negozi che verzi, negozi che sera..

[babatriestina]

Anche el negozio de vestiti da sposa de via Mazzini sta serando !

Sì, la Serica. Oltre che vestiti de sposa, i vendeva stoffe, co ghe iera le sarte o la gente che se cusiva i vestiti de soli. Anche mi co gavevo sui 20 anni mama me cioleva stoffe ala Serica che po la sartina me fazeva i vestiti eleganti. Me ricordo i vestiti de cadì.
Anche Rustia, che vendi stoffe, adesso vendi anche accessori. Xe un genere che ga sempre meno mercato.

[Nona Picia]

Sera anche el "Nastro Azzurro" che no xe un negozio, ma un ristorante sulle rive. E el "Bragozzo" sembra che el passi alla gestion cinese.....

[babatriestina]

Sera anche el "Nastro Azzurro" che no xe un negozio, ma un ristorante sulle rive. E el "Bragozzo" sembra che el passi alla gestion cinese.....

El Nastro Azzurro de anni no ghe andavo più, che iera diventado troppo caro, e no so quanto che se magnava ben come una volta- za i ristoranti cambia e soprattutto i chef passa de un al altro. Per i cinesi, mi go letto sul Piccolo che i parla no del Bragozzo ma del Bagutta triestino in via Carducci. Abitavo quasi di fronte e no ghe son mai andada nè go sentido de qualchedun che ghe andassi, el gaveva ssai l'aria de svodo.. de quele parti tien sempre Menarosti,in via del Toro.

[Nona Picia]

Li confondo sempre....

[babatriestina]

Nota de moderator: go spostado questo discorso su negozi che verzi e che sera da Quiz triestini a Negozi che verzi e che sera in Industrie e commerci

[Nona Picia]

Gavè letto che in viale chiudi el mitico negozio "Radio Trieste"?

[babatriestina]

[sono piccolo ma crescero]

Pecà, però lo vedevo in crisi da parecchi anni. Iera sempre meno gente dentro e, bisogna dirlo, el look del negozio no iera proprio adato a un negozio che vendi componenti elettronici de avanguardia

Pecà che el seri, perché el gaveva prezi bastanza boni. Ne tocherà andar de Radio Kalica, che però xe più careto (me par). O de Kalcic. (o alla fiera de l'elettronica de Pordenon )

Credo poi che sia conseguenza del fatto che la componentistica se la compra ben anche su internet.

[Nona Picia]

SPOSTA

[babatriestina]

SPOSTA

Fato!


Gavè notado inveze che in centro cressi i posti de magnar?
in piazza Goldoni i ga rifatto el Cremcaffè che vendi anche panini e paste
in via Gallina Sircelli, la picia panetteria-pasticceria se ga ingrandido con tavoli, servizi, caffè.. e subito dopo xe Masè cola sua gastronomia
sul canton de via Pellico el negozio de vestiti a bon prezzo ga cambiado e adesso xe un pochi de vestiti e tavoli de caffè e pubblicizza el caffè a 0.80 !!

in Barriera, al posto de Upim xe un Despar che ghe fa concorrenza alle Coop di fronte ( e ai frutti e verdura della Grande Mela)

che tuti voli magnarse qualcossa per strada?

[Nona Picia]

O forsi i vol fa veder che in Italia (e non solo) xe tuta una magnadora?

[babatriestina]

