ernesto93 ha scritto:
Po' te ga scrito 1 roba che me interessa ssai; che tu pare "butava sul irredentista". Te me conti qualcossa de più? Che origini gaveva tu' pare? Come mai el butava de quella parte? L'andava a scola alla Lega o dove?Che mestier, dove che del viveva, quanti che i iera, come se concretizzava el suo irredentismo...
Ma no l'irredentismo dei "intellettuali", de quei che andava al liceo eccetera; de quei se sa 'bastanza. Me interesseria trovar tracce de irredentismo popolare, roba de San Giacomo o Rena, per intenderse...
Ciau!
alora no posso aiutarte: mio pare iera triestin, nato a Trieste de genitori nati a Trieste, ma no in Rena vecia o san Giacomo, ma Borgo teresiano e franceschino, e sia lu che suo papà iera come che te disi ti "intellettuali" perchè i gaveva fatto el Ginasio , che iera el nome dei licei in Austria, e proprio el Comunale, quel che no i ghe lassava ciamarlo Dante: el bisnonno, comandante mercantil del Lloyd austriaco, a un certo punto verso el 1860 ga molado baracca e burattini nella sua natia Ragusa ( Dubrovnik, ma alora soto l'Austria chi che no iera croato la ciamava Ragusa) e xe vegnui a Trieste e se vedi che i iera italofoni perchè i ga iscritto tuti i fioi al Ginasio italian. E nono ( e dopo papà) iera dotor, laureado a Vienna, suo fradel inveze se gaveva laureado in legge a Graz.
El iredentismo de papà dificile concretizzar, visto che el iera mulo, ma no dubito che el comprava i fiamiferi dela Lega, che el spetava el Italia e che el sperava de farse un passaporto per andar volontario in Italia, ma nono no lo ga lassado, perchè el lo trovava troppo pericoloso.
Go trovado fra i sui libri un libro de Mazzini, sui doveri dei italiani, con la nota
Libro caro tra tutti, lo lessi nel dicembre 1914, mi fece impressione profonda
Su nono, xe più dificile dir, anche papà no saveva ben spiegar perchè el xe morto nei primi anni 20, o meo no ghe iera dubbi che el fussi italian de lingua e cultura, ma el iera amico sia dei iredentisti ( Venezian, Doria) sia dei italiani contenti de viver nel Impero.. Nona no go dubbi, la me ga contado che la iera fra le donne che del 30 ottobre al 3 novembre iera in riva col mazzo de fiori a spetar el sbarco dei italiani. Ela iera triestina, nata a Trieste de genitori che no so se iera za nati a Trieste, comunque comercianti de origine furlana, sposai credo a Trieste intorno al 1860: rion, sempre Borgo Teresian e franceschino, fa conto che la iera in relazion perchè vicini de casa con Svevo e le sue sorelle, la se ricordava anche dele Wieselberger , quele del libro!