Le conferenze dei G8 e dei G2a.

[Ursus Canadiensis]

Sto ano i membri del grpo delle nazioni più benestanti, el G8 gavarà logo in Canada, precisamente a Toronto. Oltre al meeting del G8, Canda ga anche el dubioso onor de ospitar la conferenza internazionale del G20. In tuto, in sti tempi de "restraint," (restrizion fiscale?) el citadin canadese contribuente doverà sborsar un miliardo de dolari solo per le misure de sicureza e protezion dei membri. Quanti milioni oltre ale misure menzionade che costerà sta mascherada de democrazia internazionale no se sa ancora.

La domanda che se fazemo noi tuti xe la piu semplice de tute le domande, una che i fioluzi in ne la fa zà dal'età de tre ani: "PERCHEEE?"

I vien qua, i se incontra per due o tre giorni, i diventa la bobana per i fotografi, i TV cameramen e giornalisti, insoma tuto un casin de foto oportunità, i se senta venti minuti torno una tavola per leger una dichiarazion per leader, che la xe stada ben studiada a memoria tre giorni prima de venir e che nesun de lori la ga composta ma inveze i se la ga fata scriver dai scriba personali e dopo i torna al'aeroporto, a bordo dei jets privati e via lori.

Tuto sto carneval costosisimo che se ripeti za da ani anorum, storicamente no'l ga mai concluso niente de costrutivo. Che me ricordi mi, no go mai visto el mondo cambiar in seguito a un de sti "importantisimi" meetings" epur, nonostante l'averson de più o meno tuti quei che i la pensa logicamente, i continua a svolgerse come se veramente el mondo dovesi piombar nel' abiso del'armaghedon se i dovesi smeterli.

L'argomento che sti leader mondiali i devi incontrarse facia a facia de tanto in tanto xe fasulo, perchè, al meno nel caso del nostro primo ministro, per esempio, in tre ani lui li ga incontradi tuti e za tante volte; in più, nel mondo dela comunicazion instantanea odierna, ste grandiose mostre de potere, abondanza e luso decadente (el mio ruplan xe più grande del tuo, naa-na-na-naa-naa!) le xe no solo fora posto ma imorali. El mondo, fora che quele venti nazioni rapresentade, el mori de fame e sti qua i spendi miliardi per l'oportunità de fotografarse insieme, miliardi che, spesi con sageza i faria veramente una diferenza a quei che i sofri.

Diseme che son cinico se volè, ma mi per quei pochi soldini che go per goderme i ultimi ani dela mia vita me li go guadagnadi un per un, lavorando e sparagnando, e veder le tase che pago e go pagado sprecade cusì, mentre i sera scole, leti ospedalieri e un devi spetar mesi per farse operar la schena, gamba o quel che un devi operarse, me crea una rabia ceca.

Arnie

[macondo]

el citadin canadese contribuente doverà sborsar un miliardo de dolari solo per le misure de sicureza e protezion dei membri. Quanti milioni oltre ale misure menzionade che costerà sta mascherada de democrazia internazionale no se sa ancora.

La domanda che se fazemo noi tuti xe la piu semplice de tute le domande, una che i fioluzi in ne la fa zà dal'età de tre ani: "PERCHEEE?

Arnie

In Italia, coi soldi del G8, piú de un ministro e altri trapoleri vari se ga fatto case, barche e machine nove...

[babatriestina]

qualche riunion del genere i la ga fatta anche a Trieste, e xe stada un'occasion de far conosser la nostra città. Po se un vol magnar, magna dapertutto, e trova sempre un'occasion.
Savè, mi me preoccupa assai co se senti dir " sta democrazia che no funziona" perchè xe el ritornel che gira prima dele dittature, che dopo spesso e volentieri ghe ga voludo una guerra mondial per farle fora

[sono piccolo ma crescero]

In Italia, coi soldi del G8, piú de un ministro e altri trapoleri vari se ga fatto case, barche e machine nove...

Disemo le robe giuste: "Coi soldi del G8 qualche ministro se ga trovà senza saver che i ghe ga fato un regalo!"

Comunque due riflessioni.

La prima: ga ragion Arnie quando el se domanda che senso che ga far sti incontri, quando esisti ormai la possibilità della teleconferenza. Me ga colpì che, de recente, un colo groso se xe lamentà che i ghe ga meso 5 giorni per organizar una videoconferenza tra ministri europei per coordinar certi interventi (no me ricordo se per la Grecia o per i voli). Forsi, sicome i xe tuti veceti e laureai in legge, no i sa che se pol far anche questo e i pensa sempre che per parlar con un bisogna andarlo a trovar!

