Devo dir che quela volta gavevo trovado un poco de sceticismo sula mia ipotesi, anche se nisun, devo dir la verità, la ga mai derisa. Ma alcuni speleologi, vecie conoscenze, che gavevo contatado, i gaveva altri obietivi e de conseguenza i iera impegnadi in altri lavori.
La grota "impossibile" ga confermado i miei sospeti e fosi saria ora de continuar le ricerche che gavevo interote. Adeso tuti sta scavando - sopratuto nel bosco Bazzoni - per trovar un'altra entrata ala sudeta grota, ma no xe questo che me interesa. El mio piano xe più ambizioso, anche se più dificile. Ghe ne parleria qua, ma me seca renderlo publico, perché no voio che altri lo fazi proprio, ma saria sai disposto a condividerlo se trovasi chi volesi partecipar asieme ale ricerche, e no per conto suo.
Cusì se xe qualchedun che ga voia de perder un poco de tempo caminando su e xo pel Carso, magari scavando qua e là, nela speranza de trovar qualcosa de veramente interesante, se fazi avanti. Mi son qua, ma de solo no me diverto granché
.Agiungo ancora che i criteri de ricerca de nove cavità, adotati, diria da sempre, xe diversi da quei che zerco de seguir mi (almeno questa xe la mia impresion).
