nadal

[nanaia]

Parafrasando...Natale Natale, quanti crimini in tuo nome
Voio dir: legendo l'intervento (giustissimo) de Adler sulla discriminazion che i media fa tra tragedie de prima e seconda classe , me xe vignudo in mente un altro uso sbagliado dei media per snaturar sempre de più sto povero Nadal. Gaverè sicuramente visto quella pubblicità che "a Natale puoi quello che non puoi fare maiiiii": chi ga dito????? Se pol esser boni solo a Nadal, e per de più xe un picio che regala tochi de pandoro? I altri giorni el ghe passa oltre e se i ga fame i se la tien ?
Scuseme, ma dato che go nipotini pici, me vien grizzoli a pensar che i ghe dia certe idee (anche perchè go paura che no sia solo television )
Ciao a tuti
Nanaia

[AdlerTS]

Non so se te gavevi visto, ma sto estate un gruppo de muleria annoiada ga festeggiado Nadal ad Agosto. Sul momento me ga fato impression, ma po go pensado che ala fin fine per un gran numero de persone xe assolutamente lo stesso. Della Natività non se parla quasi più.

[babatriestina]

In effetti, Nadal xe la Natività solo per quei che se senti cristiani. Per i altri, anche se battezzai, o no, anche in nome del rispetto dele altre culture, xe un incrocio fra el carneval e la festa del Sol Nascente, o festa delle Luci ( che po xe la sua rivincita, perchè no savemo assolutamente quando che sia nato Gesù e la data xe stada convenzionalemente ciolta intorno al solstizio de inverno, quando che le giornate se slonga ). Digo anche Carneval, perchè ieri go visto impicai dei festoni come quei de Carneval, ma fatti con Babbi Natali, bei grassi, ovviamente!
A volte digo anche che xe la festa dela tredicesima, cioè che i ghe fa la festa ala tredicesima spendendola in regali! però in fondo la tradizion del regalo xe gentil, anche se no se sa spesso più cossa regalar, che po le case se impignissi de strafanicci. Oggi però vardavo vetrine con regali a prezzi ancora contegnui, i comincia a renderse conto che no tuti ga el portafoglio proprio pien. Mia cugina che iera per lavor a Chicago sti giorni, me ga contado che là le svendite i le fa prima de Nadal, che la gente compri! qua inveze prima i spera che i compri e po i spera che i compri de novo!
Co iero putela, nei anni 50, 60, iera vegnù un periodo de moda mandar tanti tanti biglietti de auguri a tutti i amici parenti e conoscenti, me ricordo che li impicavimo su una cadena vizin dela lampada. Adesso, una telefonada, e qualche biglietto de auguri solo ai amici e lontani parenti che sta fora.
E i alberi xe za in vendita, che per mi el albero se fa al 24 !!!!
e no xe gnanca finida la fiera de san Nicolò che ga za averto le barachete natalizie in giro de S Antonio novo.

[babatriestina]

Za che gavemo za cominciado col Nadal, ve metto una foto del disegno del albero de Nadal del libro austriaco dele elementari de 60 anni fa.
E vederè che ghe xe dei particolari che me ricorda i alberi de co iero picia e diferenti dei alberi attuali:

per cominciar, el xe relativamente picio e messo su un casson, de quei de montagna o come quei carsolini che adesso , e ancora più un pochi de anni fa, se disputava i antiquari! e sora ghe xe una tovaia de quele ricamade a punto croce, no quele che i fa adesso in Cina col disegno dele stele de nadal (poinsettie).
El albero in cima no ga el puntal de vetro, ma una stella, propio come iera quel de casa mia! No ghe xe ovviamente luci elettriche, ma candele vere, che se impizza per poco ( el concetto de "impizzar el albero") ma ga tuto un altro effetto. No xe gnanca cadene de argento,e i gingilli xe poche bale tonde e piuttosto dolcetti. Sotto xe el presepio, quai incorporado al albero, e sotto i regali, con le candele messe nei mandarini o naranze.

A proposito de alberi de una volta! in via Felice Venezian, lato verso el mar, go visto giorni fa un negozio che vendi gingilli de albero "vintage" cioè de seconda man, credo, quasi precisi de quei che vedevo sul albero dei mii nonni

[refolo]

Qua' in Australia el Nadal comincia a Luglio fin Agosto, senza
fronzoli, solo spese inutili de carta per reclam, solo scopo....... nome "SVENDITA".

In una nazion Democratica (chi ga' dito queste parole?) sto anno vederemo pupoli, niente Nativita' le vetrine al posto de robe religiose (per non offender le altre) i ga' messo pupoloti tipo Walt Disney.

