La ferovia Trieste - Erpelle /Pista ciclopedonale

[ffdt]

Ghe ne gavevimo za parlado de la` ... no xe un argomento novo ... pero` xe meio tornarghe per de sora, perche` iera un argomento interesante e che a tanti el ghe gaveva piaso.

Ve meto le foto che gavevo fato caminando per la masiciata. La prima la go fata in via D'Alessio (credo) vardando verso el Burlo (quele caxe base in mezo de la foto). El giardineto che vede` xe quel che resta de la strada ferada, e 'l mureto no 'l xe un de i soliti che la gente se fa percio` che no te ghe vadi in caxa ma xe un de i "dissuasori" che le FFSS ga meso un poco per tuto percio` che no te ghe vadi dentro co' 'l auto.

Ciau

Franco

[ffdt]

Questa seconda foto xe ciapada de 'l steso posto de la prima, solo che me son girado de l'altra parte e inveze che de vardar verso el mar adeso vardo verso la val Roxandra.

Anche se no xe facile de distinguer, quela parte drio de 'l mureto xe quel che resta de la sede de la ferovia: quela volta la iera uxada per parchegio.

Comunque se capisi che xe quela anche perche` la xe drita drita. La tabela su la destra dixi che xe roba de le ferovie.

[ffdt]

Femo finta de andar dentro in te la foto (no, no son mato ... o almeno a mi me par cusi` ;-D) e andando avanti fina in fondo se riva in sto posto qua.

La tabela (come quela de prima) me par che dixi:

Proprieta` ferroviaria
divieto di accesso
pericolo
legge 55-233-310 possibile
invasione suolo ferroviario
art. 52 64 reg. p.f. modificato
con legge 20-3-69 n. 304

Se no me sbaglio qua xe vizin de via Costalunga ... forsi anche in via Naldini (o Gianelli) ... ah, xe pasa` tanto de quel tempo ... doveria tornar la` a vardar de novo.

[ffdt]

Bon, gave` prexente quela caxa in fondo de la foto prima Quela col silos gialo a destra ... eco: quela stesa la vede` a destra in sta foto qua.

[ffdt]

Come che gavere` za capido go fato le foto una drio l'altra a distanza de ... una foto.

Come dir che c'o rivavo piu` o meno a la fine de 'l campo vixivo de la foto apena fata ghe ne fazevo un'altra.

Qua xe le caxe "nove" che xe za stade citade de qualchedun in sta serie ... el treno continuava via drito in quel che deso xe un parchegio co' la sua stradela. Qua semo a 'l incrocio con una de le strade che vignindo zo de via Campanelle le finisi in via Costalunga ... solo che no me ricordo el nome gnanche de questa ... poderia eser via Antico, ma no son sicuro.

[ffdt]

Eco: qua la xe fata stando sora de 'l pontixel che xe in via Campanelle e vardando indrio, verso 'l mar. Difati se pol veder le caxe de poco fa che adeso le xe su la destra. In quel periodo la zona no la iera per niente valorizada ... anche se iera autuno se pol veder una bela graia proprio indove che pasava el treno.

[ffdt]

... e, in efeti, calandose zo de 'l ponte fin la` de la masiciata quaxi no se vedi piu` niente:

[ffdt]

Questo xe el ponte, ciapado per de soto e stando sempre in te 'l steso posto de la foto de prima:

[ffdt]

... e qua xe proprio una tristeza!

Pai ruzini, rede de caponera e un scasamachine ma varda la` come che finisi le robe. Prima riva quei che fazendo una fadiga boia i costruisi qualcosa, po' le robe e ghe pasa a altri che (sicome no i ga fato fadiga per farle) i le lasa andar in niente ... e 'po i le buta via ...

[ffdt]

L'unica roba che se pol dir xe che almeno no xe la graia ... pero` no se ghe pol caminar lo steso.

Sta foto qua la xe ciapada stando de novo sora de 'l ponte e me ricordo che, sicome el ponte el xe streto e i auti cori, dovevo star 'tento a 'l trafico, vardar c'o i auti i iera bastanza lontan, corer in mezo de la strada scatar la foto e filar via prima che i me distiri ...

E una volta per controlar 'l espoximetro ... e un'altra per el diaframa ... me par che per meter a fogo go dovudo far do o tre tentativi perche` iera trafico e no rivavo a far tanto in furia.

