Buon Giorno!

[Piereto]

Comincia i aumenti che no sia de alimentari? Vedo che i ga deciso de aumentar el biglieto de ingresso ai musei, i disi 1,7% ma anche el biglieto del postegio che xe quasi del 20%, anche la tassa de soggiorno. Saria sai bel saver dove che va a finir sti bori , se I va a favor de opere publiche o ne le scarsele de qualchidun. Opur comincia la svalutazion de la moneda?

[babatriestina]

ma quando mai ga smesso de aumentar ogni anno? me par che sia stato storicamente nela seconda metà del Otocento..

veramente i disi anche nel 1954 e nel 2020 ( bela forza, col covid) " Nel 2020, per la terza volta dal 1954, ovvero da quando è disponibile la serie storica dell'indice nazionale dei prezzi al consumo, l’Italia si trova in una situazione di deflazione. " fonte Milano finanza. Tuti i altri anni ga sempre aumentado

quela che disevo mi "La "Grande Deflazione" di fine Ottocento (circa 1875-1895)
fu un periodo di crisi economica caratterizzato da una persistente diminuzione dei prezzi (deflazione) causata principalmente da una sovrapproduzione industriale e agricola. Questa crisi fu legata alla Seconda Rivoluzione Industriale e comportò una forte competizione, un aumento della disoccupazione, la contrazione dei salari e una minore circolazione monetaria, anche se la crescita complessiva del PIL rimase positiva"

[Piereto]

Mi credo che xe sempre la moneda che val de meno perché el sistema xe congeniado per impedir che lo Stato estingui i sui debiti co le banche. Te pol anche aumentar la produzione dei beni ma se i prezi de le materie prime e de la energia aumenta perché qualchidun vol guadagnar de più, poi a cascata no te pol far altro che aumentar i prezi. I ne ga illuso che l'euro fusi al riparo de le crisi e inveze el andera' a finir come la lira.

[Ciancele]

Caro Piereto, volaria coreger un tuo sbalio: El Euro no finirà come la lira, el xe za finì. Almeno qua de mi. Qua el euro i lo ciama teuro, che saria teuer = caro, di alto prezzo. Quela volta tuti ga parlà dei vantagi che portarà el euro. Sora de tuto che no ocorerà più cambiar soldi. Par mi, e par tanti altri dela mia età, el ga portà la rovina. La pension xe stada dimezada, ma i prezi xe squasi uguali in marchi o i euro. Par esempio, i disi che una roba che costava do marchi la doveva costar un euro. Adeso no la costa do euro, ma uno e zinquanta. Sensa machineta, fazo el conto e trovo che xe tre marchi, dunque più de do. I me disi che de tanti ani i prezi, insoma l'inflazion, aumenta gnanca del circa 3 percento. Xe anca vero. Ma i dismentiga che dopo el 2002 in pochi ani ghe xe sta un aumento del setanta/otanta percento. Un mio amico nel 1997 el ga crompà un condominio per 200/220 mila marchi. Nel 2012, diese ani dopo l'euro, i ghe ga oferto 220 mila euro. No'l ga vendù. In marchi el gavaria ciapà 440 mila, el dopio, no la metà. E con 220 mila euro no'l gavaria ciapà un apartamento come el suo vecio. Ma chi che ga vendù par gaver capital, ga fato afari. Penso che anca in Italia i prezi dei imobili sia andadi ale stele. La stesa roba xe coi auto, sia novi che de ocasion. Nel 1997 a Trieste in un albergo a 4 stele go pagà 250 mila, per note, in do. Mio fio ga pagà meno de 200 euro, che saria sempre 400 mila. E iera una oferta speciale. Al Savoia iera poco meno de 500. Mia fia, fora stagion, ga pagà nela brughiera, che saria zona de vacanza, circa 150. Col can. Can? Cagnaz! Mezo vedel. Zogo al loto sperando de vinzer. Ma tuti savemo come che mori quei che i vivi sperando.

