In primavera e estate i morosi se ciama col verso ciff ciaff per cui i inglesi lo ciama, apunto, chiffchaff (e i tedeschi, che xe più ordinati, lo ciama zilp zalp). Mi chissà perché sto ciff ciaff me ga de sberle! Se vedi che i se le imprometi: "Se no te se meti con mi te dago due sberle ciff ciaff".
Comunque, in autuno, co 'l se cala dove che fa più caldo, per esempio qua de noi, e no 'l ga più de ciamar la morosa e i fumi in testa ghe se ga calmà, el fa un verso più semplice: uì e noi lo ciamemo luì, e sicome ghe ne xe più de un che se somiglia e questo qua el xe picio e no 'l creserà mai, lo ciamemo luì piccolo (mio parente insomma
).El nome scientifico xe Phylloscopus collybita, ma qualchedun lo scrivi philloscopus collibita per farla più facile.
La foto xe fata a metà de novembre sempre in via Testoni qua a Trieste, a due passi dal principio della camionale e del vecio palazeto dello sport de Chiarbola.
]El se movi come un mato, el salta de qua e de là continuamente e la foto xe un poco mossa perché el se stava scassando i due grani de sal che ghe go messo sulla coda per tegnirlo fermo là che 'l iera.
Comunque, anche se no la xe perfetta, sicome mi credo che no ghe ne vederò più, la meto lo stesso giusto per ricordar che no esisti solo i passeri.
