Barcola......uno stile de vita....

[Bilbo]

Dedicado a tuti quei che :
le vacanze più belle xè in branda ai topolini, nudada fin alle boe e dopo in chiosco con Piccolo e biretta!
Non una moda, non una scelta...uno stile de vita!

Per tutti quelli che : l'abbronzatura scatta dall'ustion de secondo grado e la protezion solare xè Oio de Cocco fattore -4!
Per tutti quelli che : la "clanfa" te la gà dentro, altrimenti va a Grado!
Per tutti quelli che : gò passado l'adolescenza distirado sul cemento e ne son vignudo fora più forte!
Per tutti quelli che : ma schizza più la clanfa o l'americana?
Per tutti quelli che : gò imparado a far l'hawaiiana e me sentivo la Cagnotto
Per tutti quelli che : al Bivio xè i " grossi ", al 3° le mamme, 7° e 8° "muleria" , al....e sarà sempre cussì!
Per tutti quelli che : 2 brandine sul scooter no xè intralcio al traffico.
Per tutti quelli che : l'omo discendi dalla scimmia, el Triestin dalla sariandola!
Per tutti quelli che : 800 Lire = Sansonella
Per tutti quelli che : magari solo per un tuffo (toch) ma al bagno no manco mai
Per tutti quelli che : Barcola alla sera voleva dir el Big Ben , al limite el Machiavelli.
Per tutti quelli che : butarse dal terrazin dei Topolini iera "No Limits"
Per tutti quelli che : Barcol(l)a ma non molla!
Per tutti quelli che : andavimo Barcola col Oxford o col Fifty e ierimo i re della costa!
Per tutti quelli che : de ritorno dall' Hyppodrome direttamente a dormir sui scoi senza passar per casa!
Per tutti quelli che : a Barcola dalle 13 alle 15 perchè xè "ora commesse"!
Per tutti quelli che : le ore più belle per ciapar sol xè...dalle 8 alle 20 ful per ful!
Per tutti quelli che : mi vado anche co xè nuvoli perchè se se abbronza de più!
Per tutti quelli che : a partir da maggio ierimo più Barcola che a scola!
Per tutti quelli che : beh, anche nei altri mesi a scola no ghe andavo sai!
Per tutti quelli che : me portavo drio i libri con l'illusion che cmq gaveria studiado!
Per tutti quelli che : ma se te gà de andar sotto l'ombrellon cossa te son vignudo al bagno ?!
Per tutti quelli che : spritz e birette va sempre a numeri primi...1 non è un numero primo!
Per tutti quelli che : zogava a "gnagno" laido e te pescavi col 2 e magari anche col 3.
Per tutti quelli che : zogava a manazza e chi perdeva te ghe davi con le carte de tajo per le onge!
Per tutti quelli che : gà limonado sui pedalò davanti ai Topolini.
Per tutti quelli che : sotto la doccia iazada e dopo dritti in mar che cussì par più caldo.
Per tutti quelli che : gò magnado, gò fatto un tuffo prima de 4 ore e non son morto come sosteneva mia nonna.
Per tutti quelli che : no pensavo ma el spruzzin gà el suo perchè

[babatriestina]

Per tutti quelli che : magari solo per un tuffo ma al bagno no manco mai

magari solo per un tocio...

e po: ben, co piovi se va istesso: no se va al bagno per bagnarse?

[Bilbo]

Per tutti quelli che : magari solo per un tuffo ma al bagno no manco mai

magari solo per un tocio...

e po: ben, co piovi se va istesso: no se va al bagno per bagnarse?

a parte che go riportado paro paro quel che me xe rivado, se inveze de far la profesora, te gavesi coreto subbito no saria stado meio?

[babatriestina]

per l'esattezza no xe una correzion, perchè un tocio no xe proprio un tuffo, presempio mi sti giorni me tocio, ma no me tuffo... però me pareva un'espression più triestina.
Mi no me permetto de coreger se no xe erori de batidura.. o se qualchedun no me disi..

[Bilbo]

però me pareva un'espression più triestina.

e te ga pienamente ragion....

[sono piccolo ma crescero]

Me ricordo che Segulin pare (negozio de fotografia in via Mazini alta, prima in un buseto e poi dove che el xe adeso), co'l serava due giorni intorno a feragosto el meteva el cartel

"son a smoio"

ancora meno dinamica. Podesimo meter ne l'ordine

Son a smoio
vado a far un tocio
vado a far un tufo

[LELA]

Chi se ricorda cosa che jera le "dorade"?
Mio papà el me contava sempre che de zovine lù e i sui amici le le fazeva speso.