[babatriestina]

mi no ve digo cossa che costava in Inghiltera, che xe sterline... e cola lira gnanca... el tasso de inflazion iera el 15% AL ANNO che ve lasso far el calcolo quel che saria in 10 anni, ben quel xe per bon esponenzial, no come che i disi adesso per dir che xe un tantin più caro. ma coi costi al 15% più cari ogni anno, barufa in banca per gaver un tasso del 10% sul mio libreto a risparmio. ma quei che no domandava se sentiva dir " lei la godi de un tasso del 2% ma lordo" ( vera!!). Mi dopo quel che g o visto no me meraviglio de gnante più.. ma vedo po che xe sempre tanti che sufia soto solo perché i vol ciapar lori i vantagi de eser al governo... savè la prima roba che ghe insegnavo ale lezioni de matematica finanziaria che xe inutile parlar de bori se no se disi la data, che una roba che costava 100 vinti ani fa adesso costassi tanto tanto de più e no xe che i imbroia anche mi vinti ani fa iero diferente de come che son adesso, per dir. Ma quanti ani xe passai de quando che i ga messo el euro?? tanti? e volessi che prezzi e anca noi fussi come come trenta ani fa? col piffero, siori mii.. eh se potesssi avere mille lire al mese e adessoo con mile lire?? che no esisti più... nb al Savoia???? ma mi no go mai pensado de poderme permeter de andar in albergo al Savoia. Ma gnanca al bagno al savoia!!! che costa un ocio dela testa...

[sono piccolo ma crescero]

Mah l'euro in Italia xe sta volù de Prodi e realizzà da Berlusconi e Tremonti che iera contrari a l'euro e che no ga fato gnente per controlar che el cambio che vigniva aplicado fusi giusto, Me ricordo che i gaveva intervistà quela volta Tremonti che gaveva teorizà che no iera de far gnente e che se sarira rangiai i consumatori. No so se Prodi gaveria fato diverso comunque me gaveva spaventà la considerazion che el debole (consumator) se gaveria dovù difender dal forte (produtor). Gavemo vu, tuti, furia de no ver davanti i dopi prezi, lire e euro e cusì gavemo vu che el cambio che doveva eser un euro dove che iera 2.000 lire xe diventà, zito zito, 2 euro dove che iera 2.000 lire.

DIto questo, onestamente, come che iera in Germania mi no so, ma ve se dimenticai de cosa che iera la lira prima de l'euro? Nel '76 volevo trovar un mutuo per comprar casa: 22% el tasso. Voleva dir che un mutuo de 10.000.000 de lire per 10 anni gaveria pagà 2.550.000 lire a l'anno; se volevo pagar de meno podevo farlo per 20 anni: 2.240.000 a l'anno; e se lo volevo per 30 anni 2.206.000 all'anno. In sostanza i mutui iera solo interessi e quel che dovevi pagar iera sempre el stesso. E po' vardemo el tasso: 22%. Ogi, legio che el tasso xe del 3% circa, Ah, dimenticavo che gavevo 250.000 lire al mese de paga, 3.000.000 a l'anno: no go fato el mutuo.

E ve se dimenticai cosa che iera dela lira? Ogni starnudo che i fazeva in giro per el mondo batoste sula lira che ogni tre mesi vigniva svalutada rispeto al marco (fazendo incazar i tedeschi). Diseme come la saria andada a finir co la crisi del 2008? Mi no so come che la saria andana, ma credo che no gavessimo vu gnanche i soldi per un per de mudande, visto che el coton xe de importazion.

Insoma, no voio dir che co l'euro xe tuto bel, ma go paura che senza saria sta pezo, almeno in Italia.

[Blues Briso]

Me ricordo che el capodano del 2002 son dado con la mula (ogi mia moglie) a firenze, co son partido el 31/12 una bireta costava 3500 lire, co son tornado el 1/1 la costava 2,5 euri... fa ti.

[babatriestina]

mi so che quei giorni quei furbastri no ga fato afari con mi...

[sono piccolo ma crescero]

Me ricordo che el capodano del 2002 son dado con la mula (ogi mia moglie) a firenze, co son partido el 31/12 una bireta costava 3500 lire, co son tornado el 1/1 la costava 2,5 euri... fa ti.

Mi cambi cusì de bruto no li go visti, a parte la salata de un supermercato dove che i se iera dimenticai de bater la virgola per cui un baro de salata i me lo fazeva pagar 50€ invece che 50¢, ma ghe lo go fato notar e i xe ndai a coreger nel computer. E non nego che pianin pianin i ne gabi fregà portando el cambio da 1€=2000 L a 1€=1000 L. Digo solo che, in Italia e daperuto forsi, se ga vu tropa furia de molar la vecia moneda. Digo anche che, forsi ma no son economista, se ga sbaglià a lasar al consumator l'onere de no eser fregà. De conseguenza i prezi xe aumentadi; i me diseva che i soli auti che ga tignù el cambio 2000 lire per un euro xe stade le Ferrari e questo la disi lunga su dove che xe l'anel debole dela cadena.

