Le ditte e i ufici che fazeva gran uso de corispondenza i ga avu' sempre el problema dei furti de francoboli da parte de dipendenti "infedeli". Un palliativo xe sta' quel della perforazion dei francobolli con la sigla della ditta (i cosidetti PERFIN). Altro problema iera la perdita de tempo: per zercar el francobolo giusto, stacarlo dal foglio, lecarlo e incolarlo sulla busta.
Alla fin i ga inventa' una macchineta che stampava una specie de francobolo con l'importo, un cerchio datario con localita' e data, ed eventualmente anche el nome del mitente o un disegno publicitario. Un contator scattava ogni volta che se stampava una impronta e totalizava l'importo; ala fin del mese se pagava alla posta el corispetivo.
Come al solito l'Italia xe rivada con quasi venti anni de ritardo rispetto ai altri e solo nel 1927 xe sta autoriza' l'uso de ste machinete. Le ga avudo subito una grande difusion, perche' le iera asai comode e permeteva anche de far publicita' praticamente agratis.
Questa situazion xe durada fino alla meta' dei anni '60, quando che i regolamenti postali ga avudo due modifiche:
- una limitazion alle dimensioni massime delle impronte, che ga ridotto la posibilita' de stampar bei disegni, slogan, ecc.
- una infame tassa sulla pubblicita', per cui iera permesso scriver nella targhetta solo el nome del proprietario e ogni altra roba doveva pagar un tanto.
El risultato xe sta' che de colpo in bianco tutte le belle impronte de una volta xe sparide dalla circolazion e le xe stade sostituite da quelle robe insulse che ancora ogi se vedi in giro.
Per fortuna un per de anni fa la tassa sulla pubblicita' xe stada abolida e adesso pian pian se comincia a veder de novo qualche bela targhetta.
