SARDONI IN BIANCO

[Ciancele]

Son Piccolo Ma Crescerò! Mio amico sardonofilo! Te son la mia ultima salveza. Mi zerco sempre e ancora la riceta per far i sardoni in bianco. Me manca sempre qualcosa. Qualche volta go l’impresion che me manchi i sardoni. Co’ i riva qua i xe come Tutancamen. Ma no voio perder la speranza. Te li sa far? Te conosi qualchidun che li sa far? Alieta con la riceta i ultimi (venti) ani dela mia vita.
PS: No ocori che te se fazi furia. Sicome che prima de ‘ndar nele praterie celesti devo spetar che la Triestina vadi in A, te ga tanto tempo.

[babatriestina]

ma quei cotti o quei crudi, te disi?

[Ciancele]

ma quei cotti o quei crudi, te disi?

Grazie Baba. Go za dito una volta. I crudi xe le famose alici distese. I coti se in bianco, senza pomidoro. Mia mama li fazeva in una farsora con un poco de oio, aqua, limon, parsemolo e aio.
Forsi me tocarà far come sul mio libro de fisica: Provando e riprovando.

[babatriestina]

e alra te gavevo za dado la rizeta mi.. copio:

a mi i me ga insegnado una, semplice, te metti i sardoni, netai, in tecia e te li coverzi con un fil de oio, bastanza limon e un poco de persemolo. Te coverzi e te dà una boida. basta che i diventi bianchi.

Ovio sal e pevere a piazer.. Adesso che ghe penso, mi el persemolo lo meteria dopo cotti che el resti fresco, se no vien fiapo.
Per mi però xe meo fritti. Anche no impanai, se se ga furia, solo netai e infarinai. Se i xe de bona qualità i xe dolcissimi e diria se senti meio el gusto

[Nini Naridola]

Forsi me ricordo come che sul Geomar un cogo de bordo che'l iera de Grado o de Cioza el ne gaveva fato i sardoni in bianco:- Netar i sardoni, cavarghe la testa e 'l spin e verzerli a libro. Preparar un trito con do carote, do corbe de selino, una zivola e un spigo de aio. Metter in una tecia bassa un bicer de oio (naturalmente extra vergine de oliva) e far disfrizer a fogo lento per meno de 10 minuti (7 ??) zontando un poco de sal. Se tira via del fogo la tecia e se cominza a stivar i sardoni a strati metendo un poco de sal e de pevere. Tornar a meter sul fogo, zontar un otavo de bianco e far cusinar col covercio per un 10 min.(forsi anche meno). Ala fin una spolverada de prezemolo (coto el xe tossico pei gati!).
Mia moglie li fa in una maniera più semplice: senza el trito. Oio e sardoni stivadi con caperi.