Mestieri in ordine sparso

[AdlerTS]

Ghe ne metto un pochi, se ve va gioghemo a darghe una spiegazion:

i "Lamparetti"

i "Bacoli"

el "Conzacareghe" (facile)

el Sotàiero

[refolo]

scusa Adler....forsi sbagliero',
ma mi' go' inteso dir dai veci che i Lamparetti e i Bacoli iera le guardie de Francesco Giuseppe......
Conzacareghe come ditto ti' xe facile.
come che conzapignate = el stagnin ecc.
Maria aka Refolo

[AdlerTS]

Per i primi due ghe semo quasi, ma non proprio...e el sotàiero ?

[sum culex]

El sotaiero iera el palombaro.

I 'bacoli' iera i polizioti austriaci vestidi de nero e, a suo tempo, co i nostri veci li incontrava i bateva un taco per tera e i girava un poco la scarpa e i diseva: Zac un bacolo (come che se disi quando che efetivamente se mastruza un bacolo inseto)

El 'lampareto' iera el tubo = vigile urbano, cussì ciamado perchè durante la ronda de note el cirava con una lampada (lampara) probabilòmente a petrolio.

Caro Adler, go sbaglià qualcossa?

Ciao
sum culex

[AdlerTS]

Bene bravo 7+

[Nona Picia]

Bene bravo 7+

Solo?
Ciao ciao

[AdlerTS]

Vedemo se Sum conossi "el petoraler"

[babatriestina]

Vedemo se Sum conossi "el petoraler"

vendeva petorai? ( me contava nona..)

[AdlerTS]

Nel dettaglio ?

[babatriestina]

Nel dettaglio ?

i petorai iera una varietà de peri, no so se i li vendeva cotti o caramelai...

[AdlerTS]

Peri cotti vendudi "sul stecco" per antidoto domacio ai rafredori e le malatie de peto.
El mato girava col pignaton caldo a tracolla dove i peri stava in caldo a bagnomaria grazie a le bronze che iera dentro.

Sum me dispiasi ma Baba xe stada più veloce

[Nona Picia]

Peri cotti vendudi "sul stecco" per antidoto domacio ai rafredori e le malatie de peto.
El mato girava col pignaton caldo a tracolla dove i peri stava in caldo a bagnomaria grazie a le bronze che iera dentro.

Sum me dispiasi ma Baba xe stada più veloce

Sum no ga visto perchè el iera impegnà a rostir pei amici!
ciao ciao

[sum culex]

Peri cotti vendudi "sul stecco" per antidoto domacio ai rafredori e le malatie de peto.
El mato girava col pignaton caldo a tracolla dove i peri stava in caldo a bagnomaria grazie a le bronze che iera dentro

E che boni che i iera; no i esisti più come che no esisti più i mussoleri che i te dava i mussoli caldi in una ciotola de smalto bianco co' l'orlo blu anche un poco schingada.

Comunque a proposito del petoraler: ve gavè dimenticà de dir che girando el mato zigava: PETORAI, PETORAI.

Ne più ne meno de come che el 'gua' zigava: Gua, stagnino (o conzapignate), ombrelaio!
E per completar l'argomento del gua: qualchedun cioleva la roba e la portava via per riconsegnarla riparada o guada el giorno dopo.
Quei che fazeva solo i gua, girava su una spece de bicicleta atrezada e quando che qualchedun ghe dava el cortel o le forfe de guar, i se fermava, i modoficava la posizion dela bici (no me ricordo ben come) e coi pedai i fazeva girar la mola che de sora la gaveva un pignatel con un tubeto ala base che fazeva scolar l'acqua, joza a joza, per tignirla umida.

ciao
sum culex

[sum culex]

Nel dettaglio ?

i petorai iera una varietà de peri, no so se i li vendeva cotti o caramelai...

I li vendeva sia coti che caramelai.
Sta varietà de peri (ssai pici, dureti, verdi con riflessi color ruzine) de inverno se li trova ancora in qualche boteghin, ma xè sempre più raro, perchè xè ssai pochi quei che li compra: i giovini e anche quei no più tanto giovini, no i li conossi.
ciao
sum culex

[babatriestina]

Vero: ogni tanto se vedi peri con scrito petorai, me par che i sia piutosto pici, e mi no savevo apunto come cusinarli.

