Primo viaggio in Francia (1967)

Regole del forum
Collegamenti al regolamento del forum in varie lingue ed alle norme sulla privacy in italiano.
Avatar utente
rofizal
Eximio
Eximio
Messaggi: 3396
Iscritto il: dom 1 gen 2006, 18:56
Località: Terra

Primo viaggio in Francia (1967)

Messaggio da rofizal »

Nell'ottobre del 1965, racolti tuti i miei risparmi e dopo eserme fata la patente “A”, me comperavo la mia prima Vespa, de seconda man e datada 1951, ma pur sempre una Vespa! :wink:

Andavo fiero de ela, me recavo in viale, dove me trovavo coi amici dela compagnia e me sembrava de eser el super eroe del momento. La sera proponevo sempre de “andar a bever un bicer al Rifugio Premuda” e no mancava mai chi se sentasi de drio a farme compagnia.

Co le mule iera un poco più duro, no le se fidava sai o forsi le gavesi voludo qualcosa de meio. Cusì co andaimo in gita sul Carso speso me tocava lasar la Vespa in cità e usar la coriera anche mi, a meno de no voler andar su solo o con compagnia maschile (roba che no me pareva proprio el massimo). Ogni tanto qualcheduna faseva ecezion, ma iera la minoranza.

Pasa cusì un anno e mezzo e riva l'estate del 1967. Me vien una mata idea: andar a far un viagio in Vespa. No iera proprio una roba comune a quei tempi, tanto che in compagnia ghe iera solo uno, Furio, con una moto, il quale disi che sì, el ghe sta anche lui. Porto la Vespa da Melillo, che iera quel che riparava bici e moto, per farghe dar una revisionada. El me domanda dove go de andar, mi ghe digo in Francia! El mato se fa una sana ridada e el me disi:
“Se la riva a Barcola xe sai!” :lol:

No me fazo de sicuro spaventar da ste batude, e cusì speto che anche Furio sia pronto a partir. Ma sto qua rimanda un giorno, e poi l'altro, e poi l'altro ancora... Ala fine me par che nol gabi sai intenzion de partir e cusì ciapo coragio e vado de solo. La sera prima gran festa coi amici, che me saluda come se dovesi parti per una Crociata. Chisà, forsi i pensa che podesi eser l'ultima volta che i me vedi. :(

La matina del venerdì 21 luglio 1967 xe tuto pronto: el pieno de miscela, zaino con roba de cambiarse e per lavarse, qualche ricambio per la Vespa, qualche atrezo e poche lire in tasca che devi bastar per tuto. Ah... no mancava la tessera dei Ostelli, strumento indispensabile per poder dormir e magnar in qualche posto. Sul parabreza dela Vespa, im bela evidenza, el tacomaco “Make Love Not War” con el noto simbolo che riproduco qua soto (el tacomaco iera un poco diverso, ma la sostanza xe la stesa).

La partenza xe ale 4:45 (iero matiniero za a quei tempi), quando tuti ancora dormi.

Nel 1966 iera stada inaugurada la Trieste-Udine, ma la Trieste-Venezia lo sarà solo nel dicembre del 1969. Quindi iera solo la normale strada statale, me che problema iera, vista la “velocità” del mezzo? Infatti, a fine giornata, la media generale sarà de 43,6 km/h !! :wink:

Bon, indiferente, fato sta che ale 7:45 arivo a Venezia, poi sì che ghe xe autostrada, ma no me ricordo se la go ciolta o son andado ancora per la normale, per risparmiar, e ale 9:15 arrivo a Padova, ale 9:45 Vicenza, ale 11:00 a Verona e finalmente ale 14:50 a Milano!! Dopotuto solo 10 ore per far 436 km... consumando però solo el 3%, che voleva dir 13 litri de carburante e 1.950 lire de spesa. :-D

Rivado a Milano, fermo un vigile per domandarghe la via de l'Ostello. Sto qua me varda in modo strano e nol sa risponder. Però, cerca un poco domandandoghe ai pasanti, el iera drio el canton! El Ostel iera bel e comodo e popolado de un mucio de giovani. Ricordo una coriera de muli spagnoli e cusì, ala sera, tuti sul prà là davanti, con chitara, a cantar “All you need is love”, ultima canzon dei Beatles.

