Intelligenza artificiale

[Blues Briso]

Go fato altri esperimenti con l'ai, e ala fine confermo che el grosso problema xe che no se riva a limar quel che le fa o a farghe coreger solo parti specifiche.
Gavevo leto de gente che fa programi senza scriver una riga de codice. Alora mi che no so niente de programazion, go provado a far un porting de un programin opensource che conosso bastanza, da java a phyton, go provà sia con claude che gemini, inutile dir che no go rivà: tute e due le se incarta perchè no le xe bone de coreger solo parti specifiche del programa, le rigenera tuto tornando indrio e rifazendo i stessi erori che ghe gavevo fato coreger. Stessa roba xe sucessa co go provado a farghe far un storybook a gemini, ogni volta che volevo farghe coreger qualcossa la rigenerava tuto, tornando a far i stessi erori che ghe gavevo fato coreger. Ma go notado sto comportamento anche in altre interazioni che go vudo.
Pel momento no so come i altri riva senza scriver codice... mi me sa che un poco no i xe del tuto onesti...

[Blues Briso]

xe un articolo sul alarme (forsi esagerà, ma forsi no, visto che magari la sarà anche inteligenza, ma pel momento no la ga tuta sta "cosienza"...) che xe stado lanciado da un dei sui creatori.

[Blues Briso]

un altro articolo su un sienziato ch'el metti davati ai posibili ris'ci del Ai

[sono piccolo ma crescero]

L'articolo che te citi disi

la teoria ci sta mostrando che se hanno un obiettivo non allineato ai nostri, potrebbero decidere di perseguirlo con ostinazione, qualunque siano le conseguenze per noi.

e me ga impressionà quando ghe go domandà, credo a gemini, una trduzion del tristin e el me la ga fata sbagliada; alora ghe go dito che per mi el ga sbaglià; e lu no che xe giusto e mi che no che el sbagli e lu che no che ga ragion lu. Lo go mandà in .... e go lasà perder. Ma se le sue decisioni dovessi eser su cosa far co l'auto a un incrocio....

Bastanza tempo fa ghe gavevo comincià a domandar de risolverme i problemi che se trova in sto libreto: https://www.delise.it/paolo/matematica/problemi.php Naturalmente el primo no'l lo saveva risolver. Alora ghe go spiegà la soluzion. Po' ghe ne go pasado un altro, stesa storia. E dopo me son domandà: "Ma perché devo farlo diventar più bravo" e go smesso.

Adesso me comincia a dar fastidio che co zerco qualcosa google me rispondi con la sua IA. Mi, per el momento, me fido più de wikipedia, reddit ecc. Come sistema operativo dopro linux. E qualche volta me capita de domandar come che se fa qualcosa. La riposta dell'IA, che xe la prima che el meti,. xe molto interessante, perché te disi: prima fa questo, dopo fa questo, ... Bon xe più le volte che me ga dà risposte sbnagliade de quele che me le ga dade giuste. E mi comincio a doprar https://duckduckgo.com/ che xe un poco meno bel, ma no me comincia a dar le risposte dell'IA o dei siti che paga. E per farghe dispeto, dopro sempre firefox, ma co devo doprar duckduckgo, dopro chrome!

[babatriestina]

a mi me par che sta IA , ma a livello de quel che trovemo noi, gratis, sia solo un che ingruma e meti in bela forma quel che el trova sul web. Voio sperar che quel che i sta studiando e aprofondindo sia altro livello

[sono piccolo ma crescero]

Caustica vignetta sull'intelligenza artificiale ed il suo impatto sulla nostra vita

https://www.arcamax.com/thefunnies/carpediem/s-3850778

[Blues Briso]

a mi me par che sta IA , ma a livello de quel che trovemo noi, gratis, sia solo un che ingruma e meti in bela forma quel che el trova sul web. Voio sperar che quel che i sta studiando e aprofondindo sia altro livello

In realtà la rispondi con quel che la trova (ma no sempre xe correto), inveze quel che no la trova la lo buta là con un calcolo probabilistico che ghe da come risultato quel che par che possi esser quela che podessi esser giusta come risposta... anche ad alto livel, per quel che so mi.

