Non so se ve go mai dito che mia bisnona vendeva formaio in Piazza delle Legna. Logicamente non la go mai vista, i me ga contado. Me par una roba lontana 1000 anni.
Le uniche venderigole che me ricordo iera quele de Ponterosso, che ormai nianche non xe più (xe un postegio e do africani che vendi maiete).
So che i regolamenti comunali prevedeva che ogni piazza gavessi le sue merci specifiche, cussì in Piaza Grande i vendeva solo formaio, risi, fruti e limoni, inveze in Piaza Gadola (ogi della Repubblica) iera anche le papuziere furlane ed in Piazza delle Legna i vendeva anche picie besti (polli, conigli) e minestra pronta per i più poveri. El tuto sotto i oci vigili dei Commisari di mercato (con la coccarda rossa e bianca sul capel) che la gente ciamava le guardie del radicio
El Marktordung del Tommasini del 1842 prevedeva che l'unica roba che non se podeva vender iera i alcolici e che le uniche che gaveva la deroga a vender fora della piazza iera quele che vendeva latte. Po iera le venderigole "de canton", che iera quele che non gaveva un suo posto fisso e se meteva dove le trovava posto.
Forse coi oci de ogi saria tropo remitur veder tuta sta roba in strada, però doveva darghe tuto un altro clima, più umano, alla città.
