Giardino di Villa Engelmann

[babatriestina]

Villa Engelmann xe un parco, al angolo de Via Rossetti con via Chiadino, come che ne ricorda Sonopiccolo.. e che val la pena de visitar in tutte le stagioni perchè el xe tegnudo veramente ben e el ga delle varietà botaniche diferenti dei altri.
Per cominciar, la Villa... no esisti! probabilmente i la ga butada zo inq ualche bombardamento, comunque ghe xe in mezzo i resti de un piccolo edificio, serai, transennai e lassai andar.. chissà che no i meti a posto anche quei prima o dopo!
questo xe el cartel de ingresso, col orario de apertura

e sul porton ghe xe un de quei ferai scuri in ferro battudo, ve lo gaverò za messo sotto ferai, ma costa poco meterlo anche qua

El giardin xe fato in modo de meter insieme piante che fiorissi in periodi diferenti, e che gabi sempre qualcossa de ammirar:
questo xe al ingresso, xe una prima aiola con un gran lauro ( laverno) taiado a bala a topiario: sotto, un per de piantine sempreverdi e una piccola aiola che ga piantine de stagion: in inverno viole del pensiero, ciclamini, po in estate altre annuali.
qua el xe in version invernale ( go foto ciolte un poco in tute le stagioni)

[babatriestina]

Lungo el primo vial ghe xe piantine che fiorissi in febbraio marzo, sempreverdi, camelie, e po una dele vece fontanelle, come che le iera co ierimo fioi per tutta la città:


e xe una zona per fioi, con zoghi. Anche sul pra, oltre ai viai, mi vedo gente che se senta, una roba rara, che qua de solito no i lassa:

[babatriestina]

Nella stagion delle rose, in maggio-giugno, xe molto bel de veder, perchè ghe xe un vial tutto de rose rampicanti

un particolar delle stesse:

in general vedo che nei parchi i sta eliminando le rose, troppo de far, taiar concimar, curar.. meo organizzarse con qualche ditta esterna che trapianta, po co finissi de fiorir buta via e trapianta altro.. ste rose po xe rose un poco antiche e no molto rifiorenti, me ricordo che un sior me ga dito Bel, ma dura poco.. no xe le rose moderne che fiorissi tanti mesi de fila
ma po sotto ghe xe un secondo vialetto ai bordi del qual ghe xe rose antiche rare de collezion. veramente, sto inverno me par che qualcossa sia sparido.. speremo de esseme sbagliada, ecove una rosa antica, xe come quelle che se vedi nei quadri ottocenteschi, no le rose moderna:

[AdlerTS]

El parco non saria mal, go portado qualche volta mia fia: però saria de taiarghe le man a quel che ga autorizzado la costruzion de quel novo edificio la davanti

[babatriestina]

ecco un'altra rosa del genere

e ecco una dele tante targhette
una varietà del 1851!!

questa no xe una rosa, ma una peonia

[babatriestina]

Oltre el vial dele rose, xe un vialetto più ombroso, e xe quel dele ortensie: adesso xe poco de veder, ma verso giugno luglio el xe molto bel, sia per le ortensie sia per la varietà de foie colorate, soprattutto hoste, ai piedi: xe de ammirar la varietà dei colori e delle sfumature de verde e screziature dele foie


no xe solo che le solite ortensie a globo, xe altre varietà più piatte

[babatriestina]

particolari dele ortensie

e dele foie sotto

ghe xe anche un pochi de gatti, che gira de paroni de casa

L'orecetta con la punta taiada disi che el gatto xe stado sterilizzado, per evitar de meter su una gatteria

[babatriestina]

su una scarpata, ghe xe quel che i ciama "giardin argentado" per le piante a foie ciare: no xe facile trovar come tegnir ben tereni in pendio come questo

rosmarin, santoline, lavande,
in alto , po, ghe xe ( o iera?) un gran vaso de coccio ribaltado, e sotto come una cascata de fiori che vegniva zo

in estate, drio dele lavande ghe xe graminacee verdi, per contrasto

[babatriestina]

in estate, xe gigli, ma soprattutto diverse varietà de finti gigli, Hemerocallis o gigli de san Gaetano, gialli, rossi, arancion..semplici o doppi

[babatriestina]

questi, sempre in estate, xe melograni de fior, ghe xe anche melograni nani

e xe anche un per de canne indiche, quele che una volta se vedeva nele aiole centrali dei parchi in estate, e che adessono i metti quasi più perchè bisogna interrarle in primavera, po cavarle via in autunno..