[Nona Picia]

Vero: ogni tanto se vedi peri con scrito petorai, me par che i sia piutosto pici, e mi no savevo apunto come cusinarli.

Te li fa coti come i pomi o i peri,solo che ghe vol on poco più de tempo de cottura.
Ciao ciao

[sum culex]

Ghe ne metto un pochi, se ve va gioghemo a darghe una spiegazion:

El Signor ADLER ga proposto una spece de 'quiz' (quiz no xè dialeto triestin)
anche mi meto tre parole: de cossa se trata?





Verigola

Bartuele

Girandola (No i foghi de artificio o altro, ma quela che se comprava in feramenta!)

In atesa de numerose risposte
ciao
sum culex

[babatriestina]

[
Verigola

Bartuele

Girandola (No i foghi de artificio o altro, ma quela che se comprava in feramenta!)

La Verigola o virigola xe una specie de punteriol con l'estremità a elica, che apunto se invirigola con movimento rotatorio, più o meno come un cavatappi.
Speta che gabio voia e te metto un per de foto.
Se la pol doprar per cominciar e far el "foro d'invito" ( ghe xe el nome corispondente in triestin?) prima de invidar una vide

le bartuele xe .. cerniere, ma no quele lampo!!

per la girandola, no son sicura, ma imagino che sia quel strumento per far busi con una specie de gomito per cui se fa un movimento come per missiar la polenta ( dovevo gaverla, ma no so se la ga sopravvissudo al trasloco completo del tavolin de marangon da papà) - papà la doprava per far busi larghi sul fondo dele cassette de legno dei fiori in pergolo

[sum culex]

La verigola in italian xè el 'succhiello'

La bartuelela xè la cerniera: quela dele porte dei mobili.

Come che giustamente la gent.ma sig.ra baba(TS) ga risposto: ma za iera scontà che la savessi: la ghe ne sa una più del diavolo (senza ofesa).

La girandola, no so ben come spiegarve, iera un afar che serviva per serar le porte dal'interno. Ve meto una foto (no xè artistica) cussì se capissi meio de cossa che se trata: che mi sapio no se le trova più o quasi.



Ghe ne iera de diverse misure a seconda de quel che serviva.

Adesso ve zonto un'altra parola

SPIZZE

cossa xè le spizze?

E ti Signora Baba(TS) speta che rispondi anche qualchedun altro, son sicuro che ti te sa e cussì no val. Ste robe te le sa tute anche se te xè bastanza più giovine de mi.

Me gira per la capizza un'altra parola: no so se la xè inventada o se la girava veramente a casa mia co'mi iero picio

el spianer o la spianera

de quel che me ricordo o che me par de ricordarme, in sto modo i ghe ciamava ala tavola de legno che se pozava sula tola de cusina che quela volta, de solito, iera de marmo de Carara, per distirar (spianar) la pasta per far le tagliatele fate in casa e anche la pasta per far el strucolo de pomi o el presnitz.
Xè po vero?
Cara baba(TS) qua te pol illuminarme anche subito: mi sui vocabolari sta parola no la go trovada (ma xè sucesso anche con certe altre che xè stade citade)

ciao
sum culex

[babatriestina]

vero, la girandola! a casa mia se le meteva co le antine dei mobili no serava più, go ancora un per de mobili de cusina serai cola girandola.
Ma alora quela roba per far busi che disevo mi, che nome ga?

per la tavola , che in italian se ciama spianatoia e in triestin no so, me par che iera la tavola de legno i ghe diseva.. o la tavola dela pasta... ben, mi la go ancora, che go la tavola de cusina col ripian de piera ( no xe marmo propio..) e soto xe do sine per far scorer la tavola de soto. Savendo ben, se ghe riva a meter anche el rodolo per la pasta! e la dopro ancora se go de distirar qualcossa de grosso o meterghe i gnochi de patate.