Continua...
Allegati
MakeLoveNotWar.jpg


Ognuno sta solo sul cuor della terra
trafitto da un raggio di sole:
ed è subito sera

[S. Quasimodo]
Avatar utente
rofizal
Eximio
Eximio
Messaggi: 3396
Iscritto il: dom 1 gen 2006, 18:56
Località: Terra

Messaggio da rofizal »

Eco una foto dell'intrepido viagiator e del "bolide" utilizado. Foto peraltro fata in tempi precedenti, ancora senza parabreza e tacomaco. :wink:
Allegati
Collezione: Rofizal
Collezione: Rofizal


Ognuno sta solo sul cuor della terra
trafitto da un raggio di sole:
ed è subito sera

[S. Quasimodo]
Avatar utente
rofizal
Eximio
Eximio
Messaggi: 3396
Iscritto il: dom 1 gen 2006, 18:56
Località: Terra

Messaggio da rofizal »

continuazion...

El sabato lo go pasado a Milano, in giro per la cità. Senza compere però, visto el budget a disposizion.

La domenica 23 luglio se riparti. Con comodo, apena ale 8:15, del resto bisognava rispetar anche i orari de l'Ostello.

Qua credo proprio de gaver ciolto l'autostrada, peraltro con poco trafico, e cusì ale 9:15 son a Novara, alle 11:30 a Torino, alle 12:50 sul Monginevro e stago per entrar, per la prima volta nela mia vita, in Francia!! :-D

Lungo la strada trovo un autostopista francese, François, anche lui col zaino. Lo ingrumo e cusì semo in due con do zaini pieni. Su una dele salite che percori anche el Tour de France, mentre stemo scometendo sula posibilità de ragiunger la somità dela stesa salita con la Vespa che sta arancando, riva un veceto in bicicleta che ne sorpassa con una facilità che ancora ogi me la ricordo... :shock: :lol: No fa niente! L'importante xe arivar!

Passemo per Briançon e la mia méta saria stada Grenoble, ma François me prega de portarlo fino a Lyon, dove el abitava. Questo voleva dir tanti chilometri in più e mi iero za stanco, ma tanto al fa, tanto el prega, e poi el me prometi che sarò ospite a casa sua... insoma, ala fine semo rivadi a Lyon, ale 21:45, dopo 13 ore e meza de viagio! Per la cronaca i chilometri iera 476, ma molto più “soferti” de quei del primo giorno de viagio.

François xe stado de parola e cusì me trovo ospite a casa sua, una bellissima casa, arredada in stile, nel pieno centro de Lyon.

El giorno dopo xe lunedì 24 luglio, festa nazionale francese, e cusì resto a Lyon, sempre ospite suo. A pranzo son in giro per la cità, piena de motorini, molti dei quali gaveva el motor sula rioda anterior, che se meteva o meno a contato dela rioda stesa (sbasandolo o alzandolo) per andar avanti o per fermarse. A pranzo vado in un ristorantin del centro, i me domanda de dove son (parlavo inglese) e i me proponi una “pastasciutta”. Va ben, provemo sta pasta...

Me riva un piato con una cupola de pasta piutosto compata, a eser generosi. :( In cima xe quel che sembra una oliva. Bon, comicnio con l'oliva... mal me ne colse! No iera un'oliva, ma una roba piena de pevere! :shock: Bon, insoma in un modo o ne l'altro no son morto de fame. Me son consolado la sera, ché François ga invitado i sui amici e amiche e in mio onor i ga fato una otima cena! (i sui genitori no iera presenti, o i iera via o el mulo viveva solo, no son andado ad indagar)

El giorno dopo, martedì 25 luglio, François doveva partir per altre mete. E cusì, mentre speravo de aprofondir la conoscenza de qualche mula :wink: , son dovudo ripartir anche mi ala volta dela meta iniziale che iera Grenoble.

Intanto qua soto ve meto una foto dela cena a casa de François.

