A l'ingreso, una cinciarella e un petiroso ne ga acolto e ... ne ga fato pagar el biglieto: 3 euri a testa.
(N.B. La foto della cinciarella è andata perduta)
Dentro se camina per ponti e sentieri traciai sule lingue de tera che dividi le varie vali de pesca. I sentieri porta a oservatori che ga la forma dei veci casoni lagunari col teto de cane e che i lasa vardar le bestie abastanza de vizin. Porteve comunque un binocolo.
Xe evidente che, a seconda dela stagion che se ghe va, se trova bestie diverse. Se poso darve un consiglio no ste andarghe in estate e primo autuno: go l'impresion che ghe sia tantissimi musati che ve magna vivi. Comunque, ieri gavemo visto intanto i cigni: ghe ne xe de due tipi, el cigno reale, che se quel che se vedi per esempio a Miramar, e el cigno selvadigo; la diferenza più evidente xe nel beco. La foto de sinistra mostra el reale e quela de destra el selvadigo (no steghe dar significati politici; me xe vegnù cusì, a caso).
Po' ghe iera le folaghe, tute nere (no per gnente el nome scientifico xe fulica atra) co la fronte e el beco bianchi (giusto per far diventar mato co l'esposizion chi che le vol fotografar
) e i moriglioni, anatre co' la testa maron.
Restando in tema de esposizion dela machina fotografica, anche la garzeta se da de far per far diventar mato el fotografo, cusì bianca che la xe. Xe un airon, col colo longo che però ogni tanto el lo tien piegà a S, cambiando completamente aspeto.
Naturalmente ghe iera anche i germani reali e le alzavole, anitre più pice e con una bela mascherina sul muso anche adeso che el carneval xe finì. La foto de sinistra mostra i germani (masurini o mazurini) e quela de destra le alzavole.
Sopratuto, però, ghe iera tante tantisime oche selvadighe de color grigio
Tra le cane se sentiva altri useleti che cantava, ma sentirli xe una roba e rivar a vederli xe un'altra, e no ghe ne fotografà gnanche un.
Xe molto bel el fato che se se xe fortunai se riva a andar bastanza vizini ale bestie e se riva a fa foto anche bele, come questa che purtropo go dovù rimpiciolir per meter sul forum e la perdi bastanza.
L'aqua piata, poi, fa vegnir nele foto belisimi riflesi e diventa interesante anche un cocal che se alza in svolo
Se tirè tardi, tegnì presente che dentro xe anche un ristorante che fa pranzi a base de pese locale. Noi, a dir el vero, a mezogiorno se semo ciapai e semo tornai a casa.
