Son nova, 'pena vignuda.

[Giulia scorcolana]

Me ciamo Giulia, son nata in Scorcola circa mezo secolo fa, stavo zercando foto de Piaza Goldoni prima che i la rovini in quel Dio, e me xè vignù fora una vecia foto, e de soto ieri voi che intervegnivi su 'sto meraviglioso forum.
Me se ga verto el cuor e me son iscrita, perché per mi el mio dialeto xè la roba più bela che ghe xè.

[Giulia scorcolana]

Premeto che son triestina patoca, da parte de mama, uscocchi, mio bisnonno iera pirata, i andava a depredar i veneziani sull'Adriatico, e de parte de papà, iera mandrioi de la famiglia Necker in Scorcola, in alto de Via di Romagna e son pronipote de l'omo vespa.

[Bilbo]

dona zanzara tigre?

ben arivada....te ga cosa zercar foto e storie qua de noi.-

[VetRitter]

pronipote de l'omo vespa.

ben rivada..

[Nona Picia]

son pronipote de l'omo vespa.

Benrivada Giulia scorcolana! Un giorno te ne conterà la storia de l'omo vespa

[Elisa]

Me se ga verto el cuor e me son iscrita, perché per mi el mio dialeto xè la roba più bela che ghe xè.

Mi compiaccio del tuo sentimento verso il tuo dialetto. Qui te lo puoi godere!
Benarrivata!

[Giulia scorcolana]

dona zanzara tigre?

No stame gnanche parlar de mussati tigre che go pena ciapà un sie beconi sul brazo

[Giulia scorcolana]

son pronipote de l'omo vespa.

Benrivada Giulia scorcolana! Un giorno te ne conterà la storia de l'omo vespa

Si, zio Carletto iera un tipo 'ssai strano, el gaveva sempre fredo e el se costruiva da solo stufe eletriche, le gaveva dappertuto, el se ga perfin costruì una camera drento la camera in faisite, e drento el gaveva el letto, el dormiva in una specie de scatolon insoma.
El sonava l'organo, el se serava nele sue camere e la el stava tuto el giorno, de sera el vigniva zo, e per zena el se cioleva sempre un bicier de vin rosso e un toco de pan, e po' el fazeva sope col pan nel vin, quela iera la sua zena, iero picia ma me ricordo come se fussi ieri.
Quando che povero el xè defonto, do' mie cugine xè 'ndade veder come vestirlo e no le ga trovà niente de bel, e le ghe ga messo su quel che le trovà in giro.
Una volta sepolto, sempre lore, le xè 'ndade veder cos'che'l gaveva in 'ste camere, e le trovà un baul, de quei bei, in pele e corame, drento iera un vestito novo con un biglieto che gaveva scrito "Vestito per l'ultima dimora" povero, lui inveze se sta sepolto con roba usada. e sempre drento el baul, iera un altro bauleto più picio, (come la camera dentro la camera) con su scrito "ricordi dela giovineza" e drento iera 'sti legni con un ciodo in zima, ma miga aghi fini! Iera proprio ciodi, quei pe'l legno, assieme al foio con le parole dela canzon.
E po' se sta fata mente locale, lu' de giovine stava a Roian e lavorava a San Giacomo, el ciapava tuti i giorni i tram per 'ndar al lavor e tornar a casa, e i tram iera sempre fissi de gente in quei tempi, no iera machine ancora in giro.
So che par de sentir le Maldobrie ma xè la verità!

Go trovà un sito che parla de lu' ma no xè proprio esato, perché pareria che lui sponzeva le ciape sui tram e no de note per le strade come che conta qua.

[Nona Picia]

Grazie! La storia xe comunque interessante....Sto avo stranissimo che viveva "in una scatola" deltro la camera,che sonava l'organo e magnava pan e vin......e sponzeva el dedrio dele putele con un "ciodon"!!!

[Ciancele]

Cara Giulia scorcolana, anca mi son de poco, ma te auguro (e auguro anca a mi) de restar per tanto qua. Perché te dago el “benvenuto”? Perché, de quel che vedo, parlemo la stesa lingua, cioè el tuo dialeto e el mio xe più compagni. Forsi perché mio nono stava a Scorcola (86)? Quando? Qualche ano fa. Quanti ani fa? 140.
Te invidio anca, parchè ti te pol cantar: Mio nono pirata lupo de mar con un gusso el ‘ndava a bordizar. El ciapava le balene con un ago de paion fina a quando che el xe stado divorado da un sardon. Ecc. ecc. I mii antenati (da parte de papà sloveni, da parte de mama croati) vien inveze de l’est. Forsi disendenti de Gengis Can. Forsi par questo go el fassino slavo.
PS: Nona picia: No ciodon, puntariol!