Continua...
Allegati
Collezione Rofizal
Collezione Rofizal


Ognuno sta solo sul cuor della terra
trafitto da un raggio di sole:
ed è subito sera

[S. Quasimodo]
Avatar utente
rofizal
Eximio
Eximio
Messaggi: 3396
Iscritto il: dom 1 gen 2006, 18:56
Località: Terra

Messaggio da rofizal »

Devo dir che con François me son sempre sentido in debito e un poco anche in colpa. :( Ierimo rimasti in corispondenza per un poco de tempo. A un certo punto, se ricordo ben, el gaveva avudo un incidente fasendo paracadutismo e el se trovava in ospedal. L'ultima letera che el me gaveva scrito el manifestava la sua intenzion de vignir a Trieste, una volta guarido.
Iero felice de poder ricambiar l'ospitalità ricevuda, ma i miei (mio nonno) no iera delo steso avviso (no iera uso a ospitar estranei in casa). Cusì, senza che el me gavesi domandado niente, ghe gavevo scrito quanto me gavesi piaso ospitarlo in quela ocasion, ma che purtropo no me iera posibile per via del veto ricevudo in casa.

No so se el se gabi ofeso o, spero de no, sia stado pezo de salute, ma no lo go mai più sentido. :( Me dispiasi, perché iera stado sai gentile.


Ognuno sta solo sul cuor della terra
trafitto da un raggio di sole:
ed è subito sera

[S. Quasimodo]
Avatar utente
rofizal
Eximio
Eximio
Messaggi: 3396
Iscritto il: dom 1 gen 2006, 18:56
Località: Terra

Messaggio da rofizal »

continuazion...

Son ritonado a Lyon anni dopo e devo dir che la iera irriconoscibile: autostrade, traffico, ecc, niente a che veder col ricordo che gavevo de una citadina bela e tranquila.

Come dito, martedì 25 luglio son partido da Lyon e son rivado a Grenoble (la distanza tra Lyon e Grenoble iera de 106 km). L'Ostello iera piutosto scalcinado, ma se se adata, sopratuto co se xe giovani.

Do episodi me xe rimasti impresi.

El primo me xe capitado nei “servizi” che iera unici per masci e femine. In parte vedo un buiol con covercio e su scrito “Put here the toilette paper”. Mi, ingenuo, penso “Orpo, cosa se buta qua la carta igienica?”.... no proprio... vardo e... el iera destinado a uso femminile! :oops:

El secondo xe una aventura mancada. In sto ostel iera una bela mula che la taca boton, le me conta che la xe de Hollywood, ecc ecc Vero o no che fosi, la pareva disponibile e, come dito, la iera anche bela. Ma sul più bel... me riva un 'talian che “Uh! Sei italiano pure tu!” el me taca a ciacolar senza sosta. :evil: Nel fratempo la mula xe sparida e no la go più vista! :(

Questo italian iera Gerardo, de Avellino e se da una parte me ga fato perder l'ocasion con l'americana, da l'altra, visto che el ga insistido per far poi insieme el viagio (sula mia Vespa), ghe devo a lui se el viagio steso go podudo terminarlo e rivar a casa, visto che gavemo diviso le spese e che son son tornado a Trieste suto de soldi e de benzina (giusti per rivar fin soto casa).

A Grenoble me son fermado do notti perché, oltre a vistar la citadina, go fato una escursion fino al Gouffre Berger, che quela volta iera la grota più fonda del mondo.

Sto Gouffre Berger doveva eser la méta de una spedizion a cui dovevo partecipar anche mi, ma la iera andada a monte, perché la doveva eser fata in colaborazion con un grupo de Roma, il cui responsabile (o presidente) se gaveva amalado poco prima dela partenza prevista. Cusì me iera rimasto el desiderio de almeno veder dove se trovava e come se presentava l'ingresso. Magra consolazion, ma za qualcosa.

Ve meto un per de foto de l'entrata de sta grota.


Continua...
Allegati
Gouffre Berger<br />Collezione: Rofizal
Gouffre Berger
Collezione: Rofizal
Gouffre Berger<br />Collezione: Rofizal
Gouffre Berger
Collezione: Rofizal
Gouffre Berger<br />Collezione: Rofizal
Gouffre Berger
Collezione: Rofizal


Ognuno sta solo sul cuor della terra
trafitto da un raggio di sole:
ed è subito sera

[S. Quasimodo]
Avatar utente
rofizal
Eximio
Eximio
Messaggi: 3396
Iscritto il: dom 1 gen 2006, 18:56
Località: Terra

Messaggio da rofizal »

continuazion...

Pasado el 26 luglio con sta escursion al Gouffre Berger, el giorno dopo, giovedì 27 luglio, ecome de novo in viaggio, questa volta con Gerardo sul selin posteriore.

