Orso del cartiera e orso dele Girandole

[Franco]

Me son ricordà (tropo complicato spiegar come) de l'orso che una volta fazeva de mascotte in cartiera... e anche de quel che stava in una cheba ale Girandole, a Borgo Grotta (o iera el steso dela cartiera, che i gaveva trasferì ale girandole?)
No me ricordo ben, perchè iera nei ani '70 e iero picio... qualchedun ghe ne sa de più? O ga dele fotografie?

[babatriestina]

Me ricordo qualcossa del orso dela cartiera, povera bestia serado in cheba, ma no so nè come che el iera rivado nè che fine che el gabi fatto.
De quel dele Girandole no me ricordo., no credo de gaver visto.
Mama me contava che fra le do guerre ghe iera due orsi, forsi al Orto Botanico o me son insognada mi el logo, associandolo ale do scimiette dei anni 50, e i se ciamava Marco e Siberio.

[Rawa Ruska]

e la leonessa del giardin Revoltela? con l'orso de la cartiera me par che gavesi avù a che far el sior Demeio, quel che po' gaveva el grando negozio in viale.Me par, però...

Rawa Ruska

[sum culex]

Mama me contava che fra le do guerre ghe iera due orsi, forsi al Orto Botanico o me son insognada mi el logo, associandolo ale do scimiette dei anni 50

De l'orso in orto botanico no me ricordo, inveze me ricordo ben che ghe iera un cocodril bel grande. che mio papà me gaveva portà a vederlo diverse volte.
ciao
sum culex

P.S.: Putropo quela volta no fazevo foto, gaverò avù più o meno torno i 10 ani.

[1382-1918]

E a Bane iera un che gaveva un leon.

[babatriestina]

E a Bane iera un che gaveva un leon.

sarà stado quel, de cucciolo, che me contava una mia amica che la iera andada a zogar! lla diseva che el iera come un gatton, cocolo! po no so che fin che el gabi fatto.. i ghe lo gaverà dado a qualche zoo, imagino.

[AdlerTS]

e la leonessa del giardin Revoltela?

Girava tra i zitoli zotoli ?

[sono piccolo ma crescero]

No, la gaveva la gabia un poco più sora, in fondo a quela pasegiata soto la pergola che xe giusto sora dei zitoli zotoli (forsi la gabia xe ancora). Ma se me ricordo ben, la ga durà asai poco. No so dirte se dopo i la ga portada via o la xe morta.

[babatriestina]

No, la gaveva la gabia .

la gabia???
la cheba, diria, anche se de solito chebe xe quele dei usei..

[sono piccolo ma crescero]

Ghe go pensà su prima de scriver, e go doprà la parola gabia pensandoghe, perché no volevo che se pensasi che magari la iera nele voliere ( chebe) che xe qua e la nel parco!

Adeso go controlà e el Doria no contempla la parola gabia, però el meti la parola GABION. Eco forsi gaveria podù doprar gabion e no gabia.

Se te vol coreger ...

[Zigolo]

Riprendo questo argomento per girar una notizia che riguarda apunto i orsi in cheba, che almeno in certi paesi i xe ancora numerosi.

Nel Kosovo, ad esempio, tale abitudine xe stada recentemente messa fuori legge e ghe xe una ONG ciamada Four Paws (quatro zate) che colabora col governo de quel paese per sistemar quei disgraziai che xe ancora in quela condizion. Sempre in acordo col governo i ga fato un "santuario dei orsi" per sistemar quei che, un ala volta, i ciol via de le chebe private, spesso fora de ristoranti e alberghi. (e qua me xe vignù in a mente un per de episodi de l'orsa de Borgo Grota, ma quel vedemo dopo)

L'ultimo prelievo se lo pol veder qua:

http://www.repubblica.it/ambiente/2013/ ... HRESS-25#1

Dopo son andà a veder sul sito de sta ONG (http://www.four-paws.org.uk/) vignindo a saver dele altre sue iniziative: sempre pei orsi in cheba, i ga incomincià a lavorar anche in Ucraina, dove i stima che ghe ne xe ancora un centinaio de cavar de quele condizioni. Auguri!

[mandi_]

Son molto sensibile a sto argomento dei animali in cheba, e aprofito per zontar en me comento no triestin, ma che me sta a cor. Se mai spostè voi.

Dato che te considero esperto, Zigolo, te faxo veder en parco zoo da le me parti.Ghe xe anca en zoo safari dove te giri en auto tra leoni ecc.

http://www.tripadvisor.it/LocationPhoto ... l#43391152

No xe trentin, ma a poca distanza da dove abito e ghe portevo i pici na volta, perchè gavesse ocasion de veder animai.

Xe almen 25 anni che no ghe vago, perchè na volta go fato na riflesion mia: no me piaseva veder aquile en cheba, nè foche istupidite dal caldo, nè orsi o rinoceronti en ambiente no suo. No son pu stada, ma devo aver dele foto de anni fa.Che te par de come i ambienta i animali en sto zoo? Sbaglio mi? Per mi xe meio parchi naturali...

Orso de San Romedio:

ve mostro en video de quel che xe na tradizion per noi. Andar a San Romedio e no veder l'orso ...me despiaseria...De come xe sistemà l' orso no saveria dir, anche se go fato tante foto. Na volta iera due tre orsi, adesso xe rivà l'orso Bruno da l'Abruzzo.
Da noi ghe tanti che dis pro, tanti che dis contro...
Ghe da dir na roba: da noi i contadini e i allevatori xe furiosi perchè xe molti orsi liberi che se magna le bestie proprio en paese...

http://www.youtube.com/watch?v=bb6TOiw0URo

No go ancor capì ben se in giardino pubblico a Trieste na volta iera animali en cheba e quali , come go leto en un diario...

