Buon Giorno!

[Piereto]

In sti giorni se parla sai sui giornai e in tv de la copia e cui i ghe ga fato perder la patria potestà sui fioi, perchè i viveva in un casale nel bosco e i fazeva quindi una vita apartada forse spartana e no con el benessere che se pol aver in cità. Ma vien de domandarse come mai le istituzioni se ocupa de lori e no vedi i centinaia de fioi che vivi senza controli e senza istruzion nnei campi abusivi dei zingani e che per lo più i delinqui.

[babatriestina]

mi iero ieri ala veglia de preghier a per quei che xe morti nei capannoni del Porto vechio. Perchè se gabi quel minimo de umanità de no lassar morir de fredo le persone. Xe vero che la cristianità ormai no esisti più, el cristianesimo xe una dele tante religioni... de quei dei boschi no so, ma una volta se no te mandavi i fioi a scola rivava i carabinieri. o no?

[Piereto]

La lege prevedi la possibilità de farte una istruzion al de fora de la scuola pubblica.

[babatriestina]

La lege prevedi la possibilità de farte una istruzion al de fora de la scuola pubblica.

imagino però fazendo dele verifiche ala fin perché i titoli scolastici ga valor legal in Italia

[sono piccolo ma crescero]

L'istruzion fora dela scola pubblica se la pol far in due modi:

1. scole riconosude (paritarie). Co insegnavo mi ala fine de l'anno ai scrutini ghe iera la presenza de un commissario governativo; me ga tocà farlo per tre anni, tanti anni fa. Adesso no so come che sia.
2. La scola parentale che se organiza come che vol, ma ala fine de l'anno scolastico i fioi devi andar a far l'esame in una scola pubblica. Ghe xe vari motivi per cui i genitori preferisi la scola parental; qualchedun li manda perché ritien che la scola pubblica no funziona e la sia un ambiente poco san per i propri fioi. Mi, dopo che son andà in pension, go insegnà in una scola parentale (volontariato) che ingruma casi dificili nele scole de Trieste, libera le scole del problema de doverli gestir, e zerca de farli recuperar. Son andà avanti fin al covid. Dopo go molà.

[babatriestina]

La scristianizzazion del Nadal
Oggi zerco un bel biglietto de auguri de Nadal e inveze che de cinesi o african vedo in un a rispettabile cartoleria che ga sempre roba de qualità.
bellissimi biglietti, nani, gnomi, funghi, un babbo Nadal anche un albero.. go domandado Auguri de Nadal cristiani gavè? risposta No gavemo no tegnimo.
me sa che certi cinesi li ga...magari la Madonna gaverà i oci a mandorla..

[Piereto]

Son contento che anche a qualchidun altro xe vignudo in mente che no ocori abater i ultimi pini maritimi a Grignan, (le conifere ga le radise superficiali) e quando xe de livelar el teren basta alzarlo de una trentina de centimetri. Mi credo che la dita che ga fato i lavori dei alberi za abatudi xe stada scelta perchè la costava de meno,e cusì gavemo perso l'ombra e el profumo de pini più che decennali.

[Piereto]

Dilemma. El prosimo anno pagheremo la tari , o un tanto a sacco de scovaze con una tesera per verzer la portela del casoneto e scarigar le scovaze ? Quindi niente più calcoli che tien conto de gente che abita e superficie dei apartamenti ? Un sacheto de color diverso per ogni diversa diferenziata ? Quanti sacheti al mese ? Niente più quota fissa perchè tuto dipenderà da la volumetria del sacheto. Bone feste e scarighè fin che podè.

[babatriestina]

cioè più che diferenziemo meno paghemo de tassa scovaze? magari!!!

[Piereto]

Legevo l'altro giorno de come che se ga organizado Hera nel bolognese. Te paghi sempre la tari, ma i te da una tessera per verzer la portisela sul cassonetto e una confezion de 26 sacchi da 30 litri che te dovessi pastar per un anno. Se le fameie xe numerose i te da più sachi. E se te ocori più sachi te paghi. Ma inveze, no ricordo in qual comun, i ga deciso che sicome la racolta de la diferenziata co la tesera dava i stesi risultati numerici de prima, ma con un costo superiore per tesere col cip e sacheti col cip e ispetori che controlava che no te li fregassi, i xe tornadi a la racolta de una volta, casoni liberi e no controladi.
Me ricordo che ogni edificio gaveva nel sotoscala un spazio in cui ghe iera un botin e anche più de un dove iera più fameie, e ogni giorno pasava el camion de le scovaze a ingrumar botini, svodarli e rimeterli in casa. I miei veci me contava de come una volta el scovazin viniva fin su la porta a cior el saco de le scovaze e el sonava la tromba per avisar. Altri tempi.