Dito questo, ripeto: forsi voi ieri un poco più giovani e no ve ricordè, ma prima sula lira ghe iera stade speculazioni incredibili per cui de un giorno a l'altro nel cambio col dolaro la lira valeva la metà. No me par che sta roba se sia verificada anche co l'euro.

E ripeto anche: no voio dir che con l'euro xe tuto bel, digo che, probabilmente, senza l'euro saria pezo. Naturalmente semo nel campo dele ipotesi e ognidun xe libero de sostener una roba o el suo contrario.

[Blues Briso]

Mi penso che ogi no podessimo rinunciar al euro, credo che l'inghiltera ga fato una monada (a molar l'Europa, l'euro no lo ga mai voludo come moneda de lori). Ma solo fra decenni se poderà capirlo sul serio.
Comunque quela dela bireta xe vera, me ricordo ben. O cussì o no la ciolevo. Se no me ricordo mal, i negozianti iera obligai a tignir in picio anche el prezo in lire, no xe che no i podeva aumentar i prezi...

[Piereto]

Co gaveimo la lira ,dal 60 al 90 ierimo la quarta potenza industrial , davanti ai inglesi, e producevimo de tuto, gaveimo la scala mobile che compensava la perdita de valor dei stipendi e ogni tanto ghe iera dei scioperi. Gaveimo gas e petrolio de la libia e da la Rusia e gaveimo anche el nucleare. Le banche commerciali iera separade da quelle finanziarie. I ne ga obligado a entrar nella UE . Ogi semo susidiari e tacai a la Germania, e se ela va mal, va mal anche per noi, la slovenia la croazia ,l'austria la Cechia e l'Ungheria. Energicamente dipendemo dai mericani al triplo del costo precedente. I stipendi in euro non xe cresudi e i guadagni xe servidi a susidiar i altri 20 stati che xe enrtradi nela UE. Giogando con la svalutazion de la lira te otenivi credito e te podevi spender per investimenti industriali e infrastrutture. Ogi te ghe devi domandar soldi a la BCE e se a lori no ghe va el tuo piano de sviluppo no i lo finanzia. Inveze de autorizarte a far una fabrica in Italia i ghe da i bori per farla in Estonia. No xe soldi per i operai italiani, e i te autoriza a cior imigrati e i te consiglia de localizar altrove la produzion.

[babatriestina]

veramente mi go ben altri ricordi de quei anni: la lira iera cussì in malora che no se podeva andar al estero portando soldi, te dovevi notar sul passaporto la misera quantità che i te permeteva de portar.. co se andava in paesi esotici e i fioluzi dmandava bori, te ghe davi lire e i le smacava per tera per sprezo perché no le valeva gnente, dolari i voleva!!!( esperienze mie); la scala mobile xe quela che ga fato andar su i prezi con inflazion pazzesca tuto costava sempre de più... iera ani d e piombo e ogni giorno o quasi te legevi de qualchedun mazado... francamente me par de leger storie de qualche altro paese..come che la conta Piereto.. gavemo vissudo in Paesi diferenti? te legevi i giornai e te legevi che el debito publico xe de tot mila miliardi.. una soma che no rivo ancora adesso a imaginar.. come i fantastilioni de paperone

[babatriestina]

ho trovato dati sull'inflazione
Inflazione italiana – anni ’70 e primi ’80
Anno Inflazione (IPC, % annua) Contesto
1973 ~10% prima crisi petrolifera
1974 ~19% shock energetico, salari indicizzati
1975 ~17% svalutazione lira, “scala mobile”
1976 ~17–18% crisi valutaria, lira in caduta
1977–1979 15–17% inflazione strutturale
1980 ~21% seconda crisi petrolifera
1981–1982 ~17–16% inizio stretta monetaria (“divorzio Tesoro–Banca d’Italia”)
1983–1985 12–10% calo graduale

[babatriestina]

Perché fu così alta?

Crisi petrolifere (1973 e 1979) → il prezzo del petrolio quadruplicò.

“Scala mobile” → i salari si indicizzavano automaticamente ai prezzi, alimentando la spirale inflattiva.

Svalutazioni della lira → per sostenere le esportazioni, ma aumentavano il costo delle importazioni.

Disavanzo pubblico e spesa corrente crescente.

Conseguenze

I tassi d’interesse nominali arrivarono davvero vicini al 20% (a volte oltre, per i mutui e i BOT).