[sono piccolo ma crescero]

a mi me par che sta IA , ma a livello de quel che trovemo noi, gratis, sia solo un che ingruma e meti in bela forma quel che el trova sul web. Voio sperar che quel che i sta studiando e aprofondindo sia altro livello

In realtà la rispondi con quel che la trova (ma no sempre xe correto), inveze quel che no la trova la lo buta là con un calcolo probabilistico che ghe da come risultato quel che par che possi esser quela che podessi esser giusta come risposta... anche ad alto livel, per quel che so mi.

Sarà senza dubio ad altro livello, ma el sbaglio ghe xe sempre. Ala base de l'intelligenza artificial ghe xe programmi e "ogni rigramma ha almeno un errore dentro". Lo gavemo visto nel 94 col pentium che sbagliava le divisioni (un sbaglio, quindi, a livello bassissimo dentro la cpu), lo gavemo visto nel 98 col Nasa Climate Orbiter che se xe schiantà su Marte perché qualche programma fazeva i conti col sistema internazionale e qualche altro in pollici. Progetti e programmi senza dubbio controlai fin nei minimi particolari. E drio de l'intelligenza artificial ghe xe programmi...

Se zerchemo nela cronaca trovemo de auti con tanto de IA che xe partide de sole, che ga ciapà fogo e nisun rivava a verzerle per tirar fora quei che iera dentro perché le se iera serade, xe a lieto fine quel de quel inglese che no rivava più a fermar lauto e ga ciamà la polizia che metendose davamnti de l'auto xe rivada a fermarla.

E chi xe responsabile in sti casi? Elon Musk o el paron de l'auto?

I le ciama allucinaziioni. Se mi son alucinà e combino na capela, no son responsabile: "incapace di intendere e di volere" E se l'alucinà xe un programma? Confesso, ma ga preocupà sai quando me son meso a discuter con un de sti programmi e no son rivà a spiegarghe che el sbagliava. Se gavessi discussso, inveze che del dialeto triestin, su se tirarghe col s'ciopo a un omo che pasava, come la saria finida?

P.S. a proposito de sbagli, la lege de Murphy (quela vera) disi che se ghe xe una sia pur minima probabilità che un evento se verifichi, basta spetar bastanza e el se verificherà. E dopo 50 anni che lavoro coi computer, go spetà bastanza, me se ga roto el disco e go perso tuto. Aplichemolo pur, adesso, all'intelligenza artificial.

[Ciancele]

Mi me misio parchè lavoro 'sai con la AI (o IA). Mi la uso ogni giorno e tante volte al giorno. Ma con juicio, come che diseva quel. E devo dir che la me xe veramente de aiuto, se la dopro con juicio. AI fa una traduzion anca longa in poco tempo. Ma la xe giusta? Se la xe semplice, la va ben. Se no la xe semplice, la me servi solo se saria bon anca mi de farla. Se AI trova un vocabolo solo, sperso, el ga problemi. Meto sempre la parola Schraube. Come la meto par talian? Dipendi dal contesto. Schraube vol dire vite, coclea, elica, veciaza. Meto vite: al singolare xe mecanica o vin. Al plurale xe la vita. No sempre AI sa cosa meter. Devo anca dir che mi me servo de AI come vocabolario. De qualche mese a 'sta parte vien una longa spiegazion de AI, che la me par 'sai inteligente. Mi go fato l'esperienza che se so parchè, me xe 'sai più facile capir el fato. In futuro gavaremo sempre più AI. Col tempo miliorerà anca la qualità. Almeno tanti i lo disi. Sperate bene. No digo speremo, parchè mi go qualche aneto che pesa.

[babatriestina]

adesso go ciolto un novo celular. quei che fa foto anca cola AI. bele, devo dir. El decidi lu se xe ritratto,fior, noturno.. e bvien ben.
però.. me vien n mente quando che xe vegnude fora le prime machine fotografiche automatiche. papà che gaveva machina tuta manual, meteva lu distanza, apertura, tempo.. le ciamava " machine dei mone" perché el diseva che anche un tandul pol far foto bone con sta machina... in realtà bisognava inquadrar ben e mama no sempre fazeva giusto..

[Blues Briso]

Sì Baba, te ga ragiòn, la tecnologia dovessi servìr per semplificar le robe, che cussì anche un "mona" possi far una roba senza tanto bazilar. El problema secondo mi, xe che al de là de quel che te "inquadri" la AI la te torna una foto che ga deciso ela, no quel che te ga "inquadrado" ti...