[sono piccolo ma crescero]

Sì, altri tempi, Piereto, però me ricordo anche che a casa ierimo in 9 e gavevimo, per le scovaze, una casetina de legno che sarà stada de 50x30x20 cm e la bastava per ingrumar tute le nostre scoavze de un giorno... e ierimo in 9.

La roba iera venduda sfusa, i te la meteva in scartozi e la carta se la riciclava (quela de giornal anche per lavar i vetri dele finestre o per far bale de carta de brusar de inverno. Ogi gavemo confezioni mostruose de materiai poliaccoppiati dificili de smaltir per tignir dentro ... una penna biro.

[babatriestina]

e quanta roba brusavimo in stua! senza pensar ai fumi che vegniva fora...
altri usi del a carte de giornai: taiada a rettangoli come riserva se mancava la carta de cesso e per far cartine de naftalina. Va ben che adesso mi i giornai li riciclo portandoli ai ricoveri de bestie che i servi per fodrar le lettiere. El late lo portava la dona del late, direttamente in pignata che lo boivimo-...

[Piereto]

E si, andavo a cior i biscoti che i te dava sfusi, la botilia del late che po te ghe tornavi indrio svoda, e la botilia per l'oio che te andavi a impignir ogni volta che serviva. E la verdura i te la involtizava in quela carta grossa giallo verde o i te fazeva el scartozeto conico. Oggi i ne ordina da lavar i barattoli de vetro, de stacar le carte , e meter el resto in te la diferenziata , tuto per risparmiarghe el lavor a chi che ricicla e farlo guadagnar de più. Xe vero se brusava in stua tanta roba e tinivimo in pergolo el saco dei legni e quel del carbon, più tardi le taniche de nafta.

[babatriestina]

e quela carta gialoverde te la dopravi per scolar el frito , e po te la butavi in stua con bona pase dei oli esausti!

[Piereto]

Za i friti de una volta. Se butava via l'oio che el iera diventado più scuro, zo per la scafa . Inquinameento ?, semo sopravisudi. Ricordo una quindicina de anni fa co iero a Siviglia, dei grandi cassoni accanto a quei per le scovaze, che iera adibidi a scarigar i oi esusti. La gente viniva co la botiglia de casa e travasava l'oio, no come ogi de noi che te depositi per sora una botilia de plastica. E ricordo sempre la precision teutonica dove in campegio te gavevi za tanti anni fa i cassonetti per ingrumar le botilie , uno per le bianche. uno per le giale e un per le verdi, per no dir de un casoneto sconto in tei cortili tra le case, dove te podevi butar via pici eletrodomestici e materiale eletrico.

[Piereto]

Bisogna sperar che i duri de comprendonio nel 2026 i se rendi conto che far la ovovia xe una scelta antieconomica e che dopo un o due anni la falisi per mancanza de utenti. Una altra corbelleria xe utilizarla per andar solo in orizontale tra i magazini del porto. Perchè alzarse de diesi metri soto le finestre dei futuri abitanti, salir drio el miela e scender solo a barcola ? quando te pol andar rasotera coi bus eletricio e te pol far tante fermate intermedie. Gavemo due bei siti turistici sul carso, uno panoramico super , el monte grisa e el borgo co la grota gigante. Perchè no costruir e prolungar el tranvai de Opcina fino a sti do loghi deviando a la fermata de campo sacro ?. Qualche milion per binari pai e masiciate, nisun pericolo de bora e aquisto de do nove veture a pian ribasado. Mah atendemo che qualchidun veni iluminado.

[sono piccolo ma crescero]

Legio su Trieste prima de una manifestazion de Aikido, un'arte marziale giapponese.

seguirà una breve cerimonia di Kagami Biraki (apertura dell'anno di pratica 2026) aperta al pubblico e agli ospiti, con un Embukai (dimostrazione pubblica)

Mi no so cosa che sia l'aikido, ma se no fusi giaponese, le parole sotolineade da mi me faria pensar a tuto altro

[Ciancele]

Se a qualchedun ghe vanza un can de San Bernardo, el me lo pol mandar a mi. Stanote ga nevigà, in cità, Germania centrale. O se fa sci de fondo o se sta a casa. Mi go do vecie rachete de tenis. Le userò par caminar fora.

[sono piccolo ma crescero]

Go vardà le webcam de dove che te sta ti. Bela nevigada.

[york66]

. Perchè no costruir e prolungar el tranvai de Opcina fino a sti do loghi deviando a la fermata de campo sacro ?. Qualche milion per binari pai e masiciate, nisun pericolo de bora e aquisto de do nove veture a pian ribasado. Mah atendemo che qualchidun veni iluminado.

Combinazion, i binari del tram una volta finiva ala stazion feroviaria''pogio reale del carso'', i xe sta scavadi fora no so in che anno,pero i saveva come estender i binari za quela volta! alora???