In Savoia me parti el cavo dele marce ma, organizado che iero, xe quasi un scherzo cambiarlo da solo... salvo el fato che dopo gavevo le marce invertide: la prima al posto dela terza, e cusì via. :oops:

La méta dela giornada xe Ginevra, distante solo 150 km. Anche là ghe xe un Ostello, e niente male, de quel che me ricordo. No me ricordo invece cosa che go visto dela cità (ghe saria tornado altre volte e i ricordi se confondi), ma ormai la pecunia sta calando e xe el caso de pensar de tornar a casa. Cusì venerdì 28 luglio grande tappa Genève-Lausanne-Brig-Milano de 400 km, con sosta al Ostel za conosudo all'andata. Qua Gerardo ciapa el treno per casa, prestandome 1.000 lire, senza le quali no saria rivado a conclusion (ghe le tornerò una volta rientrado).

L'ultima tappa, ormai da solo e col solo obietivo de rivar ai patri lidi, xe, come noto, de 436 km e la vien percorsa in 9 ore.

Anche i freni ormai xe ridoti al minimo, tanto che nei pressi del Garda, cercando de sorpassar un trator (i unici sorpassi che rivavo a far), me vien incontro una machina e me toca butarme fora strada. Per fortuna xe giareta e, perdendo zaino e tochi vari e frenando coi pie (o quasi), rivo a fermarme in sicureza. :P

Verso Venezia, la Vespa incomincia far rumori strani, glinghede, glanghede, che aumenta legermente lungo la strada. Ma San Cristoforo me devi proteger, perché rivo fin al porton de casa, dove la Vespa fa un grande glinghede, glanghede, glan!... e no la se movi più! :?

Invano cercherò poi de smontarla e ripararla. No se rivava noanche a tirar via l'asse che tigniva su el motor (tuto fuso?). La finirà in scovazon, fine ingloriosa per una Vespa che me gaveva portado, in barba ale previsioni, in cotal viaggio e, fedele compagna, no la me gaveva abandonado fino ala fine del suo compito. :-D

FINE


Ognuno sta solo sul cuor della terra
trafitto da un raggio di sole:
ed è subito sera

[S. Quasimodo]
Avatar utente
rofizal
Eximio
Eximio
Messaggi: 3396
Iscritto il: dom 1 gen 2006, 18:56
Località: Terra

Messaggio da rofizal »

Go trovado (su Youtube) un cocolo video con bele imagini de Lyon:
La ville de Lyon
e uno de Grenoble:
Grenoble of my Heart
Certo, i xe recenti e no certo del 1967, ma tanto per farse un'idea per chi no ghe xe mai stado :wink:


Ognuno sta solo sul cuor della terra
trafitto da un raggio di sole:
ed è subito sera

[S. Quasimodo]
Avatar utente
AdlerTS
cavalier del forum
cavalier del forum
Messaggi: 9561
Iscritto il: mar 27 dic 2005, 21:35
Località: mail: adlerts[at]email.it

Re: Primo viaggio in Francia (1967)

Messaggio da AdlerTS »

rofizal ha scritto:Me vien una mata idea: andar a far un viagio in Vespa. No iera proprio una roba comune a quei tempi,
Gnanche oggi :-D


Mal no far, paura no gaver.
Avatar utente
macondo
Distinto
Distinto
Messaggi: 2669
Iscritto il: dom 25 dic 2005, 18:54
Località: London, UK

Messaggio da macondo »

Bela storia Sergio, complimenti.
Sospeto che te ga aiutado un diario de quei anni :wink:


Avatar utente
rofizal
Eximio
Eximio
Messaggi: 3396
Iscritto il: dom 1 gen 2006, 18:56
Località: Terra

Messaggio da rofizal »

macondo ha scritto:Sospeto che te ga aiutado un diario de quei anni :wink:
Sospeto fondado! :wink: El diario me dà, in sto caso, solo giorni, loghi, nomi e altri dati "tecnici", ma me iuta a ricordarme de qualcosa. Senza de lui no me ricordasi nianche l'anno (i loghi magari sì). I episodi invece xe quei che me xe rimasti impressi, no xe tanti, ma xe come dele "istantaee" che te resta in memoria.