[babatriestina]

Sì Baba, te ga ragiòn, la tecnologia dovessi servìr per semplificar le robe, che cussì anche un "mona" possi far una roba senza tanto bazilar. El problema secondo mi, xe che al de là de quel che te "inquadri" la AI la te torna una foto che ga deciso ela, no quel che te ga "inquadrado" ti...

per quel , iera istesso co la machina automatica comprada quasi mezo secolo fa a Hong Kong...

de solito sta Ai intuissi ben quel che volessi.
per el inquadratura.. ben no volevo contar che povera mama no xe più, ma... ela gaveva sempre dito che no la xe fata per la tecnologia, cussì la evitava de far tante robe, ma me domandavo perché co l a me fotografava me trovavo sul canton dela foto o anche una famosa che la me ga ciapada tuta meno la testa: e dopo go capido: papà ghe gaveva dito "sera el ocio e guarda nel mirin" ela serava el ocio del mirin e la vardava col altro!!!

[Piereto]

Credo che alla fin fine la ia la sia utile, ma......dovemo sempre farse 4 domande e anche i futuri utilizzatori. Dove, quando , come doprarla, e da chi che la xe gestida. L'ultima domanda xe la piu importante. Se la gestisi un ente pubblico, ben, perché in qualche modo democraticamente se pol intervenir, mal se la dipendi da un privato , el la gestisci de sicuro solo per i sui scopi.

[Blues Briso]

Te dago ragiòn, ma oggi semo in man ai privati (grossi gruppi) che la sviluppa...

[angelo]

L aministrator solecita a scriver de piu!! voi che se bravi continue sul topic, che xe interesante ,ma sto colpo parle sul IQ e dei test che se pol far a gratis, dove mi me go refa il 90 % de IQ , e me disi che son bravo e per 19 dolari canadesi me refo un certificato che atesta ''go paura e scometo'' che lori ime da il resto del10% de IQ e me fa UN GENIO!!! ma varda ti. mi no ghe dago i 19 dolari.......dove il famoso presidente de vicin de casa, se vedi lu ghe da i 19 dolari per ciamarse un GENIO. inutile l'omo ga soldi'.

[babatriestina]

savè, mi penso tante volte al linguaggio. i disi che xe la roba che ga fatto far un salto de qualità ai primi omini rispetto ale bestie... ma a volte i se zoga cole parole. le robe xe una roba e i nomi xe un altro : come che diseva qualchedun una roba xe aver el nome de una moneda de oro e un altro gaverla in scarsela. Cussi intelligenza e artificial sopratuto intelligenza. Un concetto che no go mai savudo definir e che i cosidetti test de intelligenza misura solo rispettivamente a certi aspetti che xe sopratutto psicologia de chi che fa la domanda. mi no savessi dir che che xe intelligente chi che xe più o meno intelligente ( quindi misurar!) e chi che xe mona preferisso dir che se comporta de mona che xe una roba diferente . Magari el xe inteligentissimo ma nol mostra..
e cussì sta roba artificial i la cima inteligenza e cussì la gente comincia a gaver paura odiio le machine sarà più inteligenti de noi? ( vien de dir : più de qualchedun che conosso forsi, ma xe un viz!). finora go visto machine ben adestrade, che s a far ricerche aprofondide su internet- perché fora de internet no le riva!!!- le le scrivi con grazia copiano e ispirandose a scriti d eperosne vere, o magari a modelli che a loro volta se ospira a scritti de persone vere..
ma se i ghe cambiassi nome? inteligenza mecanica? elaborazione artificiale?
savè pensemoghe ben, mi sempre più ghe penso che a volte le parole condiziona el pensiero: per dir i " poteri forti" che te fa sospetar una congiura planetaria.. un poco come la stregoneria nel Medioevo- e anche ricordemno nel rinascimento sopratuto tedesco: te disi che xe " stregoneria" strighez e a questo punto nol se pol più difender.

[sono piccolo ma crescero]

Mio fio me ga dà de leger un libro su l'intelligenza artificial: Paolo Foglio, Machinità, ed. Töpffer.

