva a Santa Monica de polmonite. El xe sepelido al Woodlawn Cemetery de Santa Monica.
Da ricordar anche che el iera stado meso nela lista nera dei atori dala famigerata HUAC (House Committee on Un-American Activities, 1938–1975), quela asociazion americana de tipo maccartistico che dava la caccia ale streghe ma che poi per fortuna la xe sparida definitivamente (la gaveva meso nela lista nera anche Charlie Chaplin e dela sua comision el nome più noto iera, credo, Richard Nixon). Mi (no ste volermene) non amo i comunisti (come nisun tipo de ditatura e de violenza), ma devo dir che queste iniziative no ga molto de invidiar proprio a quei regimi che le se proponeva de combater. Come se podesi meter al bando, in un paese che se definiva democratico, gente come Leonard Bernstein, Aaron Copland, Alan Lomax, Pete Seeger, Artie Shaw, Orson Welles, Richard Attenborough, Luis Buñuel e Charles Chaplin, tanto per citar quachedun tra i nomi più noti, me lasa senza parole. Per fortuna quei tempi xe (spero) pasadi definitivamente. (se volè saverghene qualcosa de più : http://en.wikipedia.org/wiki/Hollywood_blacklist.
Tornando a Paul Henreid, no so quanti anni el gabi pasado nela nostra cità, credo almeno quei de l'infanzia e comunque el fato de eser nato da noi, su queste terre, lo poni tra i fioi de quela splendida Trieste miteleuropea.
)