I municipi metteva decorazioni, adesso niente, e non ve conto frottole,
mi sulla facciata della casa go' (el giorno de San Nicolo') messo le figure de tante luci piccole (Postero le foto) col disegno dell'albero, un'altra

de San Nicolo' (ooops father Christmas) ieri oggi (sabato) e domani gavero' un caldo afoso ma anche con vento caldo del deserto, xe foghi che non ghe iera precisi dal 1939. Go' lassa' de accender durante la notte per non alimentar altro caldo.....beh!

mi che protesto sempre, adesso devo spettar (go' lassa' un mesaggio) che vegni la polizia perche' dove che gavevo father Xmas i mi me ga' spaca' la lastro con un sasso. Un gruppo de ( chi che guida xe oltre i 18 anni) stanotte i ga' fatto danni a una ventina de case.

Adesso che scrivo xe le 6 de mattina son quasi in piedi tutta la notte, go dovesto metter un grande carton per coverzer, ve conto giusto per darve un'idea de come che vien disposte le robe per tutto el mondo, con idee de quattro stupidini che i xe contro ste festivita', o adirittu ra le cambia a favor dei altri.

L'albero grande chei ga' messo fora de un negozio de stoffe, i lo ga' vandalizza cava' luci, adesso el xe recinta' che par come un'animal in gabbia. Qua' de mi' i ga' za dito che non sara' la Messa, perche' la pattuglia de polizioti, lavorera' solo dalle 9-5.......

Xe un per de anni chei se fa' concorenza chi che decora le meio case, andemo in giro per altri sobborghi a veder xe un spettacolo de restar con la boca verta, ma siccome anche questo xe tipico sistema American allora non va' ben niente.

OH! me dimenticavo de dirve.....nei supermercati i ga' messo fora za i ovi Pasquali!!!!!!!!! qua' se corri come la bora, tutti ga' premura.

Maria aka Refolo

[rofizal]

Questa la iera una mia sul vecio forum :

Semo nel 1955, in piaza San Giovanni. L'albereto xe un poco striminzido, forsi i tempi no iera dei migliori, ma l'albero no mancava mai.

L'albero più grande in famiglia lo fazeva mio zio (a dir el vero saria stado mio prozio). El ghe dedicava una intera stanza e l'albero, posto su un tavolin baso dove che ghe iera anche un grande presepio, el rivava fino al sofito. Le candele naturalmente iera vere, quele de cera e per studarle e impizarle el gaveva un'asta longa, tipo quele che se vedi (o se vedeva) in ciesa. Tuto el parentado se radunava su de lui, se se scambiava i auguri e i regali e, se me ricordo ben, se cantava la clasica "Stille Nacht".

Tuto se svolgeva ala vigilia. Poi se ritornava a casa per el "nostro" albero, che iera za stado preparado nei giorni precedenti (ovvio).

Una persona se ocupava de meter i regali soto l'albero, mentre tuti i altri spetava in un'altra stanza. Quando tuto iera pronto vigniva sonada la campanela, tipo quele de ciesa, o quele dei veci portoni, la go ancora credo, se no la go butada perché la se gaveva fesurado e ormai la gaveva un bruto suono. Anche qua scambio de auguri e de regali, ma prima sempre bisognava cantar "Stille Nacht" e restar, come dir, un poco in meditazion, per capir che quel momento gaveva un certo significato e no voleva solo dir "regali". Poi se meteva anche su un disco o un nastro, quando che el iera, con sotofondo de canzoni natalizie, tute rigorosamente in tedesco.

Seguiva la zena, sobria ma ben curada, una ciacolada e poi speso a messa (za lo gavevo ricordado) nela picola ciesa de via Santa Giustina.

El giorno dopo, Nadal, no iera tanto sentido, o meio, no iera grandi pranzi, sepur l'atmosfera natalizia la restava sempre vivida.

Seguiva un post de Babatriestina:

Come de mi, me par anca mi de ricordar la campanela co iero 'sai picia, tuti Stille Nacht e Tannenbaum ma prima verzer i regali a mi i me fazeva recitar una poesia natalizia in tedesco, rigorosamente imparada a orecia nel mese precedente. Iera un suplizio perchè vedevo el zio austriaco vardarme con ocio sospetoso perchè le desinenze le metevo un poco a caso. Po' zio me vardava de bruto anca perchè i sui fioi un ano par che ga recitado qualcossa e po' mai più, cussì mi fazevo la parte dela saputella de famiglia.

La zena dela vigilia no iera gnente de special, al pranzo de Nadal se fazeva dei noni in famiglia coi zii e cugini. Nona dixeva sempre, dei fioi e nipoti che ghe vegniva ospiti a casa: el più bel giorno xe co i vien e po el più bel giorno xe co i va via.