In una pagina, prima del primo capitolo, el riporta tre pensieri che me par profondi. Se legendo troverò qualcosa de interessante, ve lo riporterò.

"lo non voglio che l'IA faccia il mio mestiere così che io abbia il tempo per lavare i piatti e pulire il pavimento, lo voglio che l'IA lavi i piatti e pulisca il pavimento per me in modo che io abbia il tempo per fare meglio il mio mestiere"
Joanna Maciejewska

"Siamo di fronte ad un linguaggio senza pensiero, ad una simulazione di intelligenza senza intelligenza, ad un teatrino della coscienza senza coscienza"
Giuliano Pozza

"L'intelligenza artificiale non prevede né tantomeno predice. L'intelligenza artificiale scommette"
Paolo Foglio

Al momento, in base ala mia sensibilità, me piasi sai i ultimi due pensieri. El primo lo vedo più come una batuda.

[babatriestina]

la prima me par superada: Roomba e la lavastoviglie se de qualità ga za el AI e me lassa el tempo per el resto
la seconda torno a dir: mi cossa che sia intelligenza e coscienza no savessi dir. come no savessi ben definir, anche el pensiero.. e no savendo definir, no posso dir cossa sia e cossa no sia

el anima ( che però adesso xe meno de moda citar)
Sula terza diria che xe come za la statistica per el futuro

El container ga eliminado scarigadori e sessolote, el automobile ga eliminado caroze e cucer, l'istruzion ga eliminado el scrivan publico, la lavatrice ga eliminado le lavandere...

[Blues Briso]

ma se i ghe cambiassi nome? inteligenza mecanica? elaborazione artificiale?

Te ga ragiòn. Mi diria che elaborazion artificiale xe la più coreta. Ma lassa fora el conceto de "scomessa" che fa l'AI nel suo "elaborar".

"lo non voglio che l'IA faccia il mio mestiere così che io abbia il tempo per lavare i piatti e pulire il pavimento, lo voglio che l'IA lavi i piatti e pulisca il pavimento per me in modo che io abbia il tempo per fare meglio il mio mestiere"
Joanna Maciejewska

"Siamo di fronte ad un linguaggio senza pensiero, ad una simulazione di intelligenza senza intelligenza, ad un teatrino della coscienza senza coscienza"
Giuliano Pozza

"L'intelligenza artificiale non prevede né tantomeno predice. L'intelligenza artificiale scommette"
Paolo Foglio

Al momento, in base ala mia sensibilità, me piasi sai i ultimi due pensieri. El primo lo vedo più come una batuda.

Mi inveze vedo anche che el primo aforisma gabi el suo perché, se lo contestualizemo nel senso de dir che la AI ga de eser un susidio, no la ga de esser una sostituta che la ne porta a no evolverse (ma anzi la finissi per farne involver) La dopreremo per cossa? Per farne scriver le nostre robe? Per farne scriver la nostra musica? Per farne far i nostri disegni? Per far i conti al posto nostro? E noi cossa faremo? Se rinc... rimbabiremo vardando o scoltando quel che la fa? Che dimensiòn umana gaveremo dopo? Boh.

[sono piccolo ma crescero]

Mio fio me ga dà de leger un libro su l'intelligenza artificial: Paolo Foglio, Machinità, ed. Töpffer.

Go leto una sessantina de pagine su 250 (lo tegno in machina e lo legio spetando ie nipoti fora de scola). Per el momento el me par interesante. L'autor xe un ingegner che se xe ocupado (se occupa) de intelligenza artificial.

Stago legendo anche, la sera prima de 'ndar a dormir, un altro: Ian Stewart, Le 17 equazioni che hanno cambiato il mondo, ed. Einaudi.Una xe el teorema de Pitagora e altre 15 le conosevo più o meno, la 17esima xe un'equazion differenzial ale derivate parziali che vien doprada nei mercati azionari e che, secondo l'autor, xe la causa de l'instabilità dei mercati stessi. No ste ver paura, no'l tenta de risolverla e gnanche el ve la spiega; el la presenta e po' el parla de come che funziona i mercati finanziari e del perché dele crisi, de come che funziona i derivati, i edge funds, ecc. Interessantissimo e, col senno di poi, ligado a l'intelligenza artificial. L'autor xe un profesor emerito de matematica a l'università de Warwick.