Parigi

[babatriestina]

Mi son una fanatica de Parigi, dopo le prime volte che iero una muletta son tornada più volte e adesso go deciso de andar, se posso, una volta al anno, magari pochi giorni. Cussì anche sti giorni go fatto un giro, molto xe sempre istesso e altro inveze xe ogni volta qualcossa de novo.
Comincio col classico: Notre Dame:


Me credè se ve digo che questa xe a Parigi?



qua no semo al solito Orsay che xe pien, ma ala nova Orangerie riaverta de un per de mesi, cole ninfee de monet e altri impressionsiti, ecove un Cézanne

[babatriestina]

po iero al Musée de Cluny, museo de roba medieval, ecove le corone votive dei re visigoti in Spagna. prima che arivi i arabi ma dopo la caduta del impero roman

e eco le teste dei re de notre Dame, co xe stada la rivoluzion i rivoluzionari credeva che fussi i re de Francia e inveze doveva esser i re biblici, i la ga trovade no molti anni fa, fazendo lavori soto un palazzo

questa inveze xe la Senna fora Parigi, xe un punto dove che andava a far quadri i impressionisti ( e mi go pranzado là in un ristorantin sui bordi del fiume): la Grenouillère

[AdlerTS]

Bienvenue en arrière !!!

Me credè se ve digo che questa xe a Parigi?

Quela che xe a New York la ga fata i francesi, no ?

[babatriestina]

Un giretto in Normandia a trovar i mii cugini, che me ga portado a veder sto delizioso castelletto

e po a Lisieux, dove che ghe xe el santuario de S Teresa ma anche una bellissima cattedral romanico-gotica

e questo xe uno dei quartieri novi, verso Bercy, xe un grande giardin, una corte de ristorantini e di fronte una grandiosa costruzion de grattacieli che xe la nova Biblioteca Mitterrand: i forma dei angoli come se fussi libri.

( altro, trovè sul sito de Sandro, ma visto che go oltre 400 foto, diseme se ve interessa qualcossa in particolar: iero al Louvre, a Cluny, ala Malmaison, lungo la Senna, poco de sera..)

Go anche tanti ferai parigini: li meto qua o li meto coi ferai nostri per confrontar?

[AdlerTS]

Diria la Senna

[babatriestina]

Eccote la Senna:
aprofittando del bel tempo, un dopopranzo go fatto el classico giro in bateau mouche, ma senza el ristoramte seral che i offri nei viaggi organizzai. Ovviamente iera pien de giapponesi che fotografava a tuto spian
Se parti no lontan dela Tour Eiffel e se fa un giro fin ala Cité e Ile S Louis, che no go fotografado perchè la gavevo fotografada due anni fa, po i gira e i va fin ala statua dela libertà e se torna indrio: un poco più de un'ora.
Avviandome verso el battello:

i battei xe tipo questo:

sula Senna ghe xe ancora un poco de traffico fluvial, passa quei batei longhi che cariga sabbia

[babatriestina]

El primo ponte xe Pont Alexandre III, el mio preferito, 1900. Co lo go visto la prima volta de picia el iera de metallo scuro, ma adesso i ga lucidado e dorado un sacco de parti:


ecco come le iera nel 1963

qua semo un poco oltre, davanti a Place de la Concorde e a destra xe el Palais Bourbon ( per Capuzzi: questo xe el famoso "Vedi, già al Ponte Pérronnet s'agglomera la folla" de Andrea Chénier- Perronnet xe l'architetto del ponte)

[babatriestina]

qua xe un punto dele rive ( I Quais, con sora i venditori de libri e stampe, i bouquinistes), con un pochi de alberi, xe tuta una passeggiata lungo el fiume in basso che go fatto un per de anni fa, ma quel che me ga colpido in questo punto, xe le tende de campeggio!! xe barboni moderni o campeggiatori?

questo xe tutto verso la Rive Gauche
po se el Institut de France, che no se pol visitar

( qua dovessi esser la tomba de Mazzarino)

el prossimo xe sula punta dela CIté, el Square du vert Galant ( che saria quel cotoler de Enrico IV) ma sto bel giardinetto xe el punto dove che i ga brusado i Templari nel 1313 ( almeno el Gran Maestro de Molay), in vista del palazzo real de alora- che la leggenda disi che el li ga maledetti, e difatti no i ga avudo eredi e po i xe stai imprigionai propio al tempio)

el ponte drio xe el Pont neuf- un dei più antichi- altri ponti xe pieni de N napoleoniche

[babatriestina]