Ognuno sta solo sul cuor della terra
trafitto da un raggio di sole:
ed è subito sera

[S. Quasimodo]
Avatar utente
babatriestina
senator
senator
Messaggi: 41257
Iscritto il: dom 25 dic 2005, 19:29
Località: Trieste, Borgo Teresiano

Messaggio da babatriestina »

mi de quei anni go diversi diari de viaggio, ma no avventurosi come quel de Rofizal. Nel 1963 iero per la prima volta a Parigi, ma el mio diario se limita a elencar ogni giorno cossa che go visitado: abbastanza per ricordarme che giri a pie che go fatto, col idea de voler veder tutto quel che se podeva.. nel viaggio de ritorno stavo sentada, per sgonfiarme i pie.


"mi credo che i scrivi sta roba per insempiar la gente" ( La Cittadella)
Ciancele
notabile
notabile
Messaggi: 4742
Iscritto il: gio 28 lug 2011, 22:30

Re: Primo viaggio in Francia (1967)

Messaggio da Ciancele »

Rofizai, go leto ‘pena ‘deso el riasunto del tuo viageto in Vespa. Mi go fato ‘sto viageto (3500 chilometri) qualche ano prima, estate 1957, co’la Vespa 150, la prima Vespa con questa cilindrata. Velocità massima 72 kmh. Un aneto dopo circa xe vignuda fora la 200 che fazeva anca i 100 a l’ora. La mia Vespa iera nova, comprada a Pasqua 1956. Co’la mia ex fidanzata, da 56 ani la mia putelina (mogliettina, dolce metà, vecia, a seconda dei momenti), semo partidi de matina. Gaveimo qualche soldin, insoma no contai. A tarda sera semo rivai in Svizera, in un paeseto perso tra i monti, e gavemo dormì in una specie de castel, un maniero. Gavemo magnà ben: una costoleta de vedel ‘bastanza granda, con bisi e funghi. Quel che rovinà la sera xe sta el prezo del bicer de roso. Orendo. El prezo, no el vin. El giorno dopo semo pasai in Francia per Ginevra. Drio un mureto gavemo impizà el nostro fogoler portatile a petrolio in cubeti, grando come un pacheto de 20/24 sigarete, e gavemo scaldà l’aqua per far un nescafè. Stavimo bevendo co’ se ferma una moto col carozin, targada gnocheria, e el mato me domanda un’informazion. Insoma el mio François. Se movemo, mi davanti, lu de drio, e rivemo a un distributor. Mi go fato benza. Quela volta bisogna ‘ver i buoni e el mato no li gaveva. Mi gnanca, ma mi parlavo francese e inzinganavo (convincevo, inducevo) el toma (l’addetto) a darme zinque litri senza buoni. El gnoco se ga meso a pianzer e mi go fato de in tre per tre (interprete) e cusì ga ciapà patrolio (benzina) anca lu. Sempre in fila semo rivai a Lion e là ghe go procurà una camera dove che gavemo dormido noi. La sua baba xe vignuda in camera nostra e la ga ne ga domandà a cosa che servi el secondo condoto. Se vedi che no la gaveva mai visto un bidè in vita sua. Ghe gavemo spiegà e la xe ‘ndada via tuta contenta. I ne ga contà che i andava sula costa, soto Marsilia, in tenda. Le tende rivava con un camion e i iera in una trentina de lori. Ognidun doveva rivar al campegio come ch’el podeva. Lori co’la moto (una 175 cc) e carozin. De Lion semo ‘ndai sul Rodano e gavemo seguì el corso del fiume. Veramente bel. La gita la go fata tanti ani dopo, coi fioi e can, in machina. Poco prima de Marsilia se gavemo saludà. Noi semo ‘ndai sula costa azura. Via Sanremo, Genova e Alessandria semo rivai al lago de Garda, a Desenzano. A las cinco de la tarde (ore diciassette), batui de slorda (affamati come lupi), in un albergheto la baba ne fa un sugo finto coi bigoli (spaghetti), una bisteca e fragole de bosco con Madeira. Rofizai, te ga mai bevù un “vino liquoroso” col cuciarin? Mi sì, ala Tot. Un bicerin e te son in bala (alticcio). Col Madeira compagno. Son ‘ndà a gato su pa’le scale, me go butà par traverso sul leto, come in zerti film, e son partì (mi sono immediatamente addormentato). Ma iera bon. Un mato, al tavolo vizin, el magnava tripe ala parmigiana. Del muso ch’el fazeva, le doveva eser anca ‘sai bone. El giorno dopo semo partidi e semo ‘rivai a Trieste. I mii tuti contenti e semo stai do setimane. Più contento de tuti iera mio fradel che, dopo lavor, el vigniva de mama e papà a farse (mangiare) un oveto frito. Ogni giorno. No so se el gaveva mefa (un po’ di appetito) o el voleva far piazer a mama. ‘fari sui. ‘fari mii iera inveze che dopo me tocava portarlo a casa sua co’la Vespa. Po xe rivà el momento del ritorno a casa. Trieste-Cortina da un pezzo (d’Ampezzo). La vigniva zo che no ve conto (pioveva a dirotto) e se gavemo rifugià in tuna capana, dove che iera un veceto, co’la stua impizada (stufa accesa). Gavevimo un chilo de sariese (ciliege) e se le gavemo divise col veceto. El ne ga basà. La sera rivemo a Salisburgo, dove che ne spetava un amico. El giorno dopo partimo e via Monaco rivemo a casa. Noi andaimo a 72 kmh e la piova a 70. Co’ el motorin no ghe la fazeva, la mula, sentada de drio, la la ciapava (si bagnava). ‘lora sempre a tuta bira (forza). De ponte in ponte. Soto el ponte no pioveva. Più a nord no pioveva più. Ma la putela iera stanca e la se ga indormenzà. Par ciò che no la caschi, la guantavo. Te te imagini? Guidar co’la sinistra, par via de acelerar, e co’la destra guantar la mula? Come nela spigolatrice di Sapri, iero giovine e forte, e ghe la go fata. La go consegnada a casa in buono stato esteriore. Parlemo sempre de questa vacanza, anca se quele dopo le gavemo fate in auto. La prima volta che semo ‘ndai in auto, la me fa: Che bel se piovesi. Mi ghe dico: Cici, te spandi i copi (sei ammattita). E ela me fa: No, saria bel che piovesi parchè in auto no la ciapo (non mi bagno). Forsi te pensi anca ti a quela famosa gita, che ogi te vedi con altri oci. Ma iera bel, iera le monade che se fa de giovini. Mi go qualche mese più de ti (son del ‘27), ma me sento ancora putel.
PS: Scusa le parentesi par talian, ma xe pai non autoctoni. ;--D