La seconda: ga ragion anche Babatriestina. Come diseva Churchill, la democrazia no xe perfeta, ma xe la forma meno imperfeta de governo che semo rivai a far. Prima de sputanarla tropo pensemoghe su e vedemo se la rivemo a far meio.

Quel che go paura mi xe che se stia realizando quel che secondo Chomski xe sta el primo esperimento con Reagan: un omo incapace, bravo solo a presentarse ben e a ripeter quel che chi che lo sosteneva (grandi multinazionali) ghe diseva de dir. Ormai comanda solo lore; Vardemo per esempio el golfo del Mesico; ve par che la BP ga paura de Obama? Forsi la ga più paura de qualche altra multinazionale, magari compartecipada, che inscatola granzi in Loiusiana.

[babatriestina]

La prima: ga ragion Arnie quando el se domanda che senso che ga far sti incontri, quando esisti ormai la possibilità della teleconferenza..

Ma la teleconferenza, se la pol trasmetter per el telegiornal? perchè a volte me domando quanto che sia importante quel che i se disi e quanto inveze quel che compari sui media., insomma che parte del scopo de ste riunioni sia un "farse veder" che i se riunissi.

[Ursus Canadiensis]

La prima: ga ragion Arnie quando el se domanda che senso che ga far sti incontri, quando esisti ormai la possibilità della teleconferenza.. Ma la teleconferenza, se la pol trasmetter per el telegiornal? perchè a volte me domando quanto che sia importante quel che i se disi e quanto inveze quel che compari sui media., insomma che parte del scopo de ste riunioni sia un "farse veder" che i se riunissi.

.....al costo de un miliardo se dolari, e quel solo per la sicureza?

Forsi a Trieste una simile conferenza, ma no al steso livel de leadership, se ga svolto e i coparticipanti i ga gavudo ocasion de visitar Trieste, ma i vari Obama, Merkel, Sarcozy e via disendo i riva coi jet privati pagadi con le tase delae nazioni, pena ateradi i vien trasferidi al sito dela comnferenza dove che i resta praticamente intrapoladi come sorzi i una pignata lustra, i se senta insieme, i recita ognidun la sua parte ben scrita e praticada, dopo confabula per meterse dacordo sul temor del comunicato finale per farghe veder al popolin che bravi che i xe, e i torna al'aereoporto ai jet privat e no se li vedi piu. Esatamente DOVE XE LA DEMOCRAZIA in tuto quel esercizio fole? E, comentando sula nota de "Son picolo ma creserò" sul fatop che ghe ga voludo cinque giorni par arangiar una teleconferenza paneuropea pere iutar la Grecia, comparemo quel sforzo a preparativi che ga za superado un ano per arangiar el G8 e el G20. Me par che no cori spegazioni ulteriori no?

E, visto che semo de strada, demoghe un'ociada ala quota de realizazion dei grandiosi progeti promes in finale de ogni conferenza. Per no consumar tropo spazio, un esempio ciaro e s'ceto: oto ani fa, sti pupoloti durante el comunicato finale risultado dal' incontro torno la tavola rotonda i ga proclamado solenemente che i gavaria investido da mezo a tre percento del budget nazionale de ogni nazion dei G8 per aleviar la fame e combater la AIDS in Africa. Dovesimo eser sai contenti de vede la fine dela fame e del'AIDS in Africa, no? Disemo che quele promese soleni le se ga dimostrado de gaver el steso valor che se i gavesi promeso de svilupar suini che svola.

La democrazia, come la stesa parola la denota, xe la forma de governo detada dala popolazion per el beneficio dela popolazion. No so come che xe le robe in Italia, ma ve garantiso mi che se i dovesi condur un sondagio qua in Canada, saria sai sorpreso, se meno del 10% ghe daria un "si". No! Qua no se trata de democrazia, se trata solo de speci e fumo; trucherie per imbacucar el popolin e farghe creder che i leaders i xe veramente al'alteza dela situazion. Propaganda, advertising, photo-op, ciamelo come che volè... ma no contaminar el termine "democrazia" usandolo per determinar sta farsica e vergognosa sciarada.

Arnie