Chiese a Trieste: San Giusto

[babatriestina]

Gavemo parlado de tute le cese, ma no ancora de San Giusto. Oviamente, lo conossemo tuti, ma mi devo dir che ogni volta che ghe vado ghe trovo qualcossa de novo de osservar. Xe che la cesa xe quela che ga durado più de tute, e sempre in funzion.
Comincemo cola storia, savemo tuti che san giusto xe cotruida sui resti de un edificio roman, ma za qua se comincia a gaver dubbi. Co iero picia mi i diseva che iera el tempio ala triade Capitolina, ( Giove, Giunone, Minerva, se no me sbaglio) l'idea xe de una piramidina de piera coi simboli de ste divinità che i ga trovado là. Ma più che i varda e più i pensa che sia inveze stado una specie de portico, magari davanti del tempio.
I resti xe inglobai nel campanil e una parte se la vedi de dentro, e le colonne sopratutto quele dentro xe nere e rovinade. Ma ecovele viste de fora: la colonna scanalada a capitel corinzio

e una parte del fregio a armi de guerra

[babatriestina]

ancora un toco dela decorazion cole armi

e un particolar del fregio a girai, el me par molto delicato e anca resistente tegnudo conto che el xe là al averto de secoli

[babatriestina]

i pensa che doveva esser una costruzion con due avancorpi laterai, come questa cartolina sugerissi

Xe el tipo de costruzion come el altar de Pergamo ( a Berlin) e i pensa che l'edificio de l'univerità nova voli ispirarse de questo
per el altro toco, i ga messo sul sagrato dei segni per terra. Doveva esser una scalinata che andava zo e che se vedi de un cunicolo del Orto lapidario ( credo che là i gabbi sepolto Fouché)

[babatriestina]

Finida l'epoca romana, i ga costruido un per de cese là, forsi una basilica paleocristiana e po le due cese parallele: a sinistra L'Assunta e a destra San Giusto, come che se pol veder in questo pupolo de una cartolina:

Nel trecento i ga butado zo le navate in mezzo, i ga costruido la navata centrale e xe deventado el san Giusto attual, col roson, el portal, la sstatua de San Giusto come che le vedemo adesso. O quasi, perchè i conta che el campanil gaveva una punta più acuta, ma el xe vegnudo zo e i lo ga ricostruido cussì smussado.

[babatriestina]

La navata central ga colonne recuperade un poco dapertutto l'abside xe stada rifatta nei anni trenta del Novecento, invece i mosaici delle due absidi laterali xe ancora delle do basiliche, bizantini de stile, simili a quei de Torcello, e i xe stadi recentemente ripulidi.
La navata centrale:

e quella dell'Assunta

Cussì la cesa se trova a gaver 5 navate e pur essendo a pianta basilical, vista la larghezza, la xe quasi quadrata nelle dimensioni

[babatriestina]

la basilichetta a destra, de San Giusto, ga una sua cupoletta e un'abside, se li apprezza ben visitando el Castel

Restando sempre sul lato destro, el mosaico absidal mostra Cristo con due santi ai lati San Giusto e San Servolo

[babatriestina]

Ovviamente, nela cesa troveremo un sacco de immagini de san Giusto: ecove el particolar del mosaico

e adesso guardè sotto i pie del Cristo:

el ga soto i pie due bestiuzze, un dragon e un basilisco, o cossa che volè, insomma xe due bestie malvagie, qualchedun disi che le xe stade messe dopo la battaglia de Legnano per simboleggiar la sconfitta del Barbarossa

[babatriestina]

Le decorazioni de l'absidina de San Giusto contien tante robe interessanti: dei capitelli, provenienti de una prima basilica, con un monogramma:

xe el monogramma del vescovo Frugifero el primo vescovo documentado de Tergeste ( Vi secolo)
Sotto xe dei affreschi, storie di san Giusto, romaniche, circa del 1240

( l'ultima volta che iero no se le vedeva perchè coverte de quadri settecenteschi)- i le ga riscoverte nel 1954 perchè sora ghe iera dei affreschi trecenteschi
I quali xe stai staccai e messi nel Battistero che de solito xe serado a ciave, per cui ve li fazzo veder in una foto a distanza: qua xe el più famoso affresco con san Giusto cola cità in man, epoca 1350 circa
[

[babatriestina]

