inconfondibile acento...

[Franco]

Gavè fato caso che el triestin, per quanto che el lavi le straze in Arno, ghe resta sempre un inconfondibile acento? Un poco le vocali verte come scafe, un poco no so cossa, ma el triestin te lo riconossi sempre anche se el parla in lingua...

Me ricordo che tanti ani fa, per television, ghe iera un programa: "io confesso".
La gente parlava drio un paravento, se vedeva solo el profilo camufato, la vose vegniva trucada elettronicamente... e la gente confesava un poco de tuto: ghe iera chi confesava de aver cinque amanti, chi gaveva una dopia vita, due famiglie e sei fioi da 20 ani e nissun saveva gnente, e umanità varia...

Una volta ghe iera una tipa che confesava de eser del Animal Liberation Front, e che la gaveva fato dei raid per liberar bestie da pelicia dai alevamenti... come che la gà verto boca, anche col trucavoce eletronico, mi gò pensà "'sta qua xè triestina!".
E infati qualche giorno dopo la iera sul giornal, perchè anche i polizioti se gaveva acorto e i la gà riconossuda...

O anche la cantante Elisa (va be, la xè bisiaca, e no triestina... ma da 'sto punto de vista cambia poco!). Brava, bravisima, la me piasi tanto ma... gavè fato caso in "luce (tramonti a nordest)"?
I ghe gaverà fato far mesi de corsi de dizion, epur l'acento salta faro (po' xè belisimo quando che che ghe xè el verso "Il respiro non mente / In tanto dolore / Niente di sbagliato / Niente, niente..."

Bon, el primo "niente" la pronuncia coretamente "niente", ma el secondo e el terzo la disi indubiamente "gnente"!!!
(se volè scoltar: http://it.youtube.com/watch?v=hGuOp7mIn_g )

Gavè altri esempi del genere?

[Coce]

Franco, nela magior parte dei casi son d'acordo con ti, ma no sempre perche' mi go incontra' dele persone triestine che le xe capaci de parlar con un perfetto accento dela lingua Italiana e che a meno no i te disi de dove che i vien no te se inacorzi. Credo che dipendi in larga misura del livel colturale dela personae anche l'ambiente dove che ga operado e anche l'opurtunita' de usar la lingua. Credo che sia assai piu facile percepir l'italian settentrionale dal meridionale e viceversa, ma anche in questo caso non sempre. Ciao Coce

[babatriestina]

succedi spesso, ma anche mi digo no sempre, a mi i me ga dito spesso in Italia: ma lei viene da Trieste? ma non ha per nulla l'accento triestino!!
Una roba che a mi inveze me ga colpido e me ga fatto rider, co go cominciado a studiar inglese, son andada a far un corsetto estivo de inglese a Londra: ierimo tutti italiani, ben, co fazevimo conversazion in inglese ognidun parlava, e anche con una bona ricchezza de vocaboli, ma nel loro accento inglese se sentiva l'accento local italian: el milanese parlava inglese con cadenza lombarda, e napoletan con cadenza napoletana... forsi più che l'accento iera appunto la cadenza, el modo che la vose va su e zo nela frase.

[sono piccolo ma crescero]

Per mi no xe una caratteristica dei triestini. Noi el triestin lo riconosemo facile, perché la cadenza ne xe familiare, ma se scoltè atenti i vari anunciatori dela radio e dela television, no digo che rivè a dir "Questo xe de Milan, questo de Brescia", ma capir se un xe lombardo, veneto, napoletan o sicilian se capisi abastanza facilmente. E per mi no xe tanto una question de vocali verte o serade, ma proprio de intonazion dela vose, de frequenze che vien doprade parlando.

[babatriestina]

Mi me ricordo una volta go trovado una mula che parlava con un accento stranissimo: el iera vagamente meridional, ma no rivavimo capir de dove: no sicilian, no calabrese, no barese , gavemo sugerido abruzzese, che forsi ne iera meno famigliar?
ben a un zerto punto ghe domandemo. ma ti, de dove te son? Risposta, la iera austriaca, ma la passava le estati in Puglia!!!
e in più gavemo scoperto.. che la gaveva una zia triestina!!!

[Nona Picia]

Co andavimo in campeggio a Cortina, de mi quei che no me conosseva no ga mai scoperto de dove che venivo prima de veder la targa dela roulotte. In cambio i mii fioi ga fato amicizia con dei muleti genovesi e co i tornava a casa i gaveva acento genovese anche lori.....

[serlilian]

Una volta iero a Firenze per un corso, con una mia colega. A pranzo ierimo a tavola con tre toscani, de diverse città. I se domandava se una parola se doveva pronunciar con la "O aperta o chiusa". I ne ga domandà el nostro parer. Me xe vignù de rider e ghe go dito che no i podeva contar su de noi per trovar una risposta, perchè in triestin le vocali xe tute... spalancade!