[Nona Picia]

A san Romedio ghe semo stai nei anni 80 e ghe iera un orso, ma non Orso Bruno, el iera più ciaro...E qualche anno fa mio fio più picio ghe xe tornà con le fie e tuti e tre ga fato foto. Alcune le divessi esser qua
https://www.atrieste.eu/Forum3/viewtopic ... an+Romedio Purtropo go visto che manca qualche foto, vederò de recuperarle...

[Nini Naridola]

L'orso della cartiera me par che el se ciamava "Pupa" e la stava drio le doppie sbare su la strada, a sinistra andando verso Monfalcon, subito dopo la prima casetta dopo el bivio che porta alla cesa antica de San Giovanni del Timavo. La iera stada regalada alla cartiera da una delegazion (svedese me par). La me fazeva assai passion vederla là.
Un leon (sempre in cheba) iera anche a Gabrovizza, nel giardin de una villa un poco più in zo de la Carsiana.
Inveze a Borgo Grotta, al Bora (primi anni 70), iera andada a finir el puma con cui gavevo fato amicizia quando, cucciolon, el iera nel negozio "Natura viva" in Acquedotto. Visto che conossevo la parona e che in viale andavo a far vasche, ogni giorno passavo de là e la coccolavo (el Piumin, come la ciamavo mi). Per un certo periodo la portavo a guinzaglio a far vasche con mi (un trionfo!!!). po co el xe diventà più grande lo ga messo alle Girandole e per mesi se gavemo perso de vista. Un giorno son capità là dove el stava in un gabion con alcuni ripiani a varie altezze. Ormai adulto, el se iera rifugià su quel più in alto, secado che tuti i fioluzi i ghe butava giarina per farlo vegnir zo. Co son rivà e lo go ciamà:-Piumin! el xe saltà zo e el se ga messo a russarse su la cheba. Mi go scavalcà la protezion che girava tutointorno perchè la gente no meti le man, e go comincià a gratarghe la gola. Che ron-ron! Son stà là con lui per almeno un'ora ... poi non son più tornà...

[Zigolo]

L'orso della cartiera me par che el se ciamava "Pupa"

Pupa iera l'orsa della "Bora" a Borgo Grotta Gigante, e propio de ela, come go dito, me ricordo un per de episodi.

El primo xe de quando che la iera ancora picia. No so de dove che la vigniva ma la xe stada anche ela un periodo de Natura Viva in viale. Un mio amico, che abitava propio de sora, me ga contà che un giorno i ghe fazeva el bagneto a Pupa, ancora cuciola, in corte. A un certo punto se vedi che i se ga distrato e sta bestia ga ciapà la porta che dava sule scale e la xe andada su.
Ve podè imaginar co una baba la ga vista e, zigando "aiuto un orso", la se ga serà dentro in casa. Subito dopo xe rivai quei de natura Viva e i la ga riportada zò.

Dopo la xe finida a la Bora in una cheba che per ela iera sai picia. Cussì, o la stava distirada o la coreva in tondo lungo le sbare. Vizin de le sbare ghe iera una vasca de acqua e go visto diverse volte che la spetava che qualchedun sia vizin la vasca e po' la interompeva la sua corsa in tondo con un bel tuffo in tel acqua, schizando chi che iera più vizin La conosseva quindi el spirito dela clanfa

[Zigolo]

no me piaseva veder aquile en cheba, nè foche istupidite dal caldo, nè orsi o rinoceronti en ambiente no suo.

No, no me piasi gnanca a mi, le bestie devi star nel suo ambiente.

Se po se vol parlar de un "uso" didatico, ben, ghe xe tanti altri modi per educar i fioi ala conoscenza dela natura.

[Nini Naridola]

Zigolo: e no te se ricordi del mio amico puma? Me stago stroligando a ricordarme come che la se ciamava. Solo che mi la ciamavo "Piumìn" perchè la prima volta che la go vista (iera una femmina po?) la iera come un batufolo per la cipria.

[Zigolo]

Zigolo: e no te se ricordi del mio amico puma?

Epur no: me ricordo bastanza ben de Pupa, ma no del puma. Scherzi dela memoria a quaranta ani (più o meno) de distanza.

[mandi_]

Sicuro Nini che el "Piuma" cresciudo no te gaveria dat en morseghin? La mia xe na batudina gentile, forsi stupidota. Ma el puma xe na bestia fiera e natura è natura, istinto xe istinto.

na volta no pensevem forsi che i animali va rispetadi per la so natura(me riferiso ai parchi zoo stavolta), adeso spero che molte robe le cambia. Animali ga dei diritti (anche se due cervi ga taià la strada do volte a me fiòla, smacandome la machina per ben ...e quela volta iero rabiada...coi cervi)

[Nini Naridola]

Iero sicurissimo, Mandi, ch'el me gaveva riconossudo anche se iera passado forsi un anno. Dalle fusa ch'el me fazeva no go avù nissun timor de meter el brazo dentro la cheba. Forsi el se ricordava che, co lo portavo in giro pel Viale, me fermavo de Zampolli a ciorghe el gelato ... el iera come matto!