E de questo, ve se mai acorti? a destra e un'altra abside, affrescada con questa immagine con una croce gemmata e due figure adoranti ai lati


nella cappella de San Giusto adesso i ga tirado fora delle tele settecentesche con San Giusto ( ancora!) che offri la città, ve metto un particolar dela parte bassa, che se vedi la sommità del Colle nel settecento, c ol castel e la cesa

( xe foto fatte cussì, in cattive condizioni de luce, ma dà lo stesso un'idea)

[sum culex]

Cara baba(TS)
Ieri insieme cole foto dele cese che go messo in 'Cese de Trieste' gavevo preparà anche un poche de foto de San Giusto, ma ti te me ga precedù, ieri no go rivà a mandarle: te se ofendi se le mando lostesso? Spero de no!
Xè forsi un completamento de l'architetura anche se certe se somiglia.
Te garantisso che no voio assolutamente meterme in concorenza con ti, anzi, se te par che no le vadi ben cancelile .
Mi le mando senza comenti: quei te li lasso far a ti che te xè zento, mile volte più esperta de mi, che praticamente son solo apassionà de fotografia.

L'idea iera de dir:
Vignì con mi a far un giro nela Catedral de San Giusto.

Eco le foto: de fora e de dentro.










I bassorilievi dentro nel campanil

[sum culex]

Adesso andemo dentro































El tesoro

[sum culex]

E per finir ancora un cuc de fora






Spero che ve gabi piasso e che no sè rimasti delusi.

ciao
sum culex

[AdlerTS]

Spero che ve gabi piasso

Sempre !

[babatriestina]

tecnicamente le xe anche meo dele mie
e te me sparagni de zercar foto de postar, posso comentar qualcossa, e no sta creder che gabio finido!
te ga messo el genietto alato dentro del campanil, per la sezion romana, che mi me mancava.
Po te ga messo el San Giusto esterno, che no gavevo ancora comentado el esterno, el xe del trecento ma la testa xe anterior ,per mi la testa xe alquanto brutina.
Se vedi molto meo i afreschi dela capella de San Giusto e el mosaico del abside.
Po te ga messo l'armer dela capella del tesoro, che ghe devo ancora rivar
No go gnanche comentado la navata central, ma penso che ormai tuti sapi che el lampadario de bronzo in mezzo vien dela sala del trono de Miramar.

[babatriestina]

Semo sempre nela navata destra, dopo la cappella de San Giusto, la cd cappella de S Apollinare, ecove un particolar del pavimento a mosaico

[babatriestina]

nelle cappelle a destra xe tante robe de veder:
la più vizina de l'altar xe la cappella dei Borboni carlisti, spetè che me ricordo tuta la storia ben, se volè, in riassunto nel Ottocento ghe xe stado un poco de remitur in Spagna cola succession dei re e un don Carlos no i lo ga riconossudo come re, lu e la sua famiglia i xe vegnudi a Trieste e i stava in Via lazzaretto Vecchio, tutta la famiglia xe sepolta a San Giusto, l'ultimo i lo ga sepolto gnanche tanti anni fa. Mi no go foto de ste tombe, al momento SumCulex ti ghe ne ga ti?
po xe la cappella de San Servolo, che se vardè ben nel altar se vedi el teschio de San servolo ( mi ste robe no me piasi, quindi no speteve che fotografo), ghe xe inveze una deposizion scola tedesca del 1400, ma qualchedun adesso disi che xe piutosto scola furlana




ecove la cappella sotto Pasqua co i metti una gran raggera de oro

[babatriestina]

e ecove un trittico dedicado a san Servolo del Wostry ( primi del Novecento?) ve devo dir che nol me entusiasma, la via Crucis del Wostry a S Maria Maggior me piasi de più

[babatriestina]

Al ingresso xe l'acquasantiera con... indovinè??
San Giusto!!!
de Mascherini, anni 50 del Novecento

ma ancora più a destra, questa picia aquasantiera molto più antica, la gavevi mai notada?

[babatriestina]

Semo ancora nella navata destra, eccove i pannelli su tela del Settecento con San Giusto, che ogni tanto i li tira fora anche se no i xe stai restaurai, i xe del 1704 e i xe del pittor Antonio Panza



e ecove el particolar del santo

[babatriestina]

E ancora nella navata destra, su un muro in una nicchia xe una Madonna più o meno romanica

, diria un poco sul genere de quella che xe di fronte al S Cipriano
E sempre in fondo a destra xe questi vasi, che me par de peltro, nel recinto del battistero e dovessi contegnir i oli benedetti



Resta ancora la navata centrale e tutte le navate de sinistra, tesoro compreso.