Novi autobus

[Piereto]

Ogi go leto che i consegnerà altri novi autobus all'act. Ora no ve par anche a voi che sia un fiatin strano che a Trieste se rinovi el parco machine tanto speso. Intendemose me va,e ne va anche ben che rivi roba nova,ma me domando dove che i trova i bori. So che i xe sai bravi de vender autobus con meno de diese ani a altre aministrazioni italiane,pur tuttavia resta un mistero. Adeso che el piano del trafico xe tornà de novo in alto mare,e i farà un altro novo studio che costerà bori, e quindi colegado al novo piano regolatore che me par che resta per adeso quel del 74,i parla de novo de far via Mazini in zo per i autobus e el Corso in su. Cusì giusto per spender altri bori i strenzerà anche le corsie e i slargherà i marciapiedi. Tuto questo per invoiar i triestini che abita in periferia a far do pasi in centro,perchè se trata solo de questo.I negozi cala de numero,e cala anche i aquirenti,e no xe che se te aumenti le zone pedonali la gente ga più bori per spender. Staremo inveze a veder quanti novi postegi i farà,e quanti sarà a costo zero.

[babatriestina]

mi vedo una sola roba, abitando vizin de Piazza Goldoni, quindi el centro del movimento autobus: che ghe xe sempre più autobus, che xe de spetar relativamente poco,e che pe r mi val la pena de moverme in città a pie co posso, col autobus de norma e cola macchina solo in casi eccezionali. Dove che i trovi i bori, visto che i biglietti no xe cari ( mi me convien i biglietti de dieci corse) e che no credo che rivi a ripagar el servizio.. per cui no fazzo dietrologie e digo : ben vegni!
sul pian regolator go letto un sacco de comunicati, ma no go le idee ciare.. certo xe un'anomalia tutta nostra i triestini che se movi in macchina ( o in scooter) per qualsiasi roba: una città come Berlin xe molto meno trafficada e le foto che vedo fra la Berlin del 89 e quela del 2011 in certi casi differissi solo perchè xe sparide le macchine parcheggiade dapertutto. Noi rivemo sempre dopo le grandi città..

[AdlerTS]

forse i veci i li vendi all'estero !

[Nona Picia]

Mi gavevo sentì che come i tram, i veci autobus finissi al sud!