Xe qualchedun che ghe piasi Maigret?
ben, perchè qua semo lungo la punta dela Cité, e queste xase xe el drio de Place Dauphine, dove che nei romanzi Maigret andava a magnar un panin o se fazeva portar i panini durante i interrogatori

e el palazzo successivo, che xe un edificio ottocentesco, xe la facciata lateral col ingresso del Quai des Orfèvres, apunto el uficio de Maigret ( una volta ghe son entrada e uscida de quela parte). I orfèvres iera una volta i orefici, e par che là gaveva la bottega quei che ga fatto la famosa collana dela Regina de Maria Antonietta

adesso se avvicinemo a Notre Dame

[babatriestina]

El fianco de Notre Dame col roson del transetto

Notre Dame vista de drio

po vien l'Ile S
Llouis , alcuni ponti moderni e verso el Pont d'Austerlitz se vedi i palazzoni moderni che xe davanti della Gare de Lyon

La Biblioteca Mitterrand e el quartier Bercy vien ancora più zo (a monte, saria) de questo. Un bel esempio se volessimo sfruttar a Trieste zone industriali dismesse- ma noi no gavemo la popolazion che ghe xe a Parigi

[babatriestina]

Tornando, sa passa rente dela Rive Droite, la Samaritaine (un grande magazzin che no xe più quel de una volta, i xe sempre meno generalisti), el Quai aux fleurs dove che a volte go ciolto semenze per el mio pergolo, po vien ancora sula Cité la Conciergerie ( posto triste, son andada una volta)


chi disessi mai che sta bella torre bianca doveva esser quela della sala dele torture? solo l'assenza de finestre a piano terra..
e dopo a destra xe el Louvre, che noi xe gnente de special de fora, l'ultimo padiglion che se vedi xe un dei do tochi restai dele Tuileries

[babatriestina]

E adesso se avvicinemo ala Tour Eiffel (i Invalides cola tomba de Napoleon del fiume se vedi bastanza de lontan)

qua la statua dela Libertà la par propio a New York
( i ga fato parechi grattacieli fora del centro)

( per Adler, no me ricordo ben la storia dela statua: questo iera un modelin?)
ma po se vedi meo drio
[

[babatriestina]

e questa xe invece la Senna più a valle, iero andada col autobus ala Malmaison ( la casa de Napoleon e Giuseppina) e leggendo i nomi dele fermate del autobus e la piantina del medesimo me son acorta che poco oltre se arivava al fiume, nela zona dela Grenouillière che iera un localin sul acqua che gaveva piturado Renoir e Monet : eco la Senna là

a sinsitra invece se ariva a Bougival, ma el mio abbonamento bus no iera previsto per cussì lontan, che a mi me ricordava la Signora dele camelie che nel romanzo i va a star a Bougival: xe là che saria ambientado el secondo atto dela Traviata
( la tomba dela Signora delle Camelie al cimitero de Montmartre

( le mie foto xe meno artistiche de quelle de SumCulex, ma spero che almeno le descrivi ben)

[refolo]

bellissime foto, meio de quelle che ga' ciolto i mii fioi...
cossa te adoperi che macchina? mio genero con la movie camera, mia fia con la digital? non xe tanto.

La statua della Liberta', xe stado un regalo per l'Amicizia tra' l'America-Francia...La Liberta'illumina il mondo. 1886.
(diventa Monumento nazionale in Ottobre 1924- restaurada al 4 de Luglio 1986 per el centenario, ) chiusa al pubblico, go' dovesto accontentarme de una cravatta con l'efigie e tutta la storia scritta in Francese.

Maria aka refolo

Un suggerimento, da Londra a Parigi sotto el Canale xe eccitante, in un per de ore te se trovi alla torre Eiffel.

[babatriestina]

Go una picia digital compatta, una Fuji. La tegno de solito in modo semiautomatico.
Cambio in continuazion la sensibilità a seconda dela luce e nei interni me dano l'anima per trovar el punto de bianco giusto. Per fotografar in interno senza flash col scuro senza gaver tropo mosso, regolo l'esposizion un poco sotoesposta, che tanto volendo se pol dopo coreger, cussì guadagno un ninin nel tempo de esposizion. No go cavalletto, xe spesso proibido e no tempo nè voia de starghe drio. me piaseria gaver una con un zoom maggior, ma alora el comincia a pesar de più.