L’Italia visse anni di stagflazione: inflazione alta + crescita bassa.

Solo dopo il “divorzio” tra Tesoro e Banca d’Italia (1981) e l’ingresso nello SME europeo, l’inflazione cominciò a scendere.

[Ciancele]

Mi me ricordo che qua nel 1993, col marco, i dava interessi positivi de 8 percento. Ogi, con l'euro, devo pagar mi par gaver el conto e i interesi, naturalmente negativi, 1 o 2 percento.

[babatriestina]

Mi me ricordo che qua nel 1993, col marco, i dava interessi positivi de 8 percento. Ogi, con l'euro, devo pagar mi par gaver el conto e i interesi, naturalmente negativi, 1 o 2 percento.

ah el marco iera forte e capisso che i gabi un poco rugnado a unificarse col euro. Ma se no i se meteva in pari, dove i esportava?? e tien conto te disi el 93... mi gavessi dito prima del 89, che dopo la Germania ga avudo i sui problemi a inglobar economicamente la parte est. xe ancora quei che rugna che no i doveva tirarse su la ex DDR che xe stada un peso economico per anni

[Piereto]

Mi credo con la lira che l'aumento del benessere sociale xe andado de pari passo co una produttivita industriale che necesitava però de aperture de credito. Per bilanciar i pagamenti de interessi e far fronte a crisi flutuanti economiche mondiali, se ga svalutado , se ga dovesto aumentar le tasse , se ga dovesto aumentar le esportazioni e se ga dovesto zercar fonti energetiche a basso costo. Viveimo in un periodo de guera freda e un avicinamento tra i due blochi viniva frenado con atentati de varia matrice e qualche golpe andado sbuso. Per limitar el benessere ai lavoratori xe sta abolida la scala mobile , xe sta reso dificile el credito alle imprese . Co gavevo de viagiar al estero andavo in banca a cambiar le lire e se me ocoreva cifre più grandi go ciolto i travellers cheque de american express . I ne ga fato creder che (vi darò la felicità) iera meio pasar a una moneda nova e forte , una emenazion del dollaro, Se doveva far el sacrificio de eliminar l'industria de stato butando via insieme a l'aqua sporca anche el bambin, cioè quele imprese che rendeva ben. No ocoreva più aver una banca de Stato , no gavesimo più avudo de dover sceglier come finanziarse e saremo diventadi tuti una grande famiglia, el trionfo del libero mercato dove che el grande magna el picio. Mi credo però che ogi stemo vivendo de le rendite del pasato e xe sempre più dificile poder dispor dei propri bori. El credito xe limitado, le infrastruture e le opere publiche pasa al vaglio de la comision, cioè semo comandadi da fora.

[babatriestina]

passaporto 1974_20251103_0001.jpg (39.84 KiB) Visto 183 volte

eco qua go trovado i dati "Modifica 1974 — soglia e regime annuo: il decreto ministeriale 21 marzo 1974 abbassò i limiti e l’evoluzione normativa nei mesi successivi portò a stabilire un limite massimo di controvalore di Lire 500.000 per l’esportazione di biglietti/bancnot e titoli in valuta per i residenti. In una modifica del 2 maggio 1974 tale autorizzazione venne formulata fino al limite di Lire 500.000 per anno solare (cioè un tetto annuale).
Eur-Lex" mi iero andada in inghilterra gavevo pagado la base de qua ma i pasti no iera compresi e dovevimo pagarseli
Sanzioni: all’epoca la violazione comportava pesanti sanzioni amministrative (per esempio multa fino al quintuplo del valore esportato); successivamente (1976) furono introdotte anche sanzioni penali più severe e un inasprimento della disciplina

me ricordo che iera su tuti i giornai de due veceti andai i Francia e trovai con in borseta el proprio libretto de risparmio ( per no lassarlo solo a casa per paura dei ladri) i li ga arestai come esportatori de valuta estera ( imagino che chi saveva alora se ga fato istesso con futizzi al estero)
i notava sul passaporto eco el mio: 50 dolari in banconote e altri in cheques totale 500 mila lire circa e con questo più de cussì per un anno no podevo..

[sono piccolo ma crescero]

El mondo xe bel perché el xe vario, basta no ciaparse a cortelade tra chi che la pensa diversamente. Fata questa premessa...

Per limitar el benessere ai lavoratori xe sta abolida la scala mobile , xe sta reso dificile el credito alle imprese .