Iera piu` de un sofer che c'o 'l me vedeva el fazeva un muxo che mi calcolo che 'l me vedeva za morto e difati in tanti i me ga sonado e bestemia` drio in turco ... per fortuna che mi 'l turco no lo capiso ;-D

[ffdt]

Per fortuna che no xe solo lamiere vece in sto toco: un poco piu avanti xe anche bipedi ;-D ah, che solievo a gaver qualchedun de vivo dopo gaver incontrado tanti orori ;-D

[ffdt]

Comunque, a propoxito de quei bipedi de prima che me pareva quaxi che i ma stasi vardando, devo dir che no i me gaveva gnanche pe' i tachi ... ah che deluxion ... e mi che me son dado tanto de far per "imortalarli" ;-D

[ffdt]

Comunque, dopo de la graia e de le galine ghe xe sto tocheto che xe cocolo: giardineti, qualche albero de fruti ... pasando in auto gnanche no se diria che a pochi metri ghe xe una roba cusi`.

Difati in quel punto la via Campanelle la va in zo e tuto quel che se vedi xe un muro su la sinistra (andando verso la vale).

[ffdt]

Solo che dopo un poco torna la graia: insoma o xe qualchedun che uxa o vien subito graia. Quei che se intendi i ghe ciama "piante pioniere", che xe le prime che le riva perche` xe le piu` stagne. Le prepara la tera per quele altre che dopo le pol creser solo perche` prima lore le ghe ga fato tuto el lavor ... conoso anche mi tanti che fa come 'ste altre piante ;-D in uficio xe pien ... e a pensarghe me sento quaxi un botanico ;-D

Qua inveze me par quaxi de eser in quei viagi organizadi che costa poco, i te prometi mari e monti e inveze ... "a destra potete oservare una vigna, davanti un trato in trincea, intanto la nostra ostess vi mostrera` dele belisime pignate" ;-D

[ffdt]

Comunque, cauxa la graia no go piu` podudo andar avanti e go dovudo tornar un toco indrio e andar per via Campanelle. Qua iero rampigado sora de 'l muro che xe de parte pena che se vien su dopo de 'l incrocio con via Budrio (me par) che xe una de quele stradete tute bigoloxe che va de Campanelle fin in via Costalunga ... groso modo drio de 'l cimitero.

Quela volta quel trato de via Campanelle gaveva el pave` per tera ... deso no so ... xe tanto che no vado piu de quele parti. El pal gialo xe la fermata de 'l autobus; el ponte par tanto original d'epoca e de soto se vedi un altro xbaramento.

Pero` adeso xe tardi e xe meio che molo qua: el resto a la prosima volta (e no semo gnanche a meta` de 'l viagio)

Ciau e bona note a tuti.

[ffdt]

Come che pode` veder in questa, andando sora de 'l pontixel che se vedi in te l'ultima foto che ve go mandado e vardando zo se ga ... come dir ... una vista de altri tempi ;-D

Difati quela volta iera parchegiado un autobus che faria contento qualsiasi colezionista de auti d'epoca. Se gaveria dove meterlo anderia a zercar se 'l xe ancora!

[ffdt]

E qua xe la foto de 'l caxel ... so che no son original e che i la ga in tanti, ma visto che la go anche mi e che la fa parte de quel "viagio a pie corendoghe drio a 'l ultimo treno" ;-D me par che la ghe posi star.

[ffdt]

Andando avanti se riva subito su 'l ponte de via Campanelle. Subito davanti se vedi che intriga el solito mureto che ghe stropa la strada a i auti.

Se a qualchedun ghe fusi vignudo el dubio ve digo subito che quel in te la foto no son mi: mi son sconto drio de la machina fotografica

Se varde` ben, in fondo de 'l ponte (tuto a destra in te la foto) se riva a veder una riga scura: xe la` indove che iera un altro pontixel de fero che adeso no xe piu` ... o Dio ... adeso ... quela volta no 'l iera piu`. Ma no credo che i lo gabi tornado a meter.

[ffdt]

Eco qua: panorama de la cita` vista de 'l ponte de via Campanelle. Peca` che la foto la xe in controluce e no se vedi sai ben.

[ffdt]

E podeva mancar el buxo de via Dell'Acqua A vederlo de qua pareria che se posi pasarghe oltr saltando ... e devo dir che quela volta iero tentado de provar. Solo che go pensado che se xbagliavo fusi finido spalmado in mezo de la strada la de soto e me saria restado solo de spetar che rivi un auto per finir el lavor ... cusi` no son saltado e ogi poso contarvela.

A dir el vero gavevo anche pensado de andar oltre caminando a gato sora de 'l tubo de destra ... ma no me ga parso bel gnanche quel.