[rofizal]

E poi ghe iear stado un topic dedicado proprio ai alberi de Nadal (topic verto l' 8 ottobre 2002). Val la pena recuperar almeno qualcosa.

Dcobau :

Parlando de alberi de nadal, me se vignù in amente i alberi che i comprava co iero mi picio. Naturalmente i iera naturali e sai alti. Tanto alti infati che una volta i ga dovu taiar un mezo metro per poderlo alzar e ancora el tocava el plafon. Una volta gavemo trovà un nido fra i rami (ghe lo gavemo dà a una vicina perché la canerina covava - ma xe un'altra storia).

Po' se atacava le candele sui rami, non ghe iera ancora i lumini, e co se le impizava de note iera de restar incantai, e credo non solo i fioi stava con la boca verta.

Po' se meteva anche tochi de ovata sui rami per far come la neve. Un anno mio zio, che viagiava, el ga porta dal'America un material tipo zuchero filato per far sta neve. Quel che non savevimo iera che iera fato con polvere de vetro (fiberglass???) e, dopo che gavemo coverto l'albero, ierimo tuti che se gratavimo. Sta polvere xe andada dapertuto.

E dopo, finalmente, xe rivà i lumini. Che ogni anno non funzionava e un'altro mio zio, che iera eletricista, doveva venir da noi a giustarle ogni volta. Ma le candele iera sai meio.

Desert RAT :

Anche mi me ricordo l'albero de Nadal quando iero picio, con le candele, e ghe se meteva manderini, pomi e altra frutta, e se lo fazeva 2 o 3 giorni prima de Nadal, no un mese. Dopo che me son sposà, mia moglie iera abituada al presepio, sicché gavemo sempre fato l'albero e de soto el presepio con laghetti, casette e cusì via.

Dcobau :

Orpo, me iero dimenticà dei pomi e manderini. E anche el mandorlato e babbi natale fati de ciocolata.

Mi :

Xe giusto che no ghe sia più tanti alberi veri, perché iera proprio una strage de sti poveri alberi.

Ma te vol meter el profumo.... ::)

Anche se dopo per netar la casa dai aghi de pin....

Macondo :

Qua de noi in Inghiltera i alberi veri de nadal xe bastanza facili de comprar. Anzi, se vendi più quei che i alberi de plastica. Credo che i vien de la Scandinavia, dove li cresi specialmente. Adeso i fa anche un sprai che cussí i aghi no casca più tanti...

Mi (scusé qualche ripetizion de un mesagio za meso, ma se cavo sai perdi el senso e el filo del discorso) :

Voio scriver un pensiero sui veci Nadai, che me par ormai perdudi per sempre, come quasi tute le tradizioni.

Da noi, come ga za dito qualchedun, qualche giorno prima se faseva l'albero che me par viniva poi disfado per l'ultimo (o per la Befana?). Xe za sta dito che se tratava de alberi veri, che se impicava anche fruti, ovata, candele vere, qualche bon bon de ciocolata.

Ala preparazion de l'albero dovevo sempre partecipar anche mi. Comunque iera sempre una meza tragedia, papà o nonno che fusi, i se inervosiva sempre.

No gavevo ancora sei anni quando xe rivade le prime candeline eletriche, una roba teribile. I fili se inverigolava sempre, e là iera le barufe più serie. Poi le lampadine iera messe in serie, e bastava una sola de lore che saltasi e no funzionava niente...

Bon, ala fine in un modo o ne l'altro l'albero iera finido, me par che noi non gavevimo presepe, o el iera ridoto ai minimi termini, e iera tuti contenti e pronti a festegiar.

La grande festa iera ala vigilia, no a Nadal.
Tuti doveva spetar in un'altra stanza, mentre qualchedun meteva i regali soto l'albero, poi i sonava la campanela e tuti "coreva" a veder albero e regali.

Prima de vardar cosa se gaveva ricevudo (noi fioi ierimo i più impazienti ), bisognava star qualche istante in silenzio a meditar sula festività, tuti rivolti verso l'albero che concentrava l'atenzion. Poi se cantava tuti insieme "Stille Nacht" e forsi anche "O Tannenbau" e se se scambiava i auguri. Solo dopo iera i regali.

Poi iera la cena, dela quale però, come del pranzo de Nadal, go pochi ricordi, ma a mi no me piasi magnar.

Dopo cena speso se andava ala Mesa de mezanote, in genere nela cieseta che sta in via Giustinelli.

