Locai o locali?

[sono piccolo ma crescero]

Una dele sezioni de sto forum se ciama "Locali". Ghe go pensà su e me son acorto che dopro due parole diverse:

• "locali" per dir "del posto": "enti locali", i "locali e i foresti"...
• "locai" per dir "publici esercizi".

Son solo mi che go sta diferenza o anche altri?

[Zigolo]

Me par coreto: no go mai inteso dir locai nel primo significato.

[Zigolo]

Anzi, dirìa che sussisti la diferenza anche nel singolare: locale (aggettivo) e local (sostantivo)

[babatriestina]

me par anche a mi, solo che me vien el dubbio che se nel elenco scrivemo locai no tutti capissi e magari i pensa "locati" cioè con contratto de locazion..
Però el diminutivo de local xe localin..

[Zigolo]

Locati me sona mejo locadi (anzi, afitadi! )

[AdlerTS]

Orpo, SPMC, te ga ragion

[AdlerTS]

discussion tra mi e mia moglie: orencini opur orecini per "orecchini" ?

[1382-1918]

"Orencini" me sta più simpatico, ma anche mi dopro "orecini". Cioè, mi no li dopro, ma dopro ciamarli cusì!

[babatriestina]

Orencini? mai sentido!

[Nona Picia]

Noi a casa disevimo "orecini", ma tante mie amche diseva "orencini" anche se a mi no me piasi,ma no xe una parola sconosciuta.....

[Zigolo]

Orencini? mai sentido!

La prima volta che go sentido (sarà trenta ani fa) me ga parso cussì strano che credevo fussi una storpiadura inventada. Inveze dopo de quela volta go sentì sempre più spesso.

[AdlerTS]

In realtà el Doria metti come prima version orencini, come dopro dir mi, e dopo orecini, come dopra mia moglie. Mi el secondo me sona troppo "italian resentado", mentre el primo poderia aver una assonanza con hören
A parte quel che considera più giusto el vocabolario, volevo capir qual xe più diffuso.

[sono piccolo ma crescero]

Meto qua, visto che el topic gaveva comincià con una oservazion sul scrite del forum.

Ogni tanto me capita de leger con più atenzion quel che xe scrito sula pagina indice del forum. Legio

I sara` sempre leti con interese e i gavera` una risposta conforme a 'l modo con cui i sara` stadi scriti ... meio fusi se i fusi scriti con garbo e con creanza.

Legio "meio fusi se i fusi" e me xe vegnù un dubio.

1. meio fusi se i fusi
2. meio fusi se i saria
3. meio saria se i fusi
4. meio saria se i saria

Mi gaveria scrito "meio saria se i fusi", la numero 3, ma poderia eser anche influssi de l'italian.

Go numerà le alternative cusì basta che scrivè el numero (femo meno fadiga )

[sum culex]

La numero 3 me sona meio anche a mi e po, sempre secondo mi, va ben anche la numero 1. Le altre due (la 2 e la 4) 'no me gusta'.
Difati la 3 ga più de italian: ...meglio sarebbe se fossero.... ; mentre la 1 ...meglio fosse se fossero..... in italian la xè sgramaticada (due congiuntivi in fila). Per la 2 xè invertido el congiuntivo col condizionale, la 4 po ga due condizionai in fila e me par che gramaticalmente no staghi in pie nissuna dele due.
ciao
sum culex

[babatriestina]

la mia idea xe sempre quela, el triestin xe dialetto ( o lingua) parlada, viva, e se se lo cristallizza in una grammatica xe orori.
Se volemo la version classica, dovessi esser la 2 , col inversion de congiuntivo e condizional rispetto al italian, ma anche la 1 me sona abastanza ben.
Invece devo dir che a mi i fusi me fa pensar ai fusi istriani , che ffdt scrivessi fuxi e che a mi me fa pensar ale fuxie, i fiori deti anche fucsie.
Per cui mi scrivo " se i fussi" con due esse, alla faccia dei Beckmesser che bacchetta chi che osa scriver qualche doppia in triestin. Mi son de l'idea che no se le fa sentir, ma in certi casi scritte le rendi el tuto più ciaro.

A proposito dei orecini de sora, ghi ga scritto " I recini de festa?" mi credevo Giacinto Gallina e invece legio un Riccardo Selvatico. Ma xe teatro veneto.

[AdlerTS]

La 2 xe la più triestina, sicuro. La 3 sona ben perché stemo "resentando" el dialeto sempre più.

[Liuz]

Legio "meio fusi se i fusi" e me xe vegnù un dubio.

1. meio fusi se i fusi
2. meio fusi se i saria
3. meio saria se i fusi
4. meio saria se i saria

Mi gaveria scrito "meio saria se i fusi", la numero 3, ma poderia eser anche influssi de l'italian.

La 3, e no me par dialeto resentado, el modo de scriver de sto ffdt più che de triestin me ga de istrian.