Tullio Sartori

[AdlerTS]

Za che sti giorni semo in vena de Poesie, ripropongo una che go trovado su un libretto del 1991. La trovo "tenera":

Fantasmi

Maria Teresa e Franz co' la sua Sissi
vigniva - un drio un - zo per un troso
e i se fermava in un quadratin ombroso
ai piè de l'obelisco. I oci fissi
sul nostro mar (per meio dir nel svodo)
coi brazi solevai sul vecio porto
come a voler protegerlo in quel modo,
stava la vecia. E del passato morto
la ghe parlava a le ombre de do' sposi
che i scoltava ziti e rispetosi:

Co sta zità iera imperial e regia,
bragozi e vele coverzeva 'l mar...
'desso su l'acqua naviga e galegia
solo i cocai che zerca de magnar.

Morto xe 'l mar, ma vive de bacan
le vece vie del Borgo Teresian.

E stando a quel che de quassù se vedi,
no' passa 'na caroza de casada,
ma scatole de lata piturada
che spasima la gente che va a piedi.

Me par vestidi tuti un fià a la bona
e no distinguo l'omo da la dona.

E Franz, co' un soriseto a l'antenata:
In sta zità go avudo bei momenti:
co son vignudo qua, i festegiamenti
ga fato diventar la gente mata.

Imbandierade fin le barache,
aquile con do' teste che non ve digo
quante che iera... e mi co le patache
sula montura, iero tropo "figo".

Magari al posto dela zala e nera
qualchidun sventolava 'na bandiera
con tre colori: forse che i triestini
i me voleva ben, ma ... fioi de cani....
co la mania de diventar 'taliani
a volte i iera proprio peverini.

Pazienza Franz, ghe fa Maria Teresa:
vardime qua sbiadida e disadorna,
i nostri xe bei tempi che no torna,
ne el mio ne el tuo, dimentica l'offesa
se de Trieste el popolo mostricio
el ga voludo un Re un fià più picio.

E ti, Sissi, che te ne scolti e tasi
va a dirghe co' la tua boca de basi
a quei siori la zo, sentai in Comun
che le svode promesse più nissun
ghe credi se no i tira presto fora
quela tua bela imagine de piera
che xe el tuo monumento... e che xe ora
de meterlo de novo la che 'l iera.

Le tue lodi, antenate, me confondi:
Sarò contenta - Sissi ghe rispondi -
se el voto del consilio comunal
me metarà de novo in piedistal
a vederme Trieste che lavora
in alegria e sentir boche de fioi
nel bel dialeto che qua i parla ancora
dopo esser stadi per secoli con noi.

E qua se guarda i tre nei oci svodi,
bianchi fantasmi persi nel caligo:
lù movi un passo, cavalier nei modi,
de stechi e foie distrigar l'intrigo
e po' i sparissi... per el stesso clanz
Maria Teresa e Sissi col suo Franz.

[Nona Picia]

Bela, Adler, dolce spiritosa nello stesso tempo.

Te sa che l'abita in via Sinico e che el ga quasi 90 ani? Anche mi go un suo libro de poesie, el se ciama"Xe de pensarghe sora". E adeso mio marì ga trovà anche el segnalibro che gavevo messo proprio su quela poesia che te ga messo ti.

Ciao ciao

[AdlerTS]

Te lo conossi de vista o de persona ?
Te ga voia de zontar un'altra dal libretto che gavè trovado ?

[Nona Picia]

Sarà fatto dopo che go finì co le pinze!
Lo go conossù una volta alla fermata dell'autobus che ghe contavo a una signora de una recita in ricreatorio indove che i fioi gaveva recità diverse sue poesie.
Ciao ciao

[Nona Picia]

I'un cofaneto el sol imprigionar
del vecio campanon che sona a festa
e un fior del Carso, un cuciarin de mar
eun mussolo de quei che ancora resta:

un ragio caturado al nostro Faro,
un sasso lisso ciolto al "Pedocin"
e un ultimo ricordo dolze-amaro:
una picia alabarda e un melonzin.

Nel cofaneto pien de nostalgia
cussì confezionà, tuto nostran,
per farlo più triesin ghe zontarìa
un fià de bora, un dedo de teran

e 'na bela medaia col San Giusto.
Po'mandarìa pel mondo 'l regaleto:
quanti emigrai che pianzerìa de gusto
trovandose Trieste "in cofaneto".

[AdlerTS]

Fantastica !

[Tirabaralla]

C'est vrai!

[ffdt]

La xe teribile ... robe che pianzo anche mi con tuto che no son emigrado ...