Cese catoliche: Santa Maria Maddalena - Basovizza

[sum culex]

Alcuni gioni fa xè comparso su 'Il Piccolo' un articolo sula cesa de Basovizza.
Iera diverso tempo che gavevo in animo de andar a butar l'ocio (più che l'ocio l'obietivo) e sto articolo me ga fato decider.
La cesa iera la più scura fra tute quele che go visità: no iera impizada gnanche mezza lampadina e le finestre de vetri colorai no fazeva passar che pochissima luce esterna. Per l'interno me dava col 2,8 circa mezo secondo de posa con 400 ISO, ma per i quadri anche da 2 a 3 secondi.
L'interno cola machina pozada sui stipiti de una porta go fato qualcossa, per i qudri no ga servì gnanche el lampo per via dela distanza: vol dir fortissima sotoesposizion. Go coreto come che podevo, ma con conseguente forte rumor de fondo. Nel mirin eletronico no se vedeva quasi gnente e iera tanto scuro che no funzionava gnanche l'autofocus. Col fogo manual gnente de far: go messo in fogo le finestre che iera ciare e go blocà el fogo su quela distanza e col PC go un poco coreto le sfogadure cola nitidezza, aumentando ancora el rumor de fondo. El cavaleto no lo porto che qualchedun no gabi qualcossa de dir: vedi qualche esperienza trascorsa.

Prima ve fazo un poca de storia coi dati ciolti zo dal'articolo del Piccolo, che ve go acenado prima e po' ve mostro le foto , pregandove de gaver comprension per le fotografo, perdonandoghe el risultato pitosto scadente e no sicuro al'altezza dei altri mii servizi.

In località Basovizza, soto el monte Concusso, za nel 1336 ghe iera una cappella cocstruida da un grupo de fedeli e dedicada a ant'Andrea Apostolo e a Santa maria Maddalena dal alora vescovo de Trieste Fra Pace da Vedano.
Nel archivio dela parochia se trova un manoscrito in cui xè riportada sta notizia, riferida ala trascizion de un documento del 26 aprile 1633, data in cui el vescovo Pompeo Coronini ga consacrado el novo altar dela cappella.
Diversi lavori de restauro xè stai eseguidi nel 1660 in cui xè stado ampliado l'atrio drio la faciata e costruì un campanileto a vela.
Nel 1785 vien fato un fonte batesimale.
Nel 1855 el comun de Trieste, che za gaveva contribuì ai restauri precedenti, decidi de costruir una cesa nova al posto dela cappella preesistente e ghe vien dado l'incarico de far el progeto al'ingegner Giuseppe Sforzi. Nel 1856 xè la posa dela prima piera e l'ano dopo, el 5 novembre, finidi i lavori, el vescovo Bartolomeo Legat benedisi con solenità la costruzion.
Tra el 1857 e el 1862 vien completada l'opera, sistemando una campana e nel 1858 vie messo sul campanil l'orologio.
Nel 1859 un artigian de Idria costruissi el pulpito de legno e l'anno dopo i confessionai.
Nel 1861 vien fato el novo altar magior de marmo.
El 27 luglio 1862 el vescovo consacra solennemente la cesa dedicandola a Santa Maria Maddalena.
No so ben cossa che significa sti passagi de categoria: nel 1785 la ceseta se staca dal vicariato de San Tommaso de Grozzana diventando cappelania, per diventar, nel 1864, curazia. La vien fata parochia nel 1892 diventando centro parochiale anche de Gropada e Padriciano.

La cesa xè a navata unica con un profondo un'abside pentagonale e la faciata a capanna. In alto un roson che ilumina la cantoria in cui se trova l'organo cocstruido nel 1868 dal dal brescian Giovanni Tonali. Le pareti interne xè decorade a tempera in tono su tono. Sul sofito bei afreschi come nel'abside.

Se l'amica babaTS, pol o vol zontar altri comenti sui afreschi, quadri, ecc., sarà, come al solito, graditissimi.