Ogi se pensa a magnar, magnar e ancora magnar. I regali la gente se li fa tuto l'ano, i alberi xe finti e anche i adobi xe tuti de supermercato, anzi, se la gente podesi comprar l'albero za pronto lo faria. Molti va in vacanza, el significato original nisun se lo ricorda più. Tuti varda la television e quel giorno no fa ecezion, forsi una breve interuzion per far in freta un brindisi durante la publicità.

Forsi esagero un poco, ma sento nostalgia de quei Nadai, anche se me considero laico. I te riempiva el cuor. Iera tuto ligado alo spirito, no ai soldi e al consumismo come ogi. I regali ghe iera, xe vero, ma gaveva el significato de "eco, ogi te pol concederte qualcosa". In 'sto giorno, dopo tuto l'anno che te se sacrifichi. Anzi, no xe che te se "concedi", ma te fa un regalo a chi te vol ben, e l'altro farà altretanto con ti.

A dir el vero lo scambio de regali iera meno poetico za a quei tempi, molti cercava de risparmiar e i faseva i conti del dare/avere. Ma non nell'ambito familiare. E comunque, ripeto, durante l'anno no esisteva quasi mai "regali" o "autoregali".

El mondo cambia, el progreso avanza, miga volerè restar a l'età dela piera?

Xe vero, ma de tante robe se podesi far a meno e se viveria mejo. E poi mi digo: xe mejo viver 100 ani "spiritualmente svodi" o 50 "spiritualmente ricchi"?
Mejo insoma un giorno da leoni o 100 da pecora?

Senza ofender le povere pecore, cosa me ne fazo de una vida longa pasada da solo in poltrona a vardar stupidezi ala TV?

Hecht Graziella :

Te ga proprio ragion Sergio.
Comunque de la campanela me ricordo anca mi, anzi pensavo (visto che mia nona e mio papà i vigniva del'Austria) che iera una usanza solo dela mia famiglia e anca per noi muleti, per poveri che iera i miei, ghe iera sempre qualche regalo.

Per quanto riguarda le candeline (quele che se impizava, no quele eletriche) mi, come al solito del resto, go rivà a combinar disastri; infati 'na volta zogando, visto che in camera iera poco spazio, go ribaltà l'albero e go ris'cià de darghe fogo a tuta la casa.

Noi no i ne portava a mesa, ma prima e dopo del son dela campanela giogavimo a tombola, coverzendo i numeri ciamadi - come se usava in alora - coi fasioi; dopo però se li doprava isteso per far la pasta fasioi.

'Naltra roba me sovien parlando de zoghi, le rare volte che mama e papà 'ndava fora de sera e noi ierimo sai pici, mia nona la ne tegniva boni con un cadin de acqua, do pirie, do caziui e qualche botilia e noi zogavimo a l'osteria impignindo e svodando botilie: meno mal che no semo diventai alcolizai.

Quel che ne piaseva anca tanto far mi e mio fradel co no podevimo 'ndar fora perché iera bruto tempo, iera zogar sul leto disfà (dove con le coverte fazevimo monti e valade) coi soldatini de plastica, in particlar modo coi "cow boy", me ricordo 'ncora che gavevo anche la squaw che se podeva meterla sul caval: quante bataglie che gavemo fato e mi, logicamente, tegnivo sempre per i indiani, anca perché in alora no esisteva soldatini done de qualche altro genere.
Scuseme se son dada un poco fora tema.

El giorno de Nadal mia zia la portava i sui "piati de la festa", anca quei rivadi con ela de l'Austria e me ricordo che i iera de porcelana finisima bianca, con i disegni in rilievo de color blu (gavevo fina paura de magnarghe drento, per paura de romperli) e mia mama (che iera dele "Valli del Natisone") la fazeva una strana operazion col polo (unico in tuto l'anno) e no so con quala mistura (oltre, naturalmente, le frataie) lo impigniva, dopo averlo - logicamente - preventivamente svodado e mi stavo a vardarla con tanto de oci, parché dopo la lo cusiva col fil de imbastir e iera sempre barufa per chi che gaveva de magnar el toco più groso de sto ripien che el iera sai bon.

Comunque, in Austria xe tradizion preparar l'albero de Nadal solo ala vigilia e se lo disfa par la Befana, dopo che xe rivai i re Magi (ma mi penso che i lo preparava solo ala vigilia anca parché se no, noi fioi ghe fasevimo sparir tuta la roba de magnar - mandarini, nose e nosele involtizadi in carta stagnola - prima del tempo e, visto che le bale - de vetro finisimo e belisime - iera sai poche, ris'ciava che l'albero restasi mezo svodo).

