El mas'cio che za normalmente el ga la carne più rosa dela femina, una volta che el comincia a rimontar el fiume dovhe che el xe nato,el diventa roso fogo. Le femine diventa rosicie anche lore ma le resta piutosto nerastre. La fisionomia del salmon la cambia anche completamente. El muso ghe se apuntisi, la testa par più lunga, con la mandibola interiore che la diventa piu prominente e, la testa che no la cambia color; la resta piu o meno del suo color grigio-blunormale.
Rivadi sul leto de sabia o giara dove che la femina deponerà i ovi, sucedi tuta un' atività sociale, dove le femine se scelzi el mas'cio e viceversa. Fato quel, la femina la se fa un buseto nela sabia, sbatendo la coda a destra e sinistra e la deponi i ovi. El mas'cio pasa sora de lori e el deponi el sperme per fertilizarli. La femina torna a ricoverzerli e la ghe resta sora per protegerli... ma no sai a lungo, perchè finido sto proceso, tuti due i mori.
I pici nati i resta nel fiume per un periodo de un'ano, dopodechè i torna in mar, o nel caso dei nostri salmoni locali, i Kokanee, che xe salmoni originalmente de mar, che però xe restadi blocadi nei laghi, sicome che el Columbia, el fiume de dove che i xe originalmente vignudi el xe stado blocado dale varie dighe, e dunque i xe diventadi salmoni de laghi.
Quatro ani dopo, i torna i rimonta el fiume dove che i xe nati e i se ferma solo una volta rivadi al leto natio, e el ciclo se ripeti.
Sui grandi fiumi, el Fraser, el Skeena el Naas e altri, ste creature dala stamina incredibile le xe bone de farse due e tre mila kilometri... e no bisogna dimenticar che una volta entrade nel fiume no le se nutrisi più.
