Mio papà gaveva un amico che de mestier ligava libri. Un giorno, per ringraziar mio papà de una cortesia che el ghe gaveva fato, el se ga fato dar el messalin che mio papà doprava alla domenica e el ghe lo ga rilegà de novo. Ier un messalin del 1940 e la rilegatura el la ga fata alla fine dei anni 50. Lo go trova in sti giorni e son restà ancora incantà.
Tutto in pelle, dorso e copertina, un unico toco de pelle.
Ma la roba più interessante xe come che el ga fato le copertine. Su una tela el ga incolà delle strichete de carton e sora el ghe ga incollà la pelle, battendola ben per farla aderir perfettamente (no steme domandar come, no saveria)
El ga fato vegnir fora, in sto modo, una copertina rigida per lungo, ma flessibile per traverso e verzer el libro xe un piazer.
No go mai visto de un'altra parte un lavor del genere che credo sia de grande abilità e pazienza (forsi babatriestina che ga più esperienza de libri veci me pol confermar). Me pareva cocolo mostrarvelo e ricordar cusì sto amico de mio papà e la sua bravura.
