Sfoghi

[Ciancele]

Piove, governo ladro! Quante volte no gavemo sentì ‘ste parole. Ma el governo xe veramente ladro co’l manda piova? O el xe inveze bon? Xe piova e piova. Co’te gà de andar a lavorar, e par strada la vien zo a mastele e te son senza ombrela e senza goldon (impermeabile), la piova xe bruta. Me ricordo del mio amico Kurt (a Trieste) che el xe vignù de mi e el me ga domandà de darghe la mia giaca. Altrimenti el gavaria dovù star sentado in topless. Col suo torace de musato nisun gavaria gnanca vardà. Ma se te son coverto la piova xe bela. De putel stavo ala finestra e vardavo la piova che vigniva zo. La mia finestra iera in suto parchè la piova la vigniva par treso e iera quei difronte dela corte che doveva tignir la finestra serada par no imbarcar aqua. Più tardi, par talian se diria in età più matura, iero in vacanza a St. Ulrich (Ortisei par quei che no sa), paese indove che xe nato Luis Trenker, in un albergo che no nomino anca se i meriteria parchè i iera ‘ssai cocoli, a meza pension. Una sera, dopo magnà, iero sentà sul balcon. E la ga comincià a vignir zo a bigoli, come un parede de aqua, de no veder a tre metri. E mi sentà in tal suto, col bicer in man. Bicer pien naturalmente e naturalmente no de aqua ma de Refosco dal Peduncolo Rosso. Se vedi che quela sera gavevo la vena poetica, parchè go dito: Gabriele (quela volta se daimo del ti), se no te la gavesi za scrita ti, la gavesi scrita mi: la poesia La piogia in tel pineto.
PS: Scuseme ‘sto sfogo.

[mandi_]

Quanto me dispias no saverte risponder en triestin...me pareva quasi de sentir la piova che vigniva zo a mastele, a bigoli, come na parede...
A volte xe bel star en silenzio, pensar e lassar che piova...
A volte vago su la me teraza, cuerta da na pergola col glicine, e vardo el ciel e vardo le righe che ven zo come spagheti e me par bel...

[Nona Picia]

In estate me piasi anche mi la piova, sopratuto sentir el rumor dela piova che casca......

[sum culex]

Piove, governo ladro! Quante volte no gavemo sentì ‘ste parole. Ma el governo xe veramente ladro co’l manda piova?

Piovi governo ladro: quante volte gavemo dito sta frase!
Ma se no piovi el governo xè ladro lostesso
ciao
sum culex