Ricordi d'Africa

[rofizal]

Savemo tuti che l'Italia fascista gaveva fato le guere coloniali (in ritardo rispeto al resto de l'Europa), per conquistar l'Abissinia. No xe robe de cui me piasi parlar, perché son contrario al colonialismo (e chi no lo xe ogi?), ma quela volta tute le nazioni ocidentali gaveva colonie (e qualcheduna ga ancora).

Bon, indiferente. Volevo solo proporve questo interesante documento. Xe un semplice biglieto de invito (credo) ma. datado 1933 (cioè prima dela guera de conquista italiana), el xe intestado a Ras Desta Damto (i inglesi i lo ciama Ras Desta Damtew). Questi iera un nobile etiope, genero de Haile Sellassie. Nato a Maskan nel 1898, gaveva sposado la fia magiore de l'Imperatore, la Principessa Tenagnework, nel 1924, gavendo 4 figlie e 2 figli.
Al comando dele trupe etiopi, xe stado sconfito da Rodolfo Graziani nela bataglia de Ganale Dorya, nel genaio 1936. Dopo una valorosa e lunga resistenza, diversi mesi dopo el iera stado caturado e uciso nel 1937.

Quindi se pol dir che questo documento apartiniva ad un eroe etiopico.

Cosa ghe entra con Trieste? Beh, ghe xe stadi molti triestini coinvolti in quela guera (mentre la magioranza dei italiani donava i anei de matrimonio per sostinirla).