Zona Piazza della Borsa

[babatriestina]

chissà se, quando e per quanto la gaverà acqua, visto come che i tien le fontane adesso.
vero xe che no le ga più la funzion che le gaveva nel Settecento, che no iera acqua corrente in casa.

[Nona Picia]

Siccome non go trovà dove che se parla de sto argomento, scrivo qua, poi magari i gentili mod pol spostar e meter al posto giusto
Ieri, passando in via Cassa de Risparmio go visto che i ga messo i veci masegni solo sul bordo dela strada. Domanda: Ma no i gaveva dito che i li gavessi riposizionai su tuta la via? O me ricordo mal? Po go sentì dir che i li meti in Piazza dela Borsa, ma ogi go letto che anche là i sarà solo sul bordo dela piazza.Qualchedun sa qualcossa?

[AdlerTS]

Infatti i xe intorno alla fontana, ma in giro per el resto xe piere nove



l'argomento xe delicato perché ghe xe anche segnalazioni uficiali e politiche sul riutilizzo o meno del masegno

[Nona Picia]

Grazie Adler!

[Nona Picia]

l'argomento xe delicato perché ghe xe anche segnalazioni uficiali e politiche sul riutilizzo o meno del masegno

Se sa de cossa che se tratta esattamente? O xe meio no dir niente?

[AdlerTS]

Go letto che l'associazion "Italia Nostra" insieme col UDC locale ga fato interrogazioni uficiali.

Stago seguindo anche su il Tuono una serie de articoli che vol far chiarezza su appalti non troppo chiari in città, per cominciar quel della Maddalena....Se te va sul sito te pol legger el giornal "on line".

[Nona Picia]

Grazie, mio fio me ga mandà el link!

[sum culex]

Prosegui i lavori de riqualificazion de Piazza della Borsa. Oltre la sudada per far le foto soto el sol ale ore più calde, queste xè le foto che go fato. Devo un poco ridimensionarme se no me ciaperà un colpo (forsi qualchedun poderia anche esser contento), ma no me comoda far foto cola luce che no me sodisfa.

I sta riposizionando i veci mesegni



Un toco xè zà fato



I ga anche cominciado a meter la fontana tirada via de piazza Venezia per farghe posto a Massimilian sfratà de casa sua

[sum culex]

Comincia a ciapar forma la nova meridiana (se ghe ne ga parlà in 'Camera de comercio', ma me ga parso giusto meter piutosto le foto in 'Piazza dela Borsa'). I ghe ne ga sta ancora lavorando torno. Una parte iera ancora coverta de una straza; passando le man e i brazi oltre la rede de recinzion go tirà via la straza fin che la meridiana iera tuta libera. Iera domenica dopo mezzo giorno e no iera nissun, ma se i me gavessi becà?..

[sum culex]

Xè incise anche le istruzioni de come doprarla



Le foto xè fate oltre le transene, go zercà de drizarle come che go podù; no xè el massimo, ma dovè contentarve; a meno che no se possi andar in qualche finestra dei palazi vizin (Tergesteo o canera de comercio) cole proporzioni ben drite no se le po lar!!!
Ciao
sum culex

[babatriestina]

Oltre la sudada per far le foto soto el sol ale ore più calde, queste xè le foto che go fato. Devo un poco ridimensionarme se no me ciaperà un colpo (forsi qualchedun poderia anche esser contento), ma no me comoda far foto cola luce che no me sodisfa.

ti no state far vegnir un colpo, con sta caldana, solo perchè te piasi fotografar cola luce del sol a picco

I ga anche cominciado a meter la fontana tirada via de piazza Venezia per farghe posto a Massimilian sfratà de casa sua

veramente, sia Massimilian che la fontana del Nettuno xe tornai dove che i xe stai messi in origine.

[babatriestina]

Ognidun scegli la luce che preferissi, mi adoro i toni soft e celestini della luce del tramonto, li trovo adatti ala grazia settecentesca della scultura del Mazzoleni



ghe manca el tridente ( che però no iera più el original) oltre che la balaustra
con sta luce, anche la pavimentazion coi veci masegni ( che dito fra de noi no xe comodi de caminarghe sora) ciapa colori cche ricorda quasi la superficie del mar

[AdlerTS]

Nissun xe andado a veder nelle vecie immagini se Nettuno guardava sempre da quella parte o i lo ga girado ? Volevo farlo ma non go ancora rivado.

[babatriestina]

Nissun xe andado a veder nelle vecie immagini se Nettuno guardava sempre da quella parte o i lo ga girado ? Volevo farlo ma non go ancora rivado.

go guardado mi: el xe sempre cussì:

[babatriestina]

ancora una stampa in perchè l'idea di una stampa del 1854 in Trieste de Oggi mi sembrava un po' comica

[babatriestina]

i lavori procedi, nonostante el caldo:
xe ricomparso el tridente

controluce

( me piasi i toni pastello che prendi sta zona settecentesca a l tramonto)
davanti della Borsa, se vedi che i sta rimontando el parapetto: vegnerà anche acqua?

[babatriestina]

e xe ben leggibile questa epigrafe:



Quest'opera
di Giovanni Mazzoleni da Bergamo
decorò dal 1755 al 1920
Piazza della Borsa
e qui per cura del Comune
nel 1951 risorse.

El "qui " se riferiva al suo ripristino in Piazza Venezia

[sono piccolo ma crescero]

Perché attorno alla fontana ci sono tante piante? Novità natalizie o architettonico estetiche?

[sum culex]

Iera una manifestazion: no me ricordo el nome giusto, ma quacossa come festa dei alberi.
ciao
sum culex

[babatriestina]

Festa dell'albero 21 novembre. i fioi ga portado sti alberi e i loro pupoli, e i li impianterà de qualche parte