iera tanti parchi là, quel de Villa Ralli, Villa Ara, ma pian pianin tutti nei anni 50- 60 ga costruido condomini moderni salvando solo resti de parco. Questo qua dovessi esser restado abastanza intiero, anche se no so ben. co iero picia mi la vegniva ciamada villa Sordina, perchè la iera stada proprietà dei Conti Sordina, po la xe passada alle Contesse Helmreichen che la ga venduda i ultimi anni ala Cividin che qualche anno fa ga costruido appartamenti ma no dovessi aver snaturado el tuto.
Ve ne gavevo parlado tempo fa, ma volevo descriverla dei mii ricordi, che son stada invitada de picia; alcune fotografie de Benussi xe nel libro de Zubini su Scorcola
La villa xe in alto, e se ghe riva per una strada carrozzabile che passa sul lato sinistro, lungo el confin con el ex parco Ralli. Ghe xe due ingressi, un pedonal e un per macchine, mi entravo del pedonal, che iera l'abitazion del custode, o giardinier. Apena salidi iera un vecio pozzo e vizin alberi de susini, che boni che iera i susini ingrumai sul albero! po iera una rotonda con cipressi ( mama me insegnava i nomi dele piante) e un pra in pendenza, che a mi me pareva tanto grande, con ala base due grandi magnolie e ai lati allori, e in alto un altra cisterna, e una panca de metallo un poco ruzine che se sentava mama. A man destra iera un vial de tigli, che portava a un spiazzo sotto i tigli con un tavolo de piera, e de là se saliva verso le serre: el sentiero verso le serre iera coverto de un pergolato de uva, a sinistra orti e piante de taio, bulbose in primavera e un magnifico roseto de rose clasiche a grandi fiori a destra me par una vasca per acqua piovana tipo serbatoio. La serra tuta vetrada ( go ancora una piantina grassa che me ga regalado a suo tempo el giardinier) gaveva al ingresso un glicine profumatissimo.
La parte alta iera invece a giardin più formale tipo parterre de Miramar, con scale de piera, aiole contornade de bossi e cespugli topiari, e davanti del ingresso una vschetta circolar cola fontanella e una statua de piera..