per negozi che sera, Arbiter
Inveze in Barriera ga averto al posto de un de regaletti, un bar Impero, circa sul canton dove che iera un baretto che un tempo andavo a bever un caffè tornando dei funerai ( savè, no che xe tradizion bever un cafè dopo un funeral?) e el negozietto soto de mi sul canton sempre meno vestiti el ga, ma oltre che un cafè con qualcossa de magnar ( tipo Vienna ma in povero) che xe sempre pien, el ga zontado cassette de fruti e verdure tuto a 1 euro al chilo! no go provado...
con ste nove regole che xe meno rigide su cosa che pol vender i negozi, se vedi ste robe.. come la libreria Lovat ( IV pian dela ex Standa in Viale) che ga el cafè annesso.
Eco, mi trovo giusto segnalar no solo i veci negozi che sera, ma anche i novi che verzi, perchè xe vero che ogni negozio che sera xe come un vecio amico che andemo al suo funeral, ma ghe xe anche i novi, come co nassi fioi e nipoti.. la vita xe fata cussì, e no xe gnanca giusto impor ai negozianti ( e botegheri) de far come i servi dela gleba, ligai al negozio. Nel medioevo iera el fabro feraio che se tramandava la botega de pare in fio, el falegname, e poco più perchè el resto se se fazeva in casa..
Vedo in giro in centro assai cambiamenti, negozi novi...
e vedemo se se movi finalmente qualcossa al ex palazzo Arrigoni, in piazza Dalmazia !

[sono piccolo ma crescero]

Perché xe tanti negozi che sera (e resta serai)?

Perché una volta se andava in centro a comprar el televisor, la lavatrice. Ogi se va in centro commercial a comprar el televisor e la lavatrice. Tanti negozi del centro che ga serà i ga verto, col stesso nome o con nomi diversi, nei centri commerciali.

E dopo go questa impression: che i paroni dei locai no voi sentir la parola "crisi" che sugeriria de sbassar i affitti e continui a tegnirli assai alti.

A sto proposito, no so se sia ancora, ma me fazeva sempre impression veder fora dela porta serada del ex Banco de Napoli - Banca Popolare de Brescia, sul canton tra largo Riborgo e el Corso, el cartel Vendesi (o Affittasi?) con un numero de telefono. Iero sempre tentà de telefonar per sentir. Chissà, magari xe un afar e con 50.000 euri e altri 50.000 de mutuo se lo porta a casa .

[Bilbo]

te se lo anca porterà a casa....ma sa che imu.....

a parte ciò. mi se devo comprar grandi elettrodomestici, xe sai facile che li ciogo in internet, i me costa de meno e comunque la garanzia i me la devi a vignir far a casa, quindi che ciogo soto casa, al centro comerciale o in internt xe uguale. L'altro ano me son ciolto la lavatrice, 350€+ 10 de consegna e ritiro del'altra.... andao al giugli, go trovato el model più picio a 440 più consegna 25. se andavo ale coop del montedoro, la consegna me vigniva 60€ (12 de consegna + 12 ogni pian de portar su). deso co amazon, anca roba picia ciogo in internet...me xe pena rivado el phon...circa 12€ meno che in negozio....

[sono piccolo ma crescero]

Xe, però, la rottura de dover eser a casa co i te la porta. Sopratuto per la roba picia. Perché go visto che le robe grandi i te telefona per meterse d'acordo.

Per la roba picia mi no me dispiasi quei che te disi de pasar a ritirar in certi punti.

Però, se te pensi, te son ti che te ris'ci perché te paghi sempre la roba prima che la te rivi.

E poi, co lo fazo, me sento sempre un poco colpevole, perché xe posti de lavor in meno in sta cità...

Una volta son andà a far el biglieto del treno in stazion e iera una file che no finiva più. Co xe el mio turno, intanto che el lo stampava, con bela maniera e con un soriso ghe digo "Mama mia che fila, no finiva più" e el mato, duro me rispondi "La podeva far el biglieto per internet" e mi altretanto duro "Lo so e vedemo se la indovina perché che vegno a farlo in biglieteria?" El mato xe sta zito...