[babatriestina]

in estate, xe anche graminacee verso la tarda estate

eco un altro esempio de varietà de piante e colori: sotto, piantine con foie lineari bianche e verdi e fioretti lilla ( liriope?), po lisette a fiori bianchi, almeno me par, e drio le aucube a foie punteggiade de bianco

co se avvicina el autunno, xe alberi con pomi e vien fora el rosso dei piracantha

[babatriestina]

un altro cespuglio a bacche rosse

e in inverno xe anche i semi de un iris che fa fiori modesti, ma belle bacche rosso fiamma



Spero de averve dado un'idea della varietà de fiori e piante che se pol trovar in Villa Engelmann, mi go messo foto un poco piccole, perchè per no ralentar de carigar la pagina le go linkade a un mio album, ma i nostri fotografi, per no parlar de quei che ga o gaverà le reflex, pol andar e meterne la loro version, che sarà ben gradida!

[sum culex]

Mi no go e no gaverò (almeno penso) la reflex per diversi motivi, ma, in otemperanza ala vecia nostra sfida zoom contro zoom, zonto un per de foto de piante de Villa Engelmann.

Un'aiola fiorida: viole del pensiero, no ti scordar di me e altro



Altre due interpretazioni dela acquilegia

[sum culex]

Sta pianta inveze no te ga messo: dovessi esser la Pieris formosa






ciao
zoomy

[babatriestina]

Sta pianta inveze no te ga messo: dovessi esser la Pieris formosa

No xe la Pieris, ma la Photinia Red robin. La go anche in mia terrazza. No la go postada, pur avendola fotografada ( go centinaia de foto del giardin..) per alcuni motivi: per cominciar, mi la go vista no in aiole, ma in cassette, no inserida in un contesto paesaggistico, ma piazzada là senza colegamenti cole altre piante: insomma, el opposto del bel che volevo far veder, po perchè no la me par una pianta molto special, anzi nei ultimi anni la xe deventada molto usual, che i la ciama "el novo lauroceraso" perchè la xe per tute le siepi come el prezzemolo
ecola nel posto dove che la xe, e el de là dele bele foie rosse, che xe cussì tuta la primavera, no la me par ben inserida nel giardin.
( a meno che nel frattempo no i la gabi trapiantada..)


Xe anche i agapanthus, le hamamelis, le profumatissime sarcocche, quela a fioretti gialli invernali e foie tipo agrifoglio c he no me vien l nome, le camelie, le belle di notte, i lillà in varietà laciniatum...
speto altre foto de fiori più bei.
la prima aiola xe quela de presentazion, e i la tien sempre ben

[babatriestina]

Oggi go fatto un giro in Villa Engelmann ( la villa original che no esisti più iera del 1840..) e go fatto una serie de foto più ordinada e completa, relativa alla situazion de adesso, maggio:
El terren, in via Rossetti xe come tuti quei delle ville là, e ga el problema, vantaggio o svantaggio, de esser in pendenza, per cui el xe spesso a terrazze, la parte bassa più ombrosa, la parte alta più averta. El xe interessante per come che xe associade in certi punti le piante, no so quanto sia del original o merito dei attuali giardinieri.
Ve risparmio el solito fanal de ingresso, e comincemo con una panoramica apena entrai, lato basso:



alberi de alto fusto, cespugli e aiole fiorite
No ghe iera sol, e se accontentemo dela luce che ghe iera

qua se nota el bellissimo cespuglio curado, taiado a palla sula sinistRa, una specie de biglietto de visita

questa aiola xe sempre piena de fiori trapiantai, stavolta xe margheritine bianche e rosse, nontiscordardimè, viole dle pensiero..

[babatriestina]

quel che ammiro in sto parco xe la capacità de meter insieme le piante anche coi colori dele foie: qua la decorazion xe dada solo delle forme e colori dele foie dei arbusti



( i germogli rossi dovessi esser una Nandina, che po in inverno fa bele bacche rosse)
el viale prosegui ombroso, e sulla destra, stavolta no go fotografado, xe la zona zoghi dei fioi

i alberi xe principalmente ippocastani e aceri, ma no manca conifere

[babatriestina]

rivedo sempre volentieri la vecia fontanella, nella parte bassa, come che iera co iero putela



nella parte bassa, le camelie sta sfiorindo, ma xe in fior qualche azalea

e più in alto ghe xe, più rare, le azalee gialle

[babatriestina]

un poco sora, ghe xe un bel pra calpestabile, con al bordo cespugli.



un cespuglio che no so identificar, a fiori bianchi e rosa



e tutto un bordo de rose a grandi cespugli, lassade crescer in maniera esuberante

[babatriestina]

Una volta tutte le rose gaveva una tabellina metallica col nome, adesso la xe stada cavada, per cui no son sicura dei nomi, ma xe sicuro rose de tipo antico, de collezion:
queste ghe assomiglia ala Variegata di Bologna



questa xe bianche a fior semplice e piuttosto grande



anche queste dovessi esser antiche