A proposito de regali de Nadal, ti te son un mas'cio, ma forsi te se ricordi isteso de una pupa che la iera de moda ai tempi de "la muca carolina": la se ciamava "ciao ciao" e la iera nera e se podeva tacarsela torno i brazi o le gambe parché i sui de brazi e gambe i iera fati aposta per quel, cioè i formava una spece de cercio con 'na apertura per tacarsela doso: quela xe un dei regali che me ricordo de più, anca parché la gavevo trovada prima de la note de Nadal, sconta in t'un armer.

Desert RAT :

Regali de Nadal?? Ai mii tempi i fioi riceveva i regali per San Nicolò, facilmente anche questa iera una trdizion austriaca. Inveze, mia moglie, in toscana la ciapava i regali per l'epifania.

SnowLeopard :

Anche mi me ricordo che i regali li ciapavo per S. Nicolò. Me sveiavo alla matina del 6 dicembre e trovavo una fila de pachi e pachetti sotto la finestra dela camera da leto. Me par che iera qualche regaleto anche per Nadal, soto l'albero.

A proposito de alberi, quela volta iera ancora i veri, con i gingili de vetro e le candeline de cera. Una volta la nostra gatina ghe ga dà l'assalto, e tutto l'albero xe cascà! Un altro albero che xe andà a finir per tera, xe stado tanti anni dopo, quando la mia San Bernardo ghe xe passada vicin e una sventola della sua codona lo ga ribaltà, ma quel iera un albero finto con gingili de plastica, alora go podudo ricuperarlo! E adesso niente più candeline, el mio albero xe un fiberoptic!

Dcobau :

Bei tempi e bei ricordi. Però, a casa mia, senza campanela.

Solo una roba. Come che dixi Sergio, i tempi xe cambiai, xe tuto comerciale, se spendi un casin de soldi, se magna e se bevi tropo, etc. Giusto. Solo che penso che semo noi che gavemo cambià, non solo i tempi. Mi scometo che per i fioi piu pici Nadal xe el steso che iera per noi co ierimo muleti. Solo che ogi semo noi che organizemo, spendemo, magnemo e bevemo tropo.

Stago zercando de emular el Nadal che gavevo a casa mia co iero picio, con tanto de albero (finto) che toca el sofito, la punta (che fin l'altro ano te podevi solo che sognarte) e el presepio che, a parte le figure basi, non rivavo a trovar i extra e che sto ano el negozio dove che lavora mia moglie ga importa dal'Italia.

Non son rivà a trovar l'emozion che gavevo co iero picio ma credo che dipendi dal fato che gavemo sepelì un mio caro amico ala vigilia.

Ma i nipoti (11 e no, non son nono, son zio) - e anche i piu veci - tuti sentai inginociai atorno al'albero che spetava che el nono (mio cognà) cioghi el paco e legi el nome.....tanto de oci i fazeva. Dei, esisti ancora Nadal, dipendi dove e con chi che te lo fa.

continua... (forsi)

[rofizal]

Eco la continuazion...

Hecht Graziella :

Xe vero Dave,
te ga ragion anca ti: tuto dipendi con chi te lo pasi el Nadal!!!
Aprezabilisimo el tuo sforzo de ricrear i tempi de 'na volta e xe anca vero per i fioi, se no i vien mal influenzadi dai grandi, che tropo speso, pel poco tempo e pensando magari de farghe cosa gradida, i se precipita pe' negozi e grandi magazini in zerca del zogatolo più novo o più proposto dala TV.

Ma xe anca vero che i fioi varda tanta, tropa TV (baby sitter sai de moda) e se no i trova soto l'albero quel che i ga visto in TV, i "pianta el muso".
Forsi, comunque, rieducando i grandi (roba sai difizile), se podaria rieducar anca i fioi, ritrovando cussì atmosfere e savori de 'na volta

Ursus :

Mi me ricordo dei primi alberi de Nadal a casa nostra, durante la guera.
Mia mama la li fazeva tajando la zima dei allori (el laverno) che creseva in campagna nostra. Ancora ogi, ogni volta che meto un per de foje nela minestra me ricordo de Nadal.

Grazie a Dio, qua in Canada alberi de Nadal no i manca. A parte un'industria vera e propia dela cultura dei alberi de Nadal, sicome che i pini, e tuti i sempreverdi che i cresi salvadighi ai bordi dele strade e dele linee electriche a gas, i ingombra le strade e pol crear pericolo, con una picola licenza de un per de dolari, ogni familia che la vol, la pol andar in bosco e tajarse un per Nadal.

Mi me son za scelto un per l'ano prosimo. Adeso son andà là e lo go za potado, in maniera che el me cresi come che vojo mi. Dicembre prosimo vado a tajarmelo.

