Modi de dir triestini

[Nini Naridola]

De muleto nel rion de Scorcola iera ssai usà dir "Fortic taco" o anche solo fortic e se fazeva el gesto de tocarse co la man el calcagno.

[Zigolo]

se un voleva una sospension o un intervalo diseva:
FORTIC TACO
e el giogo se fermava.

FERTIC disevimo noi

[Nona Picia]

E noi disevimo FORTITACO tuto tacà....

[babatriestina]

anche noi fortictaco

[sono piccolo ma crescero]

Anche noi disevimo fortic e disfortic per continuar (scurtà anche in disfo).

Disevimo fortitaco o fortictaco, onestamente no so, me par fortitaco (chi me toca xe un macaco). No savendo go ciolto la scritura del Doria. Se volè le meto tue due.

[Ciancele]

De muleto nel rion de Scorcola iera ssai usà dir "Fortic taco" o anche solo fortic e se fazeva el gesto de tocarse co la man el calcagno.

No poso che confermar. El calcagno se lo tocaimo co' ierimo discalsi. Altrimenti tocaimo el taco dela scarpa o dela zavata.

[sono piccolo ma crescero]

Me son acorto che nel vocabolario mancava el modo de dir "andar a contar saseti" e po' me son acorto che el precisissimo Ciancele (Deutsche Präzision ) lo gaveva za citado nel forum e iero mi che me iero dimenticà de riportarlo...

[Ciancele]

Me son acorto che nel vocabolario mancava el modo de dir "andar a contar saseti" e po' me son acorto che el precisissimo Ciancele (Deutsche Präzision ) lo gaveva za citado nel forum e iero mi che me iero dimenticà de riportarlo...

Ciancele xe cusì preciso che de ‘deso in avanti i calcolerà la precision in Cianceli.
Altri modi de dir triestini:
Bater canton = dedicarsi al meretricio
Camin de baba = donna di facili costumi
Andar drio le bote (piaza Giusepina): Andar in camporella (a far sporchezi che piasi ‘sai).
I veci veceti (pluriottantenni) i sa cosa che vol dir. Pai più giovini conto che 80/90 ani fa le bote de piaza Giusepina iera una sucursale de Boscheto, come in Sansa.

[babatriestina]

me xe vegnuda in mente un'espression che usava mio nono, ma la pol esser stada sua o de origini istriane: per dir una persona che no ga mai pase, el la ciamava " anima bucaleta", nel senso quasi de anima in pena. Go trovado bucaleta sul Doria Zeper, ma nel significato de boccale, contenitor...

e za che iero ala pagina, lu riporta poco sora questa filastrocca

Testamento de butiro
fate là che no te impiro
se te impiro te fazo mal
testamento de bucal

dove el testamento sta per teston

Mama mia però lo citava come

Nane Nane de butiro
fate là che no te impiro
se te impiro te fazo mal
Nane Nane papagal

[Ciancele]

Un nostro forumista me ga dito in un mesagio privato che el xe ‘ndà a spender soldi. Conto el pecato ma no el pecator par no esporlo al ludibrio dele genti. ‘lora me xe vignù inamente un modo de dir triestin: Eser lustro. Cioè squattrinato, al verde.

[babatriestina]

"esser in truco" per relazione non ufficiale o appartarsi o pomiciare "me par che quei due xe in truco"
Non lo trovo sotto truco nel vocabolario.

per inciso, ieri su facebook, per una discussione sul dialetto hanno riportato come autorevole fonte il nostro dizionarietto wiki

[sono piccolo ma crescero]

Trovo, però, sui vocabolari che truco sta per avventura, trucco, imbroglio, per cui penso che se posi zontar sia come parola che come modo de dir.

Racomando a tuti, sicome le parole e i modi de dir vien zontadi sul vocabolario se ghe xe due conferme indipendenti almeno, de darne conferma sopratuto de quei modi de dir che no xe nei vocabolari: per esempio "eser lustro" per dir eser al verde mi no lo trovo. Se quachedun altro, oltre a Ciancele, conosi sto modo de dir xe pregà de dar conferma. E se zerché in queste pagine sui modi de dir in quele dove se parla del vocabolarieto troverè tante parole o modi de dir che speta conferma.

[Nini Naridola]

Rispondo qua alle due ultime parole proposte: "stanti" e "lustro"
Stanti, generalmente, xe dei rinforzi (o verticai o inclinai) de un'armatura edile, se usa anche in squero co la barca xe su la senta per indicar i puntei laterali. Anche i portuai, in locanda, i diseva:- "dame un stante" (un bicer de trapa sopratuto se iera fredo e col ciaro significato de "tegnirse su"). Più usada l'espression "una limpida o un rodoleto de limpida".
Anche "lustro" go sentì dir nel significato de "cisto"; e ancora:- Ieri son torna a casa lustro in tuti i sensi" (Imbriago e senza nau)

[sum culex]

Anche mi conoso la parola 'LUSTRO' col significato de senza un bel, completamente cisto.
ciao
sum culex

[babatriestina]

Non trovo la locuzione " fora de scatola" per dire sempre ben curato. Almeno a casa mia era usuale " la xe sempre fora de scatola"

[sono piccolo ma crescero]

Confeso, mi go sempre sentido dir "fora dele scatole", ma con un significato diverso!

[babatriestina]

due concetti del tutto diversi

[Nona Picia]

Anche mi conosso solo l'altro significato!

[sono piccolo ma crescero]

Mi go sentido dir "novo de paco" col steso significato de quel de babaTS.

[Nini Naridola]

Mi go sempre sentì "Novo de paca" e no "Novo de paco"!