La scala mobile no coverzeva in pien l'inflazion, e i prezi aumentava più che le paghe. La scala mobile gaveva un effetto de retroazion, per cui prezi e paghe se coreva drio, con un vantaggio per i prezzi. Certo me ricordo che la banca me dava el 13% de interesse sul conto, ma se l'inflazion iera al 20 % finiva anche là che pagavo perché che la banca me tegni i soldi, come adesso che i interessi xe 0 e pago per el conto.

Forsi me sbaglio, ma onestamente no rimpianzo i tempi co l'inflazion al 20% Me ricordo che mio papà, pasando davanti a una drogheria, comprava ogni tanto un fustin de detersivo. In principio mia mama iera contenta, perché un fustin pesava 5 chili. Quando però la se ga trovado el ripostiglio pien de fustini la ghe ga dito a mio papà "Nino basta per favor!" Co go comincià a insegnar matematica finanziaria, per rider go fato in classe el conto de l'investimento che gaveva fato mio papà: iera vignù un rendimento sai più alto che se el gavessi investiddo in bot, me par de ricordarme sul 40% perché le varie crisi petrolifere gaveva butado ale stelle i derivai del petrolio.

Certo chi che iera abituado a specular sula svalutazion dela lira se xe trovado a dover cambiar metodo, ma mi, onestamente, no rimpianzo quei tempi. Certo, me piaseria che le robe andassi meio, ma, visto che go citado mio papà, me ricordo sempre un suo motto: "stavo bene, per stare meglio giaccio qui".

[Ciancele]

Mi parlo del 1993 parchè el 1992 son ‘ndà in pension e go ciapà l’asicurazion. Sicome che go continuà a lavorar, go impiegà i soldi in conto deposito giornaliero, a breve termine, per un mese, e i dava 8 percento de interesi sensa problemi. Un o do ani dopo i ga inscominzià a calar i interesi e semo finidi a dover pagar noi par gaver un conto. Adeso pago 90 centesimi per ogni registrazion e se voio l’estrato conto per posta, 95 centesimi de francobolo. Mia fia fa par mi online banking.
La question dela riunion dele due Germanie xe un poco più complicada. La Germania ovest credeva de ciapar mercato, posto dove vender, e gente per lavorar. Mi dal 1990 al 1993/94 go vu contati con la direzion de grose dite e a pranzo el mato dela Germania ovest contava che un suo dipendente de l’est ghe ga domandà dove che se podaria andar. Lu ghe ga dito che al fine setimana el pol andar dove che el vol, ma de venerdi el devi vignir a lavorar. In produzion. El mato est domanda: Ma cosa volemo produr se no gavemo la materia prima? E el mato ovest ga risposto: Cici, in ‘sti giorni go firmà contrati de fornitura per i prosimi do ani. Anda. A l’est diverse dite finiva de produr el mercoledi o el giovedi. I conta, no so se xe vero, ma dovaria eser vero, che la baba ‘ndava in cità a crompar patate. La tornava a casa sensa patate ma con erbete rose e do peri de mudande. Quel giorno i gaveva ciapà erbete rose e mudande. Tuti cioleva quel che i trovava e no quel che i voleva. Ma se ga l’impresion che i gnochi est credeva che ‘pena che riva la Germania i va tuti in Mercedes. I la ciamava Bänz, con una e ‘sai larga e longa, parchè no i ga una bela pronuncia. Dopo la guera i scampava par via dei rusi e i contava de eser nobili (el “von”) e de gaver posedimenti. Un poco come i cabibi nel 1919 col tengo bestiame, tengo banca. Iera un zogo de parole in tedesco. Ich bin ein “von” = mi son un “de”. Po i zontava: von drüben = de l’altra parte. Tradoto a senso se diria: Son un de (la basa). Adeso gavemo la seconda generazion. Mi penso che solo dopo la terza o la quarta generazion, che saria quela che dela Germania de l’est ga sentì solo de qualche libro, le dificoltà e i malintesi ceserà. Ogi le invidie xe ancora tropo forti. Lori i iera abituadi a vignir direti del partito e no i conoseva la cosideta libertà. Dopo la riunion i ga dovesto rangiarse de soli e là i gaveva problemi. Lori i disi: Si stava meglio prima, quei de l’ovest pensa de gaver dado de magnar a quei de l’est. Mi son sta a l’est subito dopo la riunion e go visto in che stato iera le case e le strade. Diversi ani dopo go fato vacanza con la putela, fia e nipotine e go visto la diferensa. Par mi tuto coi soldi de l’ovest.