Son de novo a casa. El mese de april xe el mese de tanti avenimenti. Nasite: 15, 17, 19. Anca el 20 me ricorda un compleano, no so più de chi. El 21. Roma. El 25 (1945) iera la mia chiamata ale armi. Ciancele schierato inte l’esercito del Terzo Reich contro tuto el mondo. Un fortunon che no i me gabi dado colpa de gaver perso la guera, parchè iero anca mi ..... El 21 xe stada anca la cresima del mio nipotin, a 300 km de distanza. Tuti i me ga dito: Papà, nono, te son vecio, no te pol far tuto de un tiro (nonstop) el viagio de ritorno a casa. Li go scoltai, go fato 100 km de più e go dormì sula Mosela. La sera in albergo, iero sentà in teraza con un bicer de bianco davanti (e la botilia de drio) e vardavo l’aqua che scoreva davanti, de l’altra parte dela strada. La Mosela mormorava calma e placida al pasagio de Ciancele el ventido del mese prima de magio. O: La Mosela mormorava calma e placida come in barile al pasagio del Ciancele el ventido de aprile. Lodeme pal sforzo de far la rima, dai. So che la rima xe bela e bona.
Nela mia prosima vita me imparerò a far foto e ve mandarò una. Forsi Baba Triestina ga qualcheduna che ghe vanza e ve pol far veder che bela che xe la Mosela.
La Mosela ga una parte importante nela mitologia e nela storia dela cultura tedesca. Se parla de Vater Rhein (Padre Reno), una specie de fiume dela patria, e de Mutter Mosel (madre Mosella). Sora Rüdesheim xe el famoso monumento fato dopo la vitoria del 1870 sui francesi, dove apunto se parla del padre Reno e dela madre Mosela. Tuti va a vederlo. Batù de cinciuncian (Pieno di giapponesi) e de americani. La Mosela se buta (confluisce) nel Reno a Coblenza, nel Deutsches Eck (Angolo tedesco). Altro monumento. Altra foto. Voi podè veder tuto in internet fazendo Deutsches Eck e no dovè spetar le mie foto. Merita.