Per el tunnel, gavevo fato anche mi el pensier inverso, de andar un giorno su e zo a Londra ( a rivederme o el British Museum o el Victoria and Albert Museum, che xe decenni che no li vedo), ma po me sentivo un poco stanchetta e go preferito restar a Parigi, salvo el giorno in Normandia dei parenti. ( po.. me trovo meo cola lingua francese che cola inglese.. a Parigi me sento a casa, a Londra me sento lontana, e po me gavessi anca tocado cambiar i euro )

[Nona Picia]

Bele foto Betta, grazie. Se un giorno te ga voia e tempo, me piaseria veder el Louvre.
Ciao ciao

[Coce]

Beta grazie mille per le bele foto de Parigi, e piu' ancora per el tuo magnifico commentario. Tutto cio'prova una mia opinion che per veramente goder le visite nele grandi citta' che vol aver un certo grado de coltura, e digo cussi' perche' go conosu' tanti che i xe andai in giro per le grandi citta' co i iera baui e i xe tornadi cassoni . Ciao Coce

[babatriestina]

Ben, ecove qua el Louvre: xe la mia passion, ghe vado ogni volta do o tre volte,e me entusiasmo sempre: xe impossibile vederlo in una volta, anche se in teoria se podesso percorrerlo tuto, ma.. senza fermarse!!
La prima volta che ghe son andada son entrada ale 9 de matina e son vegnuda fora a le 4 de dopopranzo e gavevo visto quasi tuto, ma el iera più picio de adesso!!
per entrar, ghe xe la piramide nela corte

ma no convien entrar de là, convien del métro che xe un ingresso diretto: xe tuta una zona sotterranea con negozi , che convergi in un secondo atrio, dove che ghe xe la piramide inversa


In ste zone i ga trovado i resti del primo Louvre medieval e de un vecio muro, eco qua un toco:

po se va verso el ingresso del museo, controllo ai raggi dele borse e grande atrio, per cior i biglietti se fa come mi che me fazzo una carta bona per tuti i musei per un per de giorni, che se salta tute le file de giaponesi, o se fa la fila al sportel o se se fa i biglietti ai sportei automatici, soprattutto ocn carta de credito. Ghe xe dei banconi de informazioni che distribuissi piantine del museo in tute le lingue, le xe molto comode, perchè anche mi che pur ghe vado spesso ogni tanto me domando Come vado fora? dove arivo prima? dove le le toilettes?
El museo xe diviso geograficamente nele tre ali: Sully ( el quadrilatero centrale) Richelieu( l'ala sinistra) e Denon ( L'ala destra) e del punto delle collezioni in dipartimenti:
arti mediorientali, arti egizie, arti greco romane, pittura, scultura francese, altra scultura, oggetti d'arte e po una picia sezion de arti islamiche, una de arti grafiche e una picia de opere de culture afroamericane che xe per ora in prestito.
Ve mostrerò un poco ala volta, sezion per sezion( anche sul sito de Sandro go postado nela sezion Parigi, do volte, ma no meto le stesse foto): queste comunque no xe solo de stavolta, ma anche dei anni scorsi: le foto xe un poco con grana grossa, perchè xe foto de interni. xe permesso fotografar in general, el flash xe sconsigliado ( ma no vietado), e de sto anno i ga vietado de fotografar certe zone, ma mi go pien de foto dei anni scorsi. Oviamente xe proibido de fotografar la Gioconda, ma mi de quel quadro ghe ne son stufa, la prima volta che lo go visto go dito Ma la xe verdolina e con tuto quel che xe, per no parlar del codice da Vinci, no la posso più soportar!!! la xe per ogni canton, per ogni catalogo del Louvre, per ogni pian ghe xe el cartelin per andar ala Gioconda!!!

[babatriestina]

Andemo nell'ala Sully, in mezo, e restemo nel mezzanin: queste xe sezioni nove, ghe xe i tochi che i ga trovado co i ga fato i scavi per la piramide, oltre ei muri del castel medieval, ghe xe i tochi de una corona de un re medieval ( Carlo V o Carlo Vi) no me ricordo, comunque del tre quattrocento, epoca dela Guerra dei 100 anni, eco la ricostruzion del elmo:

po a man sinistra xe la collezion de arte islamica: stavolta no ghe go messo piede, ma la go vista altre volte, xe tapedi persiani, coppe de giada, vasi, ceramiche, ve fazzo veder una brocca de metal decorada

e una lampada de moschea: mi ste lampade de vetro decorade a smalti colorati le me piasi tantissimo, dove le vedo le fotografo, le xe più o meno del 1400 e le vien de Siria o Egitto

[babatriestina]

La sezion egiziana xe su due piani, una tematica al 1 pian con la spiegazion dela cultura, del modo de viver e una storica al secondo cole opere più famose, ghe xe anca una capelletta ricostruida, no go molte foro, comunque eco una sfinge in una cripta

po un sarcofago de piera ( granito)

e una statuetta dela dea Maat, la Giustizia