[sum culex]

Queste xè le foto.

L'esterno



I alberi scondi el campanil



La faciata

[sum culex]

El campanil tra i alberi



L'orologio segnava l'ora giusta

[sum culex]

D'estate no se gavessi podù far gran che per via dele foie






La decorazion sora la porta de ingrasso

[sum culex]

El roson che ilumina la cantoria



Semo entradi: note fonda!!! Go tignù la machina ferma sui stipiti dela porta



Con un poco de zoom

[sum culex]

Pozà su un banco



De qua in poi le foto originai iera notevolmente sotoesposte (no gavevo dove pozarme) e le ga rumor de fondo, ma questo xè tuto quel che posso ofrirve.
El sofito del'abside



L'organo e la cantoria col lampadario centrale

[sum culex]

I afreschi sul sofito del presbiterio

[sum culex]

I tre afreschi (uno ala volta) che xè sul sofito del'aula (= navata)

[sum culex]

L'altar magior






Iera ancora el presepio: perchè no farlo?

[sum culex]

Le tre vetrade dele finestre del'abside



Le vetrade dele sei finestre (tre per parte) ai lati dela navata

[sum culex]

[sum culex]

El pulpito de legno



In particolare

[sum culex]

I altari laterali

[sum culex]

Ai lati del presbiterio ghe xè sti due afreschi

[sum culex]

Un singolo quadro sora un confessional



Sul fondo del'aula due grandi tele simili a pale de altar



[

[sum culex]

Uscimo dal cesa: sul sagrato el monumento ai caduti contro el nazifascismo

[sum culex]

Davanti al monumento una fontana (suta) cola parvenza de una copa fata de tanti spighi con bassorilievi stilizai.



E in fianco la 'casa de Basovizza' (almeno credo)



E questo xè tuto.
Ancora una volta me scuso (go la zuca piena de zenere anche se no xè ancora 'le ceneri') per la qualità e per el rumor de fondo, ma no son sta in grado de far de meio.

ciao
zoom culex

[babatriestina]

ben bon , le immagini xe un compendio de catechismo, e chi che sa no gaverà dubbi a riconosserle, se ghe xe dubbi se pol sempre domandar. Mi comento un per de contenuti:
la madonna centrall del sufito l'Assunta, xe fortemente ispirada- per no dir copiada- a quela de Tiziano dei Frari de Venezia.
La più parte dele vetrate e immagini, xe la storia della Maddalena. interessante xe quela cola Maddalena e Cristo in tavola, no xe l'ultima cena come che se podessi pensar, ma una precedente a Betania che conta el vangelo: per quei che sula scia del Codice da Vinci credi che la Maddalena iera al ultima cena e ciapa per la Maddalena el apostolo Giovanni perchè el xe coi cavei longhi e xe senza barba, qua gavè veramente una cena cola Maddalena!
Se te vardi ben, in una delle vetrate- quela col figliol prodigo- ghe xe una scritta latina e la data, se te ne la copi podemo saver tutti de quando che le xe.
Uno dei altari podessi esser più antico, o el xe volutamente in stile antico, quel cola Madonna de Lourdes, legio difatti che el xe stado salvado dela vecia cesa seicentesca, sostituida del atual a metà ottocento.
Le finestre della navata central xe de una ditta de Venezia su disegno de Edi Zerial e le xe del 1991.
la Pietà e el crocefisso xe in stile barocco ma le xe del 1901. (informazioni del solito Cuscito)

Moti dei quadri ghe somiglia ai santini ottocenteschi ( la sacra Famiglia). no manca i santi Cirillo e Metodio.

[babatriestina]

no state preoccupar, che el rumor de fondo no se senti e la qualità xe ottima e esaustiva! ma de ti ormai no podemo spetarse de meno..

[Nona Picia]

E adesso con sta foto che go fato mi, ve podè un poco render conto de che ciaro che iera in cesa. Solo l'altar magior iera un poco (molto poco) iluminà.