Ciancele
notabile
notabile
Messaggi: 4742
Iscritto il: gio 28 lug 2011, 22:30

Re: Primo viaggio in Francia (1967)

Messaggio da Ciancele »

rofizal ha scritto: mar 6 gen 2009, 6:58 Nell'ottobre del 1965, racolti tuti i miei risparmi e dopo eserme fata la patente “A”, me comperavo la mia prima Vespa, de seconda man e datada 1951, ma pur sempre una Vespa! :wink:

Andavo fiero de ela, me recavo in viale, dove me trovavo coi amici dela compagnia e me sembrava de eser el super eroe del momento. La sera proponevo sempre de “andar a bever un bicer al Rifugio Premuda” e no mancava mai chi se sentasi de drio a farme compagnia.

Co le mule iera un poco più duro, no le se fidava sai o forsi le gavesi voludo qualcosa de meio. Cusì co andaimo in gita sul Carso speso me tocava lasar la Vespa in cità e usar la coriera anche mi, a meno de no voler andar su solo o con compagnia maschile (roba che no me pareva proprio el massimo). Ogni tanto qualcheduna faseva ecezion, ma iera la minoranza. .....
Anca noi qua, fine ani 40 inizio ani 50, gaveimo problemi co'le mule. I me contava che chi che gaveva una motocicleta portava la mula un diese chilometri fora de casa e po ghe diseva: Cici, o te disi de sì o te va a casa a pie. Poche 'ndava a pie. ;--D ;--D


Avatar utente
babatriestina
senator
senator
Messaggi: 41257
Iscritto il: dom 25 dic 2005, 19:29
Località: Trieste, Borgo Teresiano

Re: Primo viaggio in Francia (1967)

Messaggio da babatriestina »

eeh, mi gavevo papà che me diseva "ocio che i omini se i ofri qualcossa spesso i se speta qualcossa in cambio..."


"mi credo che i scrivi sta roba per insempiar la gente" ( La Cittadella)

Torna a “Triestini nel mondo”