Ciancele ha scritto: Grazie ale tante informazioni de Baba Triestina, forse polemiche, ma cusì interesanti, go zercà de spiegarghe, ma no go podesto dirghe se xe colpa del governo talian, che no ga bisogno de Trieste (come che disi Piereto che un picolo favor a Trieste xe una grande disgrazia in altri loghi) gavendo Venesia e Ancona, o xe colpa del comun che no ga el coragio de far qualcosa o no sa cosa far e speta de ‘ndar in pension. Après moi ... Chi me ‘iuta a dir qualcosa de serio?
MI te digo la mia e no pretendo de ver ragion; xe come che la penso mi.
Vardemo chi che ga fato "grande" Trieste: do imperatori che ... vegniva de fora, Revoltella che me par che fusi venezian, Carciotti che iera grego, Sartorio che iera piemontese.... El primo cantier lo ga fato Tonello che iera venezian, la ferriera, nel ben e nel mal, la ga fata gente de Lubiana.
E i triestini? Semo qua che spetemo. Spetemo che i fondai più fondi fazi vegnir le navi, che qualchedun vegni a meter industrie che no inquina, gabi bisogno de tanta gente (ma no tropa perché no volemo imigrazion), cha santa Maria del guato diventi de sola sede de mostre importanti... Nei anni '50-'70 co iera bobana, mentre i furlani meteva in pie tante pice ditarele che po' xe cresude (forsi anche falide qualceduna) creando un tessuto industrial importante, a Trieste gavemo volù tegnir in pie le grandi fabriche: feriera, grandi motori... sempre in crisi e sempre meno de moda e aziende che, se falisi, fa un boto assai grande in cità per cui bisogna continuar a tegnirle in pie. Guai a tocar le robe vece. Proveve a imaginar se Maria Teresa fusi ogi: el borgo teresiano xe tuto saline, con dentro gente che ghe lavora. Sta baba la riva (in maniera virtual perché qua no la iera mai) e le fa imbunir tute: apriti cielo, me par de sentir: "le saline sono la tradizione, mano d'opera specializzata, il sale è un bene primario, ...", la rivoluzion in cità insomma. La fa tirar zo i muri de cinta... "lasciando la città nella mani delle scorrerie, demolendo importanti vestigia della città medievale, ..." A mi me par (forsi me sbaglio e se xe cusì me scuso e coregeme) che nei anni '70 le Generali voleva el porto vecio, tirar zo tuto e far el loro centro direzional che dopo le ga fato a Mogliano; ve imaginè i posti de lavor? Perché no ge gavemo dà tuto? El porto vecio, la centrale idrodinamica, no i iera unici al mondo: dapertuto iera la stesa roba: i ga butà zo tuto e fato tuto novo; qua no, no se pol.
E la colpa dele crisi? Sempre de quachedun altro: co iero picio iera colpa dela Iugoslavia che ne sofigava, deso, che i confini xe verti, dela concorenza slovena, colpa dei profughi, colpa dei Italiani, sempre colpa de altri.
Nei anni '60 e '70 Trieste ga 'vu un colpo de cul: le rive piene de pulman (con tante proteste de residenti), negozi de jeansinari dapertuto... ma i jeansinari iera triestini? Credo gnanche un o sai pochi. Co la guera freda Trieste se ga impinì de militari: co lavoravo a Milan, la frase tipica che me sentivo dir, in treno, iera "Ho fatto il militare dalle parti tue". Mi stago vizin a dove che iera caserme. I militari iera vardai come che deso vardemo i negri e i rumeni. Adeso le caserme no xe più: negozi che sera, chi che xe verto se lamenta che no xe più lavor e chi prima brontolava adeso pianzi.
Ma perché tanta gente, i meio forsi, se ga ciapà e xe andada via? Perché qua gavemo tropi bei tramonti, gavemo el mar, gavemo el monte, stemo tropo ben, xe tropo bel e no gavemo voia de romperse, mi per primo.
Allora s’accorse che le parole fanno un effetto in bocca, e un altro negli orecchi; e prese un po’ più d’abitudine d’ascoltar di dentro le sue, prima di proferirle. (A. Manzoni, I promessi sposi, cap. XXXVIII)