[babatriestina]

mi go la stessa impression de Sono piccolo per i negozi sfitti, visto che quei che sera pianzi quasi tuti che el afito in centro iera troppo alto.
per i elettrodomestici.. sì dopo che ga serado l'Universatecnica ( e ala svendita de chiusura me go ciolto un'ottima lavatrice!) no xe più un de lori in centro. E qua el discorso se diversifica:
1 va ben, la lavatrice no, ma anche per un phon o un spazolin elettrico no tuti ga voia de spender su internet, no tutti se fa paypal, no tuto ga voia de digitar la propia carta de credito. E mi ancora per roba come machine fotografiche preferisso el negozio. Perchè me piasi veder coi mii oci, no solo le foto che i te mostra lori, confrontar, domandar consigli e sopratutto gaver un dove che rugnar se qualcossa no va ben.. se la tua lavatrice ciolta su internet no va, come va coi reclami? col invio in riparazion? sopratutto se la xe in garanzia? in Amazon me ciogo i libri in inglese e francese, che no xe question de scelta o de marche e qua no se trova che pochissima roba. E in più - e parlo de cliente Amazon- xe la secatura dela consegna, o se devi esser a casa o gaver qualchedun de fiducia, quante volte se se trova el messaggin del corriere "no gavemo trovado nissun casa".
2 centri comerciali: mi ghe passo per quei due o tre negozi ( sopratutto i grandi negozi alimentari, che ga roba che i altri no ga, question de spazi) che fazzo la spesa, davanti dei altri no me fermo mai: xe quasi tuto negozi de abigliamento; mai che andando al centro comercial trovassi tuto quel che go de cior e che magari una volta iera nei veci grandi magazzini: ghe xe cartolerie? presempio.. o negozio de roba de casa? cristalleria? pignatte con ampia scelta? strazze de cusina e tovaie?
3 no tuti ga internet e anche no tuti ga o ga voia de doprar la machina. De mii coleghi che no la ga mai ciolta a amici che la ga lassada perder.. certo, i ghe pol domandar aiuto a amici e sopratutto fioi e nipoti, per chi che li ga disponibili..

4 mi volevo puntualizzar inveze che molti negozi sera per due motivi che no ghe n'entra cola concorenza de internet o dei centri comerciali: mori el vecio paron , perchè i anni de la vita no xe eterni, e el fio, se el ga avudo fioi, no ga nissuna voia de continuar el mestier del pare; secondo, el tipo de merce che se vendeva col tempo no servi più... quanti de noi compra stoffe a metro per cusirse o farse cusir i vestiti dela sarta? o farse tovaie e tovaioi a casa? sempre meno.. tanto per dir una... un poco come che ga finido le lavandere e le done del latte.

[Nona Picia]

SPOSTA

Fato!



sul canton de via Pellico el negozio de vestiti a bon prezzo ga cambiado e adesso xe un pochi de vestiti e tavoli de caffè e pubblicizza el caffè a 0.80 !!

E desso i vendi anche fruti e verdura a 1 euro al kg! No so se xe temporaneo o permanente, però!

[babatriestina]

sul canton de via Pellico el negozio de vestiti a bon prezzo ga cambiado e adesso xe un pochi de vestiti e tavoli de caffè e pubblicizza el caffè a 0.80 !!

E desso i vendi anche fruti e verdura a 1 euro al kg! No so se xe temporaneo o permanente, però!

4 messaggi più sora go scritto:

el negozietto soto de mi sul canton sempre meno vestiti el ga, ma oltre che un cafè con qualcossa de magnar ( tipo Vienna ma in povero) che xe sempre pien, el ga zontado cassette de fruti e verdure tuto a 1 euro al chilo! no go provado...

[Bilbo]

Xe, però, la rottura de dover eser a casa co i te la porta. Sopratuto per la roba picia. Perché go visto che le robe grandi i te telefona per meterse d'acordo.

su questo son d'acordo, mi me la fazo sempre lasar in garas dove che tegno l'auto, se verto tuto el giorno presidiado.

per le robe grandi i devi comunque portartele a casa......e quindi te devi eserghe....

[babatriestina]

quanti de noi ga l'auto in un garas, e anche verto con qualchedun dentro sempre disponibile?

ben bon, oggi go visto che Monti se ga spostado, de via san Spiridione a via Mazzini, dove che iera el negozio de roba per ufficio vizin de Rustia. Che po anche Rustia se ga adeguado, una volta vendeva solo stoffe e adesso xe abbigliamento, borse.. ma perchè lo gestissi i fioi dei fioi che ga voia de ocuparse del negozio.