Granzo :

Beh, i alberi de Nadal za tuti fati i esisti, e come, de solito no i xe 'ssai grandi, ma i ga tuto anche le lampadine, e po' 'desso xe anche i alberi parlanti... che mondo! Xe una tristeza che uno se compri un albero za fato, ma forsi xe pezo no farlo per gnente....

Mi me ga sempre piasso el periodo de Nadal, con quele atmosfere magiche che iera in giro, desso xe quasi diventada roba de tuti giorni, in via Udine i ga za impicà le luci in otobre, ma perché no i le lassa su sempre po', cussì i se risparmia la fadiga...

De picia gavevimo tute le bale de vetro; quante che xe andade rote, però qualcheduna se ga salvà. A dir la verità, ormai i le fa 'ssai ben quele de plastica, xe zerte che no ghe se vedi la giuntura e no te capissi se le xe de plastica o de vetro, per distinguerle te devi bater co' l'ongia e sentir se le fa "tiin", alora xe vetro. Mi de diversi ani go ciapà l'abitudine de fabricar adobi in casa. Bale de polistirolo rivestide in tessuto o pailettes, restaurade quele vece de vetro, fate certe co' l'uncineto, o usando i rodoli de carta igienica e rivestidi coi ritai de stofe, opur go anche usà le scatole de carton dei formagini, 'sto ano stago fazendo, insieme ale fie, dele campane natalizie utilizando le botiglie de plastica, sta vignindo ben...

Qualchedun me ga contà, che de picio, non essendoghe soldi in casa, no i podeva permeterse de comprar un albero. Alora i 'spetava l'ultimo momento per cior per un bianco e un nero un pochi de rami. Rivadi casa, i tirava fora el manigo dela scova e i ligava i rami su quel, cussì anche lori gaveva l'albero. I ghe meteva sora un do' nose, do mandarini e l'albero iera fato. Se proprio ghe spupava, i zontava un fil de argento. Questo sucedeva nei ani '50.

Inveze mia nona me contava che ela la fazeva balete de carta stagnola per impicar su l'albero, oltre oviamente ai mandarini e ale nose. La meteva anche le pigne, qualche toco de ovata e le candeline vere e questo iera nei ani '30.

Babatriestina :

Mi de picia no go mai partecipado a far el albero de Nadal. I lo fazeva tuto de scondon, bastanza picio, in una camereta serada, che mi no me acorzo, e po al dopopranzo dela vigilia i lo portava ( mi no lo go MAI visto portar) in camera de pranzo, i lo impizzava (le candele de cera, ma l'espression iera "impizzar l'albero"), i studava tule le luci e i me ciamava, perché mi dovevo pensar che lo gavessi portado no se sa ben se l'angioleto o Gesù bambin in persona.
A questo punto, col suporto de un gramofono a manovela, cantavimo tuti insieme Stille Nacht e O Tannenbaum, po mi me tocava recitar una poesia natalizia in tedesco che i me gaveva insegnado a orecia, e solo dopo se podeva verzer i regaleti che iera soto.

Vizin de l'abero, iera el presepio, anche quel vecissimo, solo el Gesù bambin de ceramica o porcelana, la Madona e San Giusepe anche quei de teracota smaltada, diria, li go visti quesi precisi una ventina de ani fa in porton del Ospedal Magior, ma adesso no se fa più presepi publici che no xe politically correct, chissà che fin che el ga fato...

Quel gramofono lo go tignudo fin do ani fa, col trasloco lo go regalado a un mio amico che ga casa più grande e che ghe piasi ste robe. Adesso me canto de sola Stille Nacht e Tannenbaum perché no go più nissun con mi che le conossi... :'(

Ursus :

Copiite le strofe, cussì te ghe le pasi ai amici e podè denovo cantarla tuti quanti.

Stille Nacht, heilige Nacht,
alles schläft, einsam wacht,
nur das traute hoch heilige Paar.
Holder Knabe im lockigen Haar,
schlaf in himmlischer Ruh,
schlaf in himmlischer Ruh.

Stille Nacht, heilige Nacht,
Hirten erst kundgemacht
durch der Engel Halleluja
tönt es laut von fern und nah:
|: Christ, der Retter, ist da

Stille Nacht, heilige Nacht,
Gottes Sohn, o wie lacht!
Lieb aus deinem göttlichen Mund,
da uns schlägt die rettende Stund,
|: Christ, in deiner Geburt!

Babatriestina :

O Tannenbaum, o Tannenbaum,
Wie treu sind deine Blätter!
Du grünst nicht nur zur Sommerzeit,
Nein auch im Winter, wenn es schneit.
O Tannenbaum, o Tannenbaum,
Wie treu sind deine Blätter!