Ciau ciau, sempre con tanta simpatia, Lela.

[AdlerTS]

"Dorada" xe una parola che uso comunemente. eppur mia moglie, che per molti versi xe più patoca de mi, non la conosseva.

[Bilbo]

se ricordo ben, la dorada se la nudada fata in apnea, cioè quando un se buta, dopo el continua a nudar soto acqua, fin che ala fine el vien fora.
eco la dorada xe quel "nudar soto acqua".

[LELA]

No' saverìa dirte Bilbo, ma mio papà el parlava de "dorade" cò i sui amici co'i traversava un toco 'sai ampio de mar, par rivar de 'na costa al'altra.
Torno a ripeter, no' sò se xe cusì, ma xe quel che me contava papà jera 'stà roba quà.
Vara par sicurezo son 'ndada a controlar sul "Doria" e la "dorada" la significa pròpio quel che te gà dito ti e no' quel che intendeva mio papà: no' sò se ghe jera do magnere par doprar 'stà parola.
'Deso son de novo 'ndada a controlar sul Doria e, in fine - a parte el tufarse l'andar in barca a remi in t'una zerta magnera - se trova "dorada" come "lungo viaggio fatto tutto in una volta" ?!?

E ti Adler, par cosa de dopri el termine "dorada"?

Ciau ciau, sempre con tanta simpatia, Lela.

[AdlerTS]

La intendo come Bilbo

[babatriestina]

mi no conossevo gnanca el termine

[Zigolo]

Mi no solo fazevo le dorade ma me butavo anche a cavarìo! Chi sa coss'che vol dir?

Ma ghe entra poco o gnente con Barcola perché penso che sia un termine usado solo a Muja.

[sono piccolo ma crescero]

Infati sta parola no la xe sul Doria, o perché el se la ga dimenticada o perché ... no la xe del dialeto triestin.

Mi, che son un "ponte tra Isola e Trieste" no la go doprada mai, ma la doprava mia mama e mio papà sì (e mia nona no se parla): "No sta mai butarte a cavarìo" (co l'acento sula i, come che ga scrito Zigolo, me racomando).

Mi pensavo che la fusi tipica de Isola e infati la go trovada in un un libro "Voci della parlata isolana nella prima metà di questo secolo" che ga scrito Antonio Vascotto (un amico de mio papà); Zigolo ne insegna che i la doprava a Muggia, e mi no la go mai sentida de mii suoceri che xe de Parenzo, quindi al massimo la xe dela parte alta de l'Istria.

Comunque, tornando ala parola, xe un poco più pericoloso e ghe vol eser più bravi a butarse a cavario che no a piron perché se se pol romper l'oso del colo specie se se se buta dei scoi de Barcola, dove che l'acqua no xe sai fonda (e cusì tornemo in argomento)!

P.S. Bel quel "se se se" e comunque 2 + 3 se in poche parole! Come nela frase storica "Se se se senta sora i spini se se sponzi senza saver"!

[Elisa]

P.S. Bel quel "se se se" e comunque 2 + 3 se in poche parole! Come nela frase storica "Se se se senta sora i spini se se sponzi senza saver"!

bel, bel sì!
Però me par che se se se senta sora i spini se se sponzi savendo....e magari volendo? Perchè "i gusti sono gusti" diceva quel tale che si sedeva sopra la ortiche!

[LELA]

Comunque, tornando ala parola, xe un poco più pericoloso e ghe vol eser più bravi a butarse a cavario che no a piron perché se se pol romper l'oso del colo specie se se se buta dei scoi de Barcola, dove che l'acqua no xe sai fonda (e cusì tornemo in argomento)!

Ri- bon pomerigio a tute/i,
ma in conclusion se a "piron" vol dir butarse de pìe, tignindose stropà el naso, butarse a "caverìo" volerìa dir butarse o tufarse de testa?!?

Ciau ciau, sempre con tanta simpatia, Lela.

[sono piccolo ma crescero]

Per mi vo dir proprio questo. Tufarse de testa co le man per avanti.

[Zigolo]

Per mi vo dir proprio questo. Tufarse de testa co le man per avanti.

Sì, se intendeva propio questo.

[LELA]

Grazie infinite Piccolo e Zigolo: me consolo, vol dir che no' son pròpio stupida come pensavo.

Ciau ciau, sempre con tanta simpatia, Lela.