A sro punto me par giusto meter la version completa (del 1824) ;

O Tannenbaum, o Tannenbaum,
Wie grün sind deine Blätter!
Du grünst nicht nur zur Sommerzeit,
Nein, auch im Winter, wenn es schneit.
O Tannenbaum, o Tannenbaum,
Wie grün sind deine Blätter!

O Tannenbaum, o Tannenbaum,
Du kannst mir sehr gefallen!
Wie oft hat schon zur Winterszeit (oder Weihnachtszeit)
Ein Baum von dir mich hoch erfreut!
O Tannenbaum, o Tannenbaum,
Du kannst mir sehr gefallen!

O Tannenbaum, o Tannenbaum,
Dein Kleid will mich was lehren:
Die Hoffnung und Beständigkeit
Gibt Mut und Kraft zu jeder Zeit!
O Tannenbaum, o Tannenbaum,
Dein Kleid will mich was lehren!

e anche de Stille Nacht ne esiti una seconda version più longa (Vollständiger Liedtext )

Stille Nacht! Heilige Nacht!
Alles schläft; einsam wacht
Nur das traute heilige Paar.
Holder Knab im lockigten Haar,
Schlafe in himmlischer Ruh!
Schlafe in himmlischer Ruh!

Stille Nacht! Heilige Nacht!
Hirten erst kundgemacht
Durch der Engel Alleluja.
Tönt es laut bei Ferne und Nah:
Jesus, der Retter ist da!
Jesus, der Retter ist da!

Stille Nacht! Heilige Nacht!
Die der Welt Heil gebracht,
Aus des Himmels goldenen Höhn
Uns der Gnaden Fülle läßt seh´n
Jesum in Menschengestalt,
Jesum in Menschengestalt

Stille Nacht! Heilige Nacht!
Wo sich heut alle Macht
Väterlicher Liebe ergoß
Und als Bruder huldvoll umschloß
Jesus die Völker der Welt,
Jesus die Völker der Welt.

Stille Nacht! Heilige Nacht!
Lange schon uns bedacht,
Als der Herr vom Grimme befreit,
In der Väter urgrauer Zeit
Aller Welt Schonung verhieß,
Aller Welt Schonung verhieß.

Stille Nacht! Heilige Nacht!
Gottes Sohn! O wie lacht
Lieb´ aus deinem göttlichen Mund,
Da uns schlägt die rettende Stund,
Jesus in deiner Geburt!
Jesus in deiner Geburt!

continua... (forse)

[rofizal]

Eco l'ultimo mesagio del vecio topic.

Babatriestina :

Adesso ve posto una decorazion del mio albero, che no go ancora fato, che papà me diseva che la vedeva de picio su l'albero suo, quindi la dovessi gaver ormai quasi zento ani, come che no la se ga roto!

Quela macia rossa sula testa dovessi esser el capel de paiaz.
Po ghe xe altri pupoti de impicar, un frate, una striga, quasi come marionete, che a quei tempi se impicava su l'albero. Verso Nadal ve meterò el mio presepio, che xe dei noni, go anca el mio ani Cinquanta, ma questo xe più vecio. I camei xe dei camei in legno che in realtà no ga gnente de far col presepio, ma i xe stai comprai.. dei arabi a Betleme! che quela volta no vendeva roba de nadal ma camei de artigianato arabo. Comunque penso che in un presepio vadi ben tochi comprai a Betleme.
E po' inveze go una bala de papier maché indian, tipo laca del Kashmir, comprada in India per i alberi de nadal... la globalizazion

[Nona Picia]

Visto che tuti conta la sua esperienza , mi conto la mia.
Co ierimo pici, mi e mio fradel (mia sorela ga dieci anni più de noi, perciò la iera za grande quela volta!) la sera dela vigilia dovevimo star in cusina con tuta la famiglia a zogar "Non t'arrabbiare" e mio papà e mio cognà (futuro) i spariva, ma noi no se acorzevimo. Dopo qualche tempo sonava la campanela, rivava mio papà e el ne ciamava con vose emozionada e noi andavimo in "camere de pranzo" e trovavimo l'albero de Nadal, no grandissimo, no iera soldi, con le bale de vetro e le candele de cera impizade. Mi dovevo cantar "Stille Nacht", no so perchè proprio mi, se no niente regali, Gesù bambin no li molava, e e dopo li ciapavimo, fati in casa naturalmente, mi, mio fradel e la mia amica che la ciapave le stesse robe che ciapavo mi solo in un altro color. In seguito co' ierimo più grandeti, cominciavimo a involtizar mandarini e naranze e nose de impicar su l'albero.
El più bel Nadal che me ricordo, xe sta quando mio cugin xe vignù a dormir de noi perchè doveva nasser sua sorela e quando gavemo savù che la iera nata gavemo fato una bataglia de cuscini memorabile, con grande scandalo de mia nona.

Per S. Nicolò inveze, ciapavimo solo un piato de frutta dolcetti e nose, no so se per tradizion austriaca, mia mama iera de là, o per mancanza de soldi. Comunque noi ierimo contenti lo stesso.

[nanaia]

Sum Culex: cossa te speti de contar del tuo, anzi dei tui, meravigliosi presepi???? Diseghe tuti , no gavè idea che capolavori. e no rugnar che no te ga tempo
nanaia

[Nona Picia]

Sum Culex: cossa te speti de contar del tuo, anzi dei tui, meravigliosi presepi???? Diseghe tuti , no gavè idea che capolavori. e no rugnar che no te ga tempo
nanaia

I presepi de sum culex xe assai longhi de contar, perchè iera lavor de più de un mese!

[AdlerTS]

Gesù bambin no li molava,

De qua se vedi che te son meza austriaca

Per tornar un pò sul fil de Nanaia, ZERCHEMO DE ESSER BRAVI TUTTO L'ANNO !

[rofizal]

Questa foto "albero di Natale con bambina" non la xe proprio molto nitida (xe sta meso a fogo la porta in primo pian), ma la pol lo steso contribuir a crear un pocheto de "atmosfera". La podesi eser stada fata nei anni '20 o prima.

Considerando le candele che devi eser quele ver, i tendagi no me sembra el massimo dela sicurezza, ma magari i iera ignifughi...

[babatriestina]

e anca el tapedo no xe gnente mal, caucasico, diria..

[babatriestina]

OH! me dimenticavo de dirve.....nei supermercati i ga' messo fora za i ovi Pasquali!!!!!!!!!

Ovi no, ma pinze in giro qua se vedi!

[rofizal]

e anca el tapedo no xe gnente mal, caucasico, diria..

Ah, ma de tapedi ghe no go diversi (forsi anche quel, se xe foto de famiglia, ma no riconoso la casa).... sora l'armadio. Un poco perché i xe rovinadi, un poco perché mia moglie no ga voia de bazilar... là i resta.

[refolo]

Qua' xe differente de quell'altro topic delle luci (meravigliose).
Mi non posso dir de aver avudo Nadai, anzi, per mi' el Nadal xe alquanto triste, sempre stado.
Niente alberi, costava troppo, presepi, andavo in Cesetta de Via Vasari.

La vigilia del 1940, gavevo el prete che me impartiva L'Estrema Unzione.
Se vedi che un Dio xe esisti' per i mii che iera inginociai chei pregava.
Ma mia nonna la se ga' priva' del suo speciale regalo ricevu' da una sua vecia parona dove la lavorava de giovane.

Un Gesu' pochi precisi, el ga' quella faccia de picio sorridente nella magnadora, credo che proprio xe made in Austria, vardero' co lo tiro fora dalla box. Lo gavevo sempre visto in credenza mai tocca', ma riceverlo e separase de lui, xe stado el piu' bel regalo.

I piu' bei presepi che go' visto dopo, iera nelle Ciese de campagna, su' per la Val Sugana-Cortina d'Ampezzo-insomma in giro per la Carnia, e Friul. Ma faro' el mio, sto' anno xe de pramatica, non se scampa.

Maria aka Refolo

[nanaia]

a proposito de candele vere: a casa de mio zio Gastone (nona picia....) la'labero gaveva ciapà fogo un per de volte! Me ga contado mio fradel, perchè mi iero tropo picia e non me ricordo.
A casa nostra, imparado un tanto, semo sempre restai sul..moderno
El presepio, fato poche volte:la più bela (non me stanco de insister, forsi el cedi..) xe stada quando lo ga fato Zoomy
Nanaia

[Nona Picia]

a proposito de candele vere: a casa de mio zio Gastone (nona picia....) la'labero gaveva ciapà fogo un per de volte! Me ga contado mio fradel, perchè mi iero tropo picia e non me ricordo.
A casa nostra, imparado un tanto, semo sempre restai sul..moderno
El presepio, fato poche volte:la più bela (non me stanco de insister, forsi el cedi..) xe stada quando lo ga fato Zoomy
Nanaia

Anche a casa de tuo zio Giorgio (mio papà) l'albero con le candele vere ga ciapà e la neve de ovata ga ciapà fogo un per de volte, ma nianche mi no me ricordo, perchè probabilmente o